ក្រសួងសុខាភិបាលប្រកាសឱ្យកងកម្លាំង អាជ្ញាធរសាធារណៈ និងអ្នកសារព័ត៌មាន ដែលស្ម័គ្រចិត្តចាក់វ៉ាក់សាំងស៊ីណូហ្វាម (Sinopharm) ចុះឈ្មោះជាមុន។ ទន្ទឹមនឹងនេះ ក្រសួងក៏បញ្ជាក់ថា វ៉ាក់សាំងរបស់ចិននេះ មិនអាចចាក់ឱ្យអ្នកមានសុខភាពទន់ខ្សោយបានទេ។
វ៉ាក់សាំងស៊ីណូហ្វាម របស់ចិន នៅដំណាក់កាលដំបូងនេះ ទំនងជាមិនគ្រប់សម្រាប់ចាក់ឱ្យមន្ត្រីរាជការទូទៅបានទេ។ ក្រសួងសុខាភិបាលកំណត់ថា នៅក្រោយពេលចាក់ឱ្យមនុស្ស ៣ក្រុមជាគំរូ គឺមន្ត្រីនយោបាយ អភិបាលខេត្តរាជធានី និងក្រុមអ្នកសារព័ត៌មានរួចរាល់អស់ហើយ ក្រសួងនឹងសម្រេចឱ្យមនុស្ស ៣ក្រុមទៀតចុះឈ្មោះ ដើម្បីចាក់វ៉ាក់សាំងនេះ។
នៅថ្ងៃទី១០ ខែកុម្ភៈ វ៉ាក់សាំងនេះ នឹងត្រូវចាក់ជូនអ្នកដែលចង់បានវ៉ាក់សាំងនេះមុនគេ នៅមន្ទីរពេទ្យ ៥ កន្លែងនៅក្រុងភ្នំពេញ។ មន្ទីរពេទ្យបួនកន្លែង នឹងត្រូវផ្តល់វ៉ាក់សាំងនេះ នៅពេលព្រឹក។ ចំណែកឯនៅពេលរសៀលថ្ងៃដដែល ក្រសួងការពារជាតិ បានកំណត់ឱ្យក្រុមមន្ត្រីជាន់ខ្ពស់ឋានៈប្រធានស្ថាប័នចំណុះឱ្យក្រសួង និងឋានៈអគ្គបញ្ជាការដ្ឋានកងយោធពលខេមរភូមិន្ទ ទៅចាក់វ៉ាក់សាំងនេះ នៅមន្ទីរពេទ្យព្រះកេតុមាលា ឬពេទ្យទាហាន។
ចំណែកក្រុមមនុស្ស ដែលនឹងត្រូវអនុញ្ញាតឱ្យចុះឈ្មោះស្ម័គ្រចិត្តចាក់វ៉ាក់សាំង ចាប់ពីថ្ងៃទី១១ កុម្ភៈតទៅ គឺកងកម្លាំងជំនាញនៃមជ្ឈមណ្ឌលសកម្មភាពកម្ចាត់មីនកម្ពុជា អាជ្ញាធរថ្នាក់ក្រោមជាតិ (ខេត្តក្រុងស្រុកខណ្ឌ ឃុំសង្កាត់ និងភូមិ) និងកងកម្លាំងនគរបាល។
បើតាមការលើកឡើងរបស់លោកនាយករដ្ឋមន្ត្រី ហ៊ុន សែន កូនប្រុសទាំងបី និងកូនប្រសារពីរនាក់របស់លោកផង ត្រូវចាក់វ៉ាក់សាំងនេះដែរ នៅថ្ងៃទី១០ ខែកុម្ភៈ នោះ។ ប៉ុន្តែ មកដល់ពេលនេះ កូនៗ របស់លោក និងមន្ត្រីក្នុងមុខងារនយោបាយមួយចំនួន មិនទាន់បង្ហាញប្រតិកម្មបែបណានៅឡើយទេ ចំពោះរឿងចាក់វ៉ាក់សាំងនេះ។
អាស៊ីសេរីមិនអាចសុំការបញ្ជាក់ពីអ្នកនាំពាក្យតាមស្ថាប័នរដ្ឋាភិបាលមួយចំនួន ដូចជា លោក ផៃ ស៊ីផាន លោក នាង ផាត លោក ឈុំ សុជាត អ្នកស្រី ឱ វណ្ណឌីន និងលោក ឆាយ គឹមខឿន បានទេ នៅថ្ងៃទី៩ កុម្ភៈ ជុំវិញចំនួនអ្នកស្ម័គ្រចិត្តចាក់វ៉ាក់សាំងនៅថ្ងៃទី១០ ខែកុម្ភៈនោះ។
ទោះជាយ៉ាងនេះក្ដី ភាពអល់អែកក្នុងការព្រមទទួលយកវ៉ាក់សាំងចិន ដែលខ្វះការទទួលស្គាល់ពីស្ថាប័នអន្តរជាតិនេះ នៅតែបន្តកើតមាន ក្នុងចំណោមក្រុមមនុស្សដែលមានអាទិភាពទទួលបានវ៉ាក់សាំងនេះ។ សមាជិកសមាគមមន្ត្រីរាជការឯករាជ្យកម្ពុជា (CICA) ម្នាក់ សុំមិនបញ្ចេញឈ្មោះឱ្យដឹងថា មន្ត្រីរាជការមួយចំនួន នៅរារែកចិត្តនៅឡើយ ដោយសារវ៉ាក់សាំងស៊ីណូហ្វាមរបស់ចិននេះ មិនទាន់មានការទទួលស្គាល់គុណភាពពីអ្នកជំនាញពិភពលោក។ លោកថា មន្ត្រីរាជការមួយចំនួន ចង់ឱ្យរដ្ឋាភិបាលរង់ចាំការបញ្ជាក់គុណភាពវ៉ាក់សាំងនេះ ពីអង្គការសុខភាពពិភពលោកជាមុនសិន៖ « កំពុងជជែកគ្នាច្រើនដែរ អ៊ីចឹងណា។ ខ្ញុំបានជជែកជាមួយលោកគ្រូ អ្នកគ្រូ ក៏ដូចជា មន្ត្រីមួយចំនួនគាត់រាងស្ទាក់ស្ទើរ។ អ្នកខ្លះ ក៏ព្រម គាត់ថា គាត់ព្រម។ អ្នកខ្លះ គាត់ថា ដូចជា មិនមានពេល មួយចំនួនទៀត លើកហេតុផលថា ដោយសារវ៉ាក់សាំងហ្នឹង មិនទាន់មានការទទួលស្គាល់ពី WHO អង្គការសុខភាពពិភពលោក។ ដល់អ៊ីចឹង គាត់នៅរារែកនៅឡើយ»។
ការរារែកចិត្ត ក៏មាននៅក្នុងចំណោមពលរដ្ឋក្រីក្រដែរ។ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ ឱ្យដឹងថា ពលរដ្ឋមានជីវភាពក្រីក្រខ្លះ ក៏មិនទាន់ហ៊ានចាក់វ៉ាក់សាំងស៊ីណូហ្វាម នេះដែរ។ មន្ត្រីសង្គមស៊ីវិលរូបនេះ យល់ឃើញ ដូចអ្នកឃ្លាំមើលមួយចំនួនទៀតដែរ គឺកម្ពុជាមិនទាន់ប្រឈមជំងឺកូវីដ១៩ ធ្ងន់ធ្ងរពេកទេ គួរតែរង់ចាំវ៉ាក់សាំង ដែលមានការទទួលគុណភាពត្រឹមត្រូវវិញ៖ « ខ្ញុំគិតថា ស្ថានភាពយើងដូចជាមិនមានអ្នកណាស្លាប់ច្រើនដូចប្រទេសគេជិតខាងមួយចំនួន។ អ៊ីចឹង ខ្ញុំគិតថា គួរតែរង់ចាំការទទួលស្គាល់ពីអង្គការសុខភាពពិភពលោក WHO ឱ្យច្បាស់លាស់សិន ចាំយើងនឹងអាចចាក់ជូនប្រជាពលរដ្ឋ ហើយវាជាការទំនុកទុកចិត្តសម្រាប់ប្រជាពលរដ្ឋដែលគាត់ត្រូវប្រើប្រាស់ ចាក់វ៉ាក់សាំងនេះ ថែមទៀតផង»។
បើទោះជាយ៉ាងណា វ៉ាក់សាំងចិននេះ មានលក្ខខណ្ឌជាច្រើន ដែលមិនអាចចាក់បានគ្រប់គ្នានោះដែរ។ រដ្ឋមន្ត្រីក្រសួងសុខាភិបាល លោក ម៉ម ប៊ុនហេង ចេញសេចក្ដីប្រកាសព័ត៌មាននៅថ្ងៃទី៩ ខែកុម្ភៈ ដោយរៀបរាប់លក្ខខណ្ឌជាងដប់ (១៤) ចំណុច ដែលមិនអាចចាក់វ៉ាក់សាំងរបស់ចិននេះបាន ដូចជាអ្នកដែលមានអាយុក្រោម ១៨ឆ្នាំ និងលើ ៥៩ឆ្នាំ អ្នកមានអាការៈក្ដៅខ្លួន និងអ្នកមានជំងឺរ៉ាំរ៉ៃប្រចាំកាយជាដើម។ អ្នកមានប្រវត្តិកើតជំងឺកូវីដ-១៩ (Covid-19) អ្នកប្រតិកម្មនឹងវ៉ាក់សាំងផ្សេងៗ ស្ត្រីមានផ្ទៃពោះ ស្ត្រីដែលកំពុងបំបៅដោះកូន និងស្ត្រីដែលកំពុងមានផែនការយកកូនក្នុងពេលឆាប់ៗ ជាដើមនោះ ក៏មិនអាចចាក់វ៉ាក់សាំងនេះបានដែរ។
អ្នកដែលមានបញ្ហាសុខភាពទាំងនេះ ក៏មិនអាចចាក់វ៉ាក់សាំងនេះបានដែរ មានជាអាទិ៍ អ្នកមានជំងឺផ្លូវដង្ហើម (Acute respiratory disease) ជំងឺហឺត (Asthma) ជំងឺរ៉ាំរ៉ៃធ្ងន់ធ្ងរ ជំងឺរ៉ាំរ៉ៃឧស្សាហ៍ធ្វើទុក ជំងឺអាឡែកស៊ី (Allergy) ជំងឺកន្ទាលត្រអាក (Angioedema) ជំងឺថ្លើមជំងឺតម្រងនោមធ្ងន់ធ្ងរ (Kidney problem) ជំងឺលើសឈាម (Hypertension) ជំងឺប្រកាច់ស្កន់ ឬឆ្កួតជ្រូក (Epilepsy) សរសៃប្រសាទ រលាកស្រោមខួរ (Meningitis) ជំងឺកង្វះភាពផ្សាំពីកំណើត (Immune deficiency) អ្នកមានជំងឺឆ្លង (HIV) អ្នកមានជំងឺមហារីកកូនកណ្ដុរ (Lymphoma) មានជំងឺឈាមស ឬ អ្នកមានជំងឺភាពស៊ាំ (Autoimmune) អ្នកប្រើប្រាស់ថ្នាំសម្រួលភាពស៊ាំប្រឆាំងជំងឺមហារីកដុំសាច់។
ជុំវិញក្ដីបារម្ភអំពីការមិនទាន់មានការទទួលស្គាល់ពីអង្គការសុខភាពពិភពលោកនោះ មន្ត្រីរដ្ឋាភិបាល មិនខ្វល់ខ្វាយរឿងអង្គការសុខភាពពិភពលោកទទួលស្គាល់ ឬមិនទួលស្គាល់គុណភាពវ៉ាក់សាំងនេះនោះទេ។ អ្នកនាំពាក្យក្រសួងសុខាភិបាល អ្នកស្រី ឱ វណ្ណឌីន មានប្រសាសន៍ ក្នុងសន្និសីទសារព័ត៌មាន កាលពីថ្ងៃទី៨ ខែកុម្ភៈថា រឿងដែលត្រូវព្រួយបារម្ភ គឺរឿងដណ្ដើមគ្នាទិញវ៉ាក់សាំងនេះទៅវិញទេ។
អ្នកឃ្លាំមើលសង្គម និងអ្នកជំនាញខ្លះ នៅតែចង់ឱ្យរដ្ឋាភិបាលរង់ចាំអង្គការសុខភាពពិភពលោកទទួលស្គាល់សិន ចាំយកវ៉ាក់សាំងនោះមកចាក់ឱ្យប្រជាពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។