ពលរដ្ឋរស់នៅរាជធានីភ្នំពេញ និងតាមបណ្តាខេត្តមួយចំនួន ពុំបានធ្វើដំណើរកម្សាន្តទៅតំបន់ឆ្ងាយៗនោះឡើយ ហើយពួកគេភាគច្រើនសម្ងំក្នុងផ្ទះជួបជុំក្រុមគ្រួសារ ដើម្បីបង្ការការរីករាលដាលជំងឺកូវីដ១៩ (COVID-19) និងកុំឱ្យល្មើសបម្រាមរបស់អាជ្ញាធរ។
ពលរដ្ឋរស់នៅរាជធានីភ្នំពេញលោក ប៉ុន សារន់ ថ្លែងថា អាជ្ញាធរបានបិទផ្លូវសំខាន់ៗជាច្រើនកន្លែងដើម្បីទប់ស្កាត់មិនឱ្យពលរដ្ឋដើរឆ្ងាយក្នុងថ្ងៃបុណ្យចូលឆ្នាំ ក្នុងបំណងប្រឆាំងជំងឺកូវីដ១៩។ ប្រការនេះជាមូលហេតុ ធ្វើឱ្យស្ថានភាពក្រុងភ្នំពេញស្ងប់ស្ងាត់ខ្លាំង។ លោកថា ពលរដ្ឋភាគច្រើនសម្ងំក្នុងផ្ទះ និងជួបជុំក្រុមគ្រួសារហូបអាហារជុំគ្នា៖ «នៅទីក្រុងភ្នំពេញស្ងាត់ជាងថ្ងៃធម្មតាឆ្ងាយ អត់សូវមានឡានម៉ូតូបើក បើស្ទះគេបិទផ្លូវ ទាំងសងខាង វាអត់សូវមានឡានបើក »។
ពលរដ្ឋរស់នៅរាជធានីភ្នំពេញមួយរូបទៀតលោក អូត ឡាទីន ថ្លែងថា ការឆ្លងរាលដាលជំងឺកូវីដ១៩ ទ្រង់ទ្រាយធំក្នុងព្រឹត្តិការណ៍សហគមន៍ ២០កុម្ភៈ បណ្តាលឱ្យពលរដ្ឋកាន់តែប្រុងប្រយ័ត្នខ្ពស់ ប្រើប្រាស់អាល់កុល (Alcohol) លាងដៃ និងពាក់ម៉ាសជាប្រចាំ។ លើសពីនេះលោកថា ពលរដ្ឋហាក់ខ្លាចរអាមិនហ៊ានជួបជុំគ្នាច្រើនទេ ព្រោះល្មើសនឹងបម្រាមរបស់អាជ្ញាធរ។ លោកថា បុណ្យចូលឆ្នាំក្នុងឆ្នាំនេះគ្រួសារលោក បានទិញផ្លែឈើ ទៀន ធូប និងសម្ភារៈផ្សេងៗទៀតថ្វាយទេវតាឆ្នាំថ្មីដែរ៖ «លំបាកដែរពេលចេញក្រៅ យើងនៅតែបន្ទប់ ហើយពេលខ្លះចេញទៅទិញម្ហូប ក៏យើងពុំសូវហ៊ានប្រហែសដែល យើងយកអាល់កុល បាញ់លាងដៃ លាងជើង។ វាស្ងាត់ វាស្ងប់ស្ងាត់ »។
ចំណែកឯខេត្តសៀមរាបវិញ ទិដ្ឋភាពក្រុងអង្គរក៏ស្ងប់ស្ងាត់មិនខុសពីរាជធានីភ្នំពេញនោះដែរ។ សណ្ឋាគារលំដាប់ផ្កាយ អាហារដ្ឋាន កន្លែងលក់វត្ថុអនុស្សាវរីយ និង កន្លែងលក់ដូរស្ទើរតែទាំងអស់បានបិទទ្វារ។ អាជ្ញាធរខេត្តសៀមរាប បានប្រកាសបិទផ្លូវមិនឱ្យពលរដ្ឋធ្វើដំណើរពេលយប់ចាប់ពីម៉ោង ៨យប់ ដល់ម៉ោង ៥ ជិតភ្លឺ ដែលជាវិធានការរបស់រដ្ឋាភិបាលក្នុងការប្រយុទ្ធប្រឆាំងនឹងការរាតត្បាតជំងឺកូវីដ១៩។
ពលរដ្ឋរស់នៅក្រុងសៀមរាបលោក អាង ឆាល គាំទ្រវិធានការបែបនេះរបស់អាជ្ញាធរដើម្បីបម្រើផលប្រយោជន៍រួម និងការពារសុខុមាលភាពពលរដ្ឋ។ តែយ៉ាងណាលោកបារម្ភថា ពលរដ្ឋក្រីក្រកំពុងជួបការលំបាកខ្លាំងផ្នែកជីវភាព ព្រោះមិនអាចរកប្រាក់ចំណូលបាន៖ «គេបិទស្ទើរតែទាំងអស់ពេលយប់ឡើង បម្រាប់គោចរយប់ឡើងគេអត់ឱ្យចេញទេ។ ខ្ញុំយល់ឃើញថា វិធានការនេះគឺល្អ ដើម្បីកាត់បន្ថយ ចៀសវាងការរីករាលដាលកាន់តែខ្លាំង »។
ចំណែកនៅខេត្តកំពង់ចាមវិញ ពលរដ្ឋមួយចំនួនក្នុងខេត្តនេះប្រុងប្រយ័ត្នខ្ពស់ក្នុងការបង្ការជំងឺកូវីដ១៩ ដោយប្រើអាល់កុល និងពាក់ម៉ាសតាមការណែនាំរបស់អាជ្ញាធរ។
ពលរដ្ឋរស់នៅខេត្តកំពង់ចាមលោក ចាន់ថា ភារុន សង្កេតឃើញថា ជារៀងរាល់ឆ្នាំឱ្យតែដល់ពិធីបុណ្យចូលឆ្នាំម្តងៗ អាជ្ញាធរធ្វើកម្មវិធីសង្ក្រាន្ត មានចាក់ធុងបាស និងរៀបពិធីលេងល្បែងប្រជាប្រិយគ្រប់ប្រភេទ ប៉ុន្តែឆ្នាំនេះ បែរជាស្ងាត់ជ្រងំ ដោយសារតែជំងឺកូវីដ-១៩។ លោកថា តាមដងផ្លូវស្ងប់ស្ងាត់ខ្លាំង សូម្បីតែអ្នកលក់ដូរក៏ពុំសូវមានដែរ៖ «ខ្លះគេនៅផ្ទះ ខ្លះគេហូបតិចតួចជុំគ្រួសារ។ ជាទូទៅគេរៀបពិធីបាញ់ទឹក នៅមុខសាលាខេត្ត ឆ្នាំហ្នឹងអត់ »។
ជុំវិញការបិទផ្លូវ និងអនុវត្តបម្រាមលើការធ្វើដំណើររបស់ពលរដ្ឋនេះ អាជ្ញាធរបានអំពាវនាវឱ្យពលរដ្ឋយោគយល់ ព្រោះវិធានការនេះ មានគោលបំណងល្អ ដើម្បីការពារសុខសុវត្ថិភាពជូនពលរដ្ឋតែប៉ុណ្ណោះ។
អ្នកនាំពាក្យស្នងការដ្ឋាននគរបាលរាជធានីភ្នំពេញលោក សាន សុខសីហា មានប្រសាសន៍ថា សមត្ថកិច្ចបានបិទផ្លូវមួយចំនួន ដើម្បីអនុវត្តបម្រាមគោចររបស់រដ្ឋាភិបាលបម្រើសេវាជូនពលរដ្ឋនិងដាក់វេនល្បាត ២៤ម៉ោងក្នុងបំណងអនុវត្តបទបញ្ជារបស់ថ្នាក់ដឹកនាំដើម្បីប្រឆាំងជំងឺកូវីដ១៩ ឱ្យមានប្រសិទ្ធភាព៖ «សំណូមពរគឺឱ្យមានការចូលរួមពីពលរដ្ឋ ឱ្យគាត់យោគយល់ ជាពិសេសតំបន់បិទខ្ទប់មួយចំនួន គឺមានន័យថា អាជ្ញាធរធ្វើនេះគោលបំណងល្អ ដើម្បីសុខសុវត្ថិភាពពលលរដ្ឋ បិទសិទ្ធិសេរីភាពប៉ុន្តែគឺ ក្នុងការចូលរួមការពារអាយុជីវិតពួកគាត់ ដើម្បីកុំឱ្យការឆ្លងរាលដាល កាន់តែធំឡើងៗ »។
រាជរដ្ឋាភិបាលបានសម្រេចបិទការធ្វើដំណើរឆ្លងខេត្ត និងបិទរមណីយដ្ឋានទេសចរណ៍ទូទាំងប្រទេស រយៈពេល ១៤ ថ្ងៃ គឺចាប់ពីថ្ងៃទី ០៧ មេសា ដល់ថ្ងៃទី ២០ ខែមេសា ដើម្បីទប់ស្កាត់ការឆ្លងរាលដាលជំងឺកូវីដ-១៩ ពីខេត្តមួយទៅខេត្តមួយទៀត ខណៈតួលេខនៃអ្នកជំងឺដែលឆ្លងក្នុងព្រឹត្តិការណ៍សហគមន៍ ២០ កុម្ភៈ កើនឡើងយ៉ាងគំហុកនៅពេលថ្មីៗនេះ។
ទាក់ទងនឹងរឿងបុណ្យចូលឆ្នាំថ្មីនេះដែរ អង្គការសុខភាពពិភពលោក (WHO) បានចេញសេចក្តីថ្លែងការណ៍ អំពាវនាវយ៉ាងទទូចឱ្យពលរដ្ឋខ្មែរ ប្រារព្ធពិធីបុណ្យប្រពៃណីនេះនៅតាមផ្ទះរៀងៗខ្លួន ដើម្បីការពារគ្រួសារ សហគមន៍ និងប្រទេសជាតិទាំងមូល។ អង្គការសុខភាពពិភពលោកព្រមានថា បើមិនបញ្ឈប់ការផ្ទុះរាតត្បាតជំងឺកូវីដ-១៩ ក្នុងពេលឥលូវនេះទេ នោះប្រព័ន្ធសុខាភិបាលកម្ពុជានឹងប្រឈមនឹងបន្ទុកយ៉ាងធ្ងន់ធ្ងរ ដែលអាចនឹងមានផលវិបាកជាមហន្តរាយដ៏ធំនៅពេលខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។