ពលរដ្ឋដែលបានដាក់ទុនរកស៊ីជាមួយក្រុមហ៊ុន ប្រ៊ីនលាន ស៊ីធី (Brilliant City) របស់ឧកញ៉ា ឡេង ចាន់ណា ស្នើឱ្យភាគីក្រុមហ៊ុនសង់ប្រាក់ត្រឡប់ទៅពួកគាត់ទៅវិញ ខណៈពួកគាត់កំពុងប្រឈមបញ្ហាលំបាកក្នុងជីវភាពគ្រួសារ និងមិនមានលទ្ធភាពសងប្រាក់ទៅធនាគារ។ មន្ត្រីសង្គមស៊ីវិលថារដ្ឋាភិបាលគួរអន្តរាគមន៍ឱ្យភាគីក្រុមហ៊ុនចេញមកដោះស្រាយជូនពលរដ្ឋឱ្យទាន់ពេលវេលា។
ពលរដ្ឋរស់នៅខេត្តសៀមរាប លោកស្រី យំ សំអាង ឱ្យដឹងថា គ្រួសារលោកស្រីបានខ្ចីលុយធនាគារចំនួន ៤ម៉ឺនដុល្លារដើម្បីដាក់ទុនរកស៊ីជាមួយក្រុមហ៊ុនឧកញ៉ា ឡេង ចាន់ណា ដោយសង្ឃឹមថា នឹងទទួលបានការប្រាក់មកវិញ។ ទោះជាយ៉ាងណា ឧកញ៉ា ឡេង ចាន់ណា មិនបានផ្ដល់ប្រាក់មកឱ្យលោកស្រីវិញចាប់ពីខែកក្កដា ឆ្នាំ២០២៣មក។
លោកស្រី យំ សំអាង លើកឡើងថា គ្រួសារលោកស្រីមិនមានលទ្ធភាពទ្រទ្រង់ជីវភាពគ្រួសារ និងគ្មានលុយសូម្បីទិញទឹកដោះគោឱ្យចៅ ហើយប្រាក់ចំណូលដែលគ្រួសារលោកស្រីរកបានក៏មិនអាចសងទៅធនាគារវិញបាននោះដែរ។ លោកស្រី យំ សំអាង ថា ប្រសិនបើក្រុមហ៊ុនមិនដោះស្រាយឱ្យទេ ធនាគារនឹងរឹបអូសផ្ទះ និងដីនាពេលខាងមុខនេះ។
លោកស្រី យំ សំអាង៖ «គឺគ្រប់គ្នាយើង ធំមែនទែនហើយ មិនដឹងធ្វើយ៉ាងណាទេ តែឆ្លងខែបង់ធនាគារ នេះធនាគារបើកឡានចូលភូមិមក មេៗ គេមកលក់ផ្ទះ លក់ដីឱ្យគេ ថា ចាំបាច់ត្រូវតែលក់ឱ្យគេ»។
ពលរដ្ឋរស់នៅស្រុកសំឡូត ខេត្តបាត់ដំបង លោក នួន នឿត លើកឡើងថា គ្រួសារលោកបានធ្លាក់ក្នុងបំណុលដោយសារតែគ្រួសារលោកមិនអាចរកថវិកាសង់ធនាគារវិញគ្រប់ចំនួន ដូច្នេះលោកបានទៅខ្ចីបំណុលឯកជនបន្ថែមទៀតដោយសារតែលោកមិនចង់បាត់បង់ដីដែលបានដាក់បញ្ចាំនៅធនាគារនោះទេ។
លោក នួន នឿន ស្នើដល់រដ្ឋាភិបាល និងអភិបាលខេត្តសៀមរាបអន្តរាគមន៍ឱ្យក្រុមហ៊ុនឧកញ៉ា ឡេង ចាន់ណា សងប្រាក់ពួកគាត់វិញឆាប់ៗ។
លោក នួន នឿន៖ «សូមលោកមេត្តាជួយស្រាយ ព្រោះរឿងខ្ញុំទាំងអស់នេះ គឺសុទ្ធតែរឿងដីធ្លីដាក់ទុនហ្នឹង គឺយកដីយកធ្លីយកទៅបញ្ចាំ ហើយលក់ជាមួយនឹងអង្គការ ដើម្បីយកលុយអង្គការមកដាក់ទុនជាមួយគេ ហើយអ៊ីចឹងមានតែអភិបាលខេត្តសៀមរាបហើយ ដែលលោកជាភ្នែកជាច្រមុះ ជាម៉ែជាឪដែលជួយដោះស្រាយឱ្យខ្ញុំទាំងអស់គ្នាហ្នឹង»។
វិទ្យុអាស៊ីសេរីមិនអាចសុំការបំភ្លឺបញ្ហានេះ ពីប្រធានក្រុមហ៊ុន ប្រ៊ីលាន ស៊ីធី អ្នកស្រី ឡេង ចាន់ណា និងអភិបាលខេត្តសៀមរាប លោក ប្រាក់ សោភ័ណ បានទេ នៅថ្ងៃទី៥ ខែមីនា។
ទាក់ទិនរឿងនេះ អ្នកសម្របសម្រួលគម្រោងធុរកិច្ច និងសិទ្ធិមនុស្សរបស់មជ្ឈមណ្ឌល សិទ្ធិមនុស្សកម្ពុជា (CCHR) លោក វណ្ណ សូផាត មានប្រសាសន៍ថា បញ្ហានេះរដ្ឋត្រូវដាក់ចេញវិធានការអន្តរាគមន៍ទៅលើភាគីក្រុមហ៊ុនឱ្យផ្ដល់លុយទៅប្រជាពលរដ្ឋវិញឱ្យបានឆាប់ ព្រោះថា បញ្ហានេះនឹងកាន់តែធ្ងន់ធ្ងរសម្រាប់ពលរដ្ឋប្រសិនបើដំណោះស្រាយនៅបន្តអូសបន្លាយ។
លោក វណ្ណ សូផាត៖ «បញ្ហាហ្នឹងវានៅតែរាលដាលបន្តទៅទៀត ហើយគ្មានដំណោះស្រាយ ហើយអ្នកដែលរងគ្រោះធ្ងន់ធ្ងរជាងគេ គឺប្រជាពលរដ្ឋដែលគាត់ជាប់ជំពាក់បំណុលធនាគារដើម្បីយកប្រាក់យកទៅដាក់ភាគហ៊ុន អាហ្នឹងវាជាបញ្ហាគួរតែរាជរដ្ឋាភិបាលអាចរកមធ្យោបាយដោះស្រាយណាមួយរវាងក្រុមហ៊ុន និងប្រជាពលរដ្ឋដែលរងផលប៉ះពាល់ដែលអាចទទួលយកបានទាំងអស់គ្នា»។
អ្នកស្រី ឡេង ចាន់ណា គឺជាប្រធានក្រុមហ៊ុន ប្រ៊ីលាន ស៊ីធី ដែលបោះទុនរកស៊ីលក់បុរីនៅខេត្ត សៀមរាប ចាប់តាំងពីឆ្នាំ២០២២មក និងជាបុគ្គលដែលមានទំនាក់ទំនងជិតស្និទ្ធជាមួយនាយករដ្ឋមន្ត្រី ហ៊ុន ម៉ាណែត។ កន្លងមកក្រោយការតវ៉ារបស់ពលរដ្ឋ អ្នកស្រី ឡេង ចាន់ណា បានលើកឡើងក្នុងវីដេអូបែកធ្លាយថា អ្នកស្រី មិនញញើតនឹងបុគ្គលណាទេ ព្រោះក្រុមហ៊ុនរបស់អ្នកស្រី ជាដៃគូរបស់រដ្ឋាភិបាល និងត្រូវបានជួយជ្រោមជ្រែងដោយរដ្ឋាភិបាល រីឯសមាគមរបស់អ្នកស្រី បង្កើតឡើងដោយលោក ហ៊ុន ម៉ាណែត និងគំរាមថតរូបប្រជាពលរដ្ឋរងគ្រោះដែលហ៊ានតវ៉ាទៀតផង។
ទោះជាយ៉ាងណា អ្នកនាំពាក្យរដ្ឋាភិបាលបានចេញលិខិតបដិសេធថា លោក ហ៊ុន ម៉ាណែត មិនបានពាក់ព័ន្ធនឹងក្រុមហ៊ុនរបស់អ្នកស្រី ឡេង ចាន់ណា នោះទេ និងព្រមានចាត់វិធានការច្បាប់បើនៅបន្តប្រើឈ្មោះរបស់លោក ហ៊ុន ម៉ាណែត។ បែបនេះក្តី រហូតមកដល់ពេលនេះ គេមិនទាន់ឃើញរដ្ឋាភិបាលចាត់វិធានការក្តៅទៅលើក្រុមហ៊ុនរបស់អ្នកស្រី ឡេង ចាន់ណា ដែលពលរដ្ឋចោទប្រកាន់ថា ឆបោកពួកគាត់នៅឡើយ បើទោះជាពលរដ្ឋចេញតវ៉ាជាច្រើនលើកច្រើនសា តែគ្មានដំណោះស្រាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។