តំណាងពាណិជ្ជកម្មសហរដ្ឋអាមេរិក ប្រកាសការពង្រីកការអនុគ្រោះពន្ធផ្នែកពាណិជ្ជកម្មសម្រាប់កម្ពុជា និងប្រទេសដែលកំពុងអភិវឌ្ឍន៍ដទៃទៀតក្នុងពិភពលោក។ កម្មវិធីប្រព័ន្ធអនុគ្រោះពន្ធរបស់សហរដ្ឋអាមេរិក (G.S.P) គឺជាកម្មវិធីអនុគ្រោះពាណិជ្ជកម្មដែលមានចំណាស់ ៤០ឆ្នាំមកហើយបានជួយដល់ប្រទេសដែលកំពុងអភិវឌ្ឍន៍ រួមទាំងប្រទេសកម្ពុជា ផង ដោយគ្មានការយកពន្ធលើទំនិញនាំចូលជាច្រើន។
សេចក្ដីប្រកាសព័ត៌មានរបស់ស្ថានទូតសហរដ្ឋអាមេរិក ប្រចាំនៅកម្ពុជា ដែលចេញផ្សាយកាលពីថ្ងៃទី៣០ ខែមិថុនា កន្លងទៅនេះ បានដកស្រង់ប្រសាសន៍តំណាងពាណិជ្ជកម្មសហរដ្ឋអាមេរិក លោក ម៉ៃឃើល ហ្វ្រូម៉េន (Michael Froman) ថា សហរដ្ឋអាមេរិក បានប្រើកម្មវិធីការអនុគ្រោះពន្ធនេះដើម្បីផ្ដល់ដល់ប្រទេសក្រីក្រជាងគេមួយចំនួនក្នុងពិភពលោក រួមមានកម្ពុជាផង នូវជំនួយយ៉ាងសំខាន់នៅក្នុងទំនាក់ទំនងជាមួយគូប្រជែងដែរមានកម្រិតខ្ពស់។
ការពង្រីកប្រព័ន្ធនេះមិនត្រឹមតែផ្ដល់អោយកម្ពុជា នូវលទ្ធភាពនាំចូលទៅសហរដ្ឋអាមេរិក ដែលមានតម្លៃប្រមាណ ១០ពាន់លានដុល្លារអាមេរិកប៉ុណ្ណោះទេ វាថែមទាំងបានលើកទឹកចិត្តដល់ការអភិវឌ្ឍនៃឧស្សាហកម្មវាយនភណ្ឌរបស់កម្ពុជា ទៅក្នុងផ្នែកថ្មីៗនៃផលិតកម្មដែលផ្ដល់ការចំណេញទៀតផង។
ឯកអគ្គរដ្ឋទូតសហរដ្ឋអាមេរិក ប្រចាំនៅកម្ពុជា លោក វីល្លៀម ហៃដ្ដ៍ (William Heidt) មានប្រសាសន៍ថា ការប្រកាសរបស់ការិយាល័យតំណាងពាណិជ្ជកម្មសហរដ្ឋអាមេរិក នេះ អាចបើកទីផ្សារមួយថ្មីទាំងស្រុងសម្រាប់ក្រុមហ៊ុននាំចេញពីកម្ពុជា ហើយអាចបង្កើតអោយមានការងាររាប់ពាន់សម្រាប់ប្រជាជនកម្ពុជា ថែមទៀត។ សហរដ្ឋអាមេរិក លើកទឹកចិត្តអោយផលិតករកម្ពុជា ទាញយកប្រយោជន៍ពីឱកាសថ្មីនេះ ដែលនឹងជួយបង្កើនមុខរបរ ឬវិស័យនៃមូលដ្ឋានសេដ្ឋកិច្ចរបស់កម្ពុជា និងជួយជំរុញដល់កំណើនការលូតលាស់សេដ្ឋកិច្ច និងកាត់បន្ថយភាពក្រីក្រក្នុងប្រទេសមួយនេះបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។