មន្ត្រីសមាគមការពារសិទ្ធិមនុស្សអាដហុក (Adhoc) ខេត្តបន្ទាយមានជ័យ កំពុងធ្វើការស្រាវជ្រាវទៅលើករណីស្លាប់សកម្មជនគណបក្សប្រឆាំងម្នាក់ នៅក្រុងប៉ោយប៉ែត ខេត្តបន្ទាយមានជ័យ។ ការស្រាវជ្រាវនេះ ដោយមានមន្ទិលសង្ស័យទៅលើការសន្និដ្ឋានរបស់សមត្ថកិច្ចក្រុងប៉ោយប៉ែត ដែលថា ជនរងគ្រោះស្លាប់ដោយសារការរអិលដួលកាលពីយប់ថ្ងៃទី៧ ខែកុម្ភៈ។
ការស្លាប់របស់សកម្មជនគណបក្សសង្គ្រោះជាតិ មួយរូបនោះ ធ្វើឲ្យមានការសង្ស័យ ដោយសារមានអ្នកខ្លះថា ស្លាប់ដោយសាររអិលជើងដួល ហើយអ្នកខ្លះថា ស្លាប់ដោយសារមានការវាយតប់គ្នា។
មន្ត្រីសម្របសម្រួលសមាគមការពារសិទ្ធិមនុស្សអាដហុក ខេត្តបន្ទាយមានជ័យ លោក ស៊ុំ ច័ន្ទគា មានប្រសាសន៍នៅថ្ងៃទី៩ កុម្ភៈ ថា លោកមិនជឿទៅលើការស្លាប់សកម្មជនគណបក្សសង្គ្រោះជាតិ ក្រុងប៉ោយប៉ែត នោះឡើយ។ លោកថា ការស្លាប់នេះ ហាក់មានអាថ៌កំបាំង ដោយសារការស៊ើបអង្កេតមនុស្សដែលនៅនឹងកន្លែងកើតហេតុ បកស្រាយខុសពីសមត្ថកិច្ចអះអាង៖ «ខាងយើងនៅតែមានការសង្ស័យ ព្រោះដោយសារចម្លើយនៅកន្លែងផឹកស៊ីនោះ។ រឿងតែមួយ តែផ្លាស់ប្ដូរផ្សេងគ្នាញឹកញាប់ពេក ហើយករណីនេះ អាចជាឃាតកម្មនយោបាយ ដោយសារចំណុចនៃការផឹកស៊ី មានដល់ក្របួចកអាវនិយាយខ្វែងគំនិតគ្នា វាអាចពាក់ព័ន្ធនឹងគណបក្សនយោបាយ ព្រោះអ្នកទាំងពីរបក្សផ្សេងគ្នា»។
អធិការនគរបាល ក្រុងប៉ោយប៉ែត លោក អ៊ុំ សុផល មានប្រសាសន៍បញ្ជាក់ថា បុរសដែលស្លាប់នោះ ឈ្មោះលោក បុណ្យ បុរិន្ទ អាយុ ៤៥ឆ្នាំ រស់នៅភូមិក្បាលស្ពាន១ សង្កាត់ និងក្រុងប៉ោយប៉ែត ខេត្តបន្ទាយមានជ័យ។ លោកថា តាមការស្រាយរបស់សមត្ថកិច្ច ជនរងគ្រោះស្លាប់ដោយសារការរអិលជើងដួល ខណៈផឹកស៊ីនៅផ្ទះលក់សាច់ឆ្កែមួយកន្លែងនៅភូមិក្បាលស្ពានសង្កាត់ប៉ោយប៉ែត កាលពីម៉ោង ២យប់ថ្ងៃទី៧ ខែកុម្ភៈ៖ «បាទ! តាមខ្ញុំសាកសួរ គឺគាត់រអិលជើងដួលដោយខ្លួនឯង នៅកន្លែងផឹកស៊ីនៅផ្ទះលក់សាច់ឆ្កែនោះ»។
ទោះយ៉ាងនេះក្ដី ប្រពន្ធជនរងគ្រោះ អ្នកស្រី ម៉ៅ រចនា មានប្រសាសន៍ថា ប្ដីអ្នកស្រីពុំធ្លាប់មានទំនាស់ជាមួយអ្នកជិតខាងនោះទេ។យ៉ាងណាអ្នកស្រីអំពាវនាវសុំឲ្យអាជ្ញាធរពាក់ព័ន្ធធ្វើការស៊ើបទៅលើករណីការស្លាប់នេះ ដើម្បីរកចាប់ជនបង្កមកផ្ដន្ទាទោសតាមផ្លូវច្បាប់៖ «ខ្ញុំឃើញស្លាកស្នាមនៅត្រង់កករឡើងក្រហម ដូចគេរឹតកគាត់អ៊ីចឹង ហើយដៃទាំងសង្ខាងរឹងដូចមានវាយ មានស្នាមខៀវ ហើយនៅលើថ្ងាសចំនួន ៣កន្លែងយ៉ាងជ្រៅ តែពុំមានឈាមទេ»។
ទោះយ៉ាងនេះក្ដី សមត្ថកិច្ចបានចាប់ជនសង្ស័យម្នាក់ ឈ្មោះ លោក ប្រាក់ សាវន ដែលផឹកស៊ីជាមួយជនរងគ្រោះ បញ្ជូនទៅតុលាការខេត្តបន្ទាយមានជ័យ ដើម្បីសាកសួរជុំវិញករណីនេះ។
ជនរងគ្រោះដែលស្លាប់នោះ ជាសកម្មជនគណបក្សសង្គ្រោះជាតិ ខេត្តបន្ទាយមានជ័យ។ កន្លងទៅ ជនរងគ្រោះធ្លាប់ចូលរួមសកម្មឃោសនារកសំឡេងឆ្នោតឲ្យគណបក្សនេះ។
មន្ត្រីសង្គមស៊ីវិលមានការសង្ស័យថា ការស្លាប់របស់សកម្មជនគណបក្សប្រឆាំងនេះ ជាអាថ៌កំបាំងពាក់ព័ន្ធនឹងអំពើឃាតកម្ម ហើយសមាគមការពារសិទ្ធិមនុស្សអាដហុក កំពុងធ្វើការស៊ើបអង្កេតលើរឿងនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។