រដ្ឋមន្ត្រីក្រសួងការបរទេសថៃ លោក ស៊ូរ៉ាពុង តូវីចក្រឆៃគុល (Surapong Towijakchaikul) បានដឹកនាំប្រតិភូជាន់ខ្ពស់ថៃ មួយក្រុម ក្នុងនោះមានរដ្ឋមន្ត្រីក្រសួងថាមពលថៃ លោក ពិឆៃ ណារីបថាផាន់ (Pichai Narip Thaphan) មកទស្សនកិច្ចនៅកម្ពុជា នៅថ្ងៃទី២៩ ខែធ្នូ ឆ្នាំ២០១១ ដើម្បីជួបចរចាជាមួយរដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី លោក សុខ អាន ជាឧបនាយករដ្ឋមន្ត្រី និងជួបជាមួយរដ្ឋមន្ត្រីក្រសួងការបរទេសកម្ពុជា លោក ហោ ណាំហុង ជាឧបនាយករដ្ឋមន្រ្តី។
លោក ហោ ណាំហុង បានមានប្រសាសន៍នៅក្នុងសន្និសីទកាសែតរួមគ្នាមួយជាមួយរដ្ឋមន្ត្រីក្រសួងការបរទេសថៃ លោក ស៊ូរ៉ាពុង តូវីចក្រឆៃគុល នៅក្រសួងការបរទេសកម្ពុជា ថា កម្ពុជា និងថៃ សង្ឃឹមថា ការចរចានេះនឹងឈានទៅរកដំណោះស្រាយក្នុងការចែកភោគផលនៃធនធានរ៉ែ នៅតំបន់សមុទ្រត្រួតស៊ីគ្នានោះ។
លោក ហោ ណាំហុង៖ «ដោយបញ្ហាត្រួតគ្នានៅសមុទ្រនេះ ជាតំបន់មួយដែលមានលទ្ធភាពមានប្រេង និងឧស្ម័នច្រើន តាមការប៉ាន់ស្មានរបស់អ្នកជំនាញ ហើយប្រទេសយើងទាំងពីរក៏កំពុងត្រូវការនូវប្រេង និងឧស្ម័ននេះ។ ត្រូវការចំណូលពីប្រេង និងឧស្ម័ននេះ យើងគួរឈានទៅដល់ការស្រុះស្រួលគ្នាឲ្យបានឆាប់»។
ទាក់ទងនឹងបញ្ហានេះ រដ្ឋមន្ត្រីក្រសួងការបរទេសថៃ លោក ស៊ូរ៉ាពុង តូវីចក្រឆៃគុល បានមានប្រសាសន៍ថា គណៈកម្មាធិការបច្ចេកទេសចម្រុះរបស់ថៃ កំពុងប្រមូលឯកសារនានា ដើម្បីសុំឲ្យគណៈរដ្ឋមន្ត្រីថៃ ពិនិត្យ និងឯកភាព ដើម្បីដាក់ជូនសភាថៃ អនុម័ត។
លោកបានមានប្រសាសន៍ជាភាសាថៃ ហើយត្រូវបានប្រែសម្រួលជាភាសាខ្មែរថា៖ «ហើយនៅពេលណា ដែលគណៈកម្មការបច្ចេកទេសចម្រុះរបស់ថៃហ្នឹង បានពិភាក្សា និងសិក្សា ពីយន្តការផ្ទៃក្នុងរបស់ខ្លួនរៀបរយហើយ គឺនឹងការជំរុញឲ្យមានកិច្ចប្រជុំបញ្ហានេះជាផ្លូវការ»។
ការសិក្សាមួយបានឲ្យដឹងថា តំបន់ដែនសមុទ្រត្រួតស៊ីគ្នានោះ គឺមានទំហំ ២៧.០០០គីឡូម៉ែត្រក្រឡា។ តំបន់ត្រួតស៊ីគ្នានោះ គឺមានធនធានឧស្ម័ននៅបាតសមុទ្រចំនួនជាង ១១ពាន់លានម៉ែត្រគូប និងមានធនធានប្រេងកាតមហាសាល។
កាលពីខែមីនា ឆ្នាំ២០០១ កន្លងទៅ រាជរដ្ឋាភិបាលកម្ពុជា ដឹកនាំដោយលោកនាយករដ្ឋមន្ត្រី ហ៊ុន សែន និងរាជរដ្ឋាភិបាលថៃ ដឹកនាំដោយលោក ថាក់ស៊ីន ស៊ីណាវ៉ាត់ (Thaksin Shinawatra) បានចុះហត្ថលេខាលើអនុស្សរណៈយោគយល់គ្នាមួយ ដើម្បីកំណត់ព្រំដែនសមុទ្រ និងតំបន់អភិវឌ្ឍន៍រួមគ្នា។ ប៉ុន្តែចាប់តាំងពីពេលលោក ថាក់ស៊ីន ស៊ីណាវ៉ាត់ បានធ្លាក់ចេញពីតំណែងជានាយករដ្ឋមន្ត្រីមក ភាគីថៃ និងកម្ពុជា មិនទាន់បានឈានដល់ការដោះស្រាយបញ្ហាតំបន់ដែនសមុទ្រត្រួតស៊ីគ្នានោះឲ្យបានជ្រះស្រឡះនៅឡើយទេ៕