ភ្ញៀវទេសចរជាតិនិងអន្តរជាតិសំណូមពរឲ្យប្រមុខដឹកនាំរដ្ឋាភិបាលកម្ពុជា ជួយអន្តរាគមន៍បើករបងថ្មហ៊ុមព័ទ្ធឆ្នេរសមុទ្រនៅខេត្តព្រះសីហនុ ដែលឈ្មួញនិងក្រុមហ៊ុនបានធ្វើមិនឲ្យមនុស្សដើរឆ្លងកាត់នៅពេលកន្លងមក ដើម្បីឲ្យប្រជាពលរដ្ឋនិងភ្ញៀវទេសចរមានទីធ្លាលំហែកាយបានទូលំទូលាយ។
ភ្ញៀវទេសចរជាតិ-អន្តរជាតិ បានបង្ហាញវត្តមានច្រើននៅតាមឆ្នេរសមុទ្រមួយចំនួននាខេត្តព្រះសីហនុ នៅក្នុងព្រះរាជពិធីចម្រើនព្រះជន្មាយុរបស់ព្រះមហាក្សត្រ ព្រះករុណាព្រះបាទ សម្ដេចព្រះបរមនាថ នរោត្តម សីហមុនី គម្រប់ ៦២ព្រះវស្សា។
ស្របពេលនេះ ភ្ញៀវទេសចរជាតិ និងអន្តរជាតិ ក៏បានសំណូមពរទៅលោកនាយករដ្ឋមន្ត្រី ហ៊ុន សែន ជួយអន្តរាគមន៍បើករបងហ៊ុមព័ទ្ធឆ្នេរសមុទ្រ ផ្ដើមដោយមន្ត្រីមានអំណាច ឬក្រុមហ៊ុនជាដើម ឲ្យបានទូលំទូលាយផ្ដល់ជូនពលរដ្ឋចូលកម្សាន្តឡើងវិញ។ សារអំពាវនាវនេះ កើតឡើងនៅគ្រាប្រមុខដឹកនាំបានអញ្ជើញមកទស្សនាខេត្តព្រះសីហនុ និងស្នាក់នៅផ្ទះលំហែកាយរបស់លោកនៅឆ្នេរអូរឈើទាល នារសៀលថ្ងៃទី១៤ ខែឧសភា។
ភ្ញៀវទេសចរជាតិ ដែលបានទៅជួលតូបលំហែកាយនៅឆ្នេរអូរឈើទាល បានប្រាប់វិទ្យុអាស៊ីសេរីថា ឆ្នេរសមុទ្រខេត្តព្រះសីហនុ ដែលមានសន្តិសុខ មានភ្លើងបំភ្លឺ និងមានអនាម័យ គឺមានតែឆ្នេរអូរឈើទាល មានទីតាំងនៅទល់មុខផ្ទះលោកនាយករដ្ឋមន្ត្រីនេះទេ។ ប៉ុន្តែឆ្នេរក្រៅពីនេះ មិនសូវមានភ្ញៀវទៅកម្សាន្តឡើយ ព្រោះគ្មានភ្លើងបំភ្លឺ ឆ្នេរគ្មានអនាម័យ ពិសេសឆ្នេរភាគច្រើនត្រូវមន្ត្រីមានអំណាច និងក្រុមហ៊ុនធ្វើរបងថ្មហ៊ុមព័ទ្ធមិនឲ្យមនុស្សដើរឆ្លងកាត់នោះទេ។
ផ្ដើមពីបញ្ហានេះ ភ្ញៀវទេសចរ ឬប្រជាពលរដ្ឋដែលបានទៅកម្សាន្តនៅខេត្តព្រះសីហនុ បានសំណូមពរដល់លោកនាយករដ្ឋមន្ត្រី ហ៊ុន សែន ដែលបានធ្វើដំណើរមកខេត្តទេសចរណ៍មួយនេះនារសៀលថ្ងៃទី១៤ ខែឧសភា ស្នើឲ្យជួយបើកឆ្នេរសមុទ្រដែលហ៊ុមព័ទ្ធរបងថ្មដាក់ជូនប្រជាពលរដ្ឋ បានដើរឆ្លងកាត់ ឬចូលទៅកម្សាន្តឲ្យបានទូលំទូលាយ ជាពិសេសត្រូវអភិវឌ្ឍន៍ឆ្នេរទាំងនោះឲ្យមានអនាម័យ មានភ្លើងបំភ្លឺគ្រប់គ្រាន់ និងមានសុវត្ថិភាពល្អ៖ «សំណូមពរឲ្យឆ្នេរដទៃទៀតមានអនាម័យ និងមានសន្តិសុខដូចឆ្នេរអូរឈើទាល ដែរ។ ដូចជា ឆ្នេរសុខា ឬឆ្នេរជិតសណ្ឋាគារ៧ជាន់ ជាដើម ត្រូវអភិវឌ្ឍន៍ឲ្យបានទូលំទូលាយ និងមានអនាម័យ។ ជាងនេះក៏ស្នើជួយទប់ស្កាត់កុំឲ្យតូបអង្គុយ ឬទីកន្លែងលក់ដូរដំឡើងតម្លៃខ្ពស់ហួសហេតុពេក ព្រោះកន្លែងអង្គុយ ១តុ នាឆ្នេរអូរឈើទាល មានតម្លៃ ៤៥ដុល្លារ ហើយផ្ទះសំណាក់តម្លៃគ្រែ ១ថ្ងៃធម្មតា ២០ដុល្លារ ដំឡើងនៅថ្ងៃបុណ្យដល់ ៣៥ដុល្លារ ក្នុងមួយបន្ទប់ និងគ្រែ ២ មានតម្លៃធម្មតា ២៥ដុល្លារក្នុងមួយយប់ ប៉ុន្តែថ្ងៃបុណ្យបានដំឡើងថ្លៃរហូតដល់មានតម្លៃ ៤០ដុល្លារ ក្នុងមួយយប់ គឺខុសគ្នាក្នុង ១បន្ទប់ចំនួន ១៥ដុល្លារ»។
បន្ថែមលើនេះ ភ្ញៀវទេសចរ និងមន្ត្រីសង្គមស៊ីវិល ក៏បានស្នើឲ្យលោកនាយករដ្ឋមន្ត្រី ហ៊ុន សែន ពិនិត្យ ឬធ្វើដំណើរតាមឆ្នេរសមុទ្រនានា នៅខេត្តព្រះសីហនុ នឹងឃើញឆ្នេរភាគច្រើន ត្រូវឈ្មួញ ឬក្រុមហ៊ុនបិទរបងថ្ម មិនឲ្យភ្ញៀវទេសចរដើរឆ្លងកាត់ ឬចូលទៅកម្សាន្តទេ មានដូចជាឆ្នេរឯករាជ្យ ឬឆ្នេរអតីតក្រុមហ៊ុនអារីស្តុន មានទីតាំងនៅជិតផ្ទះលំហែកាយរបស់ប្រមុខដឹកនាំជាដើម គឺត្រូវក្រុមហ៊ុនសុខា ធ្វើរបងថ្មហ៊ុមព័ទ្ធមិនឲ្យមនុស្សដើរឆ្លងកាត់ទេ។
ត្រង់ចំណុចនេះ លោក ប៊ួន ណារិទ្ធ មន្ត្រីសម្របសម្រួលអង្គការលីកាដូ ប្រចាំខេត្តព្រះសីហនុ បានទទួលស្គាល់ថា ឆ្នេរសមុទ្រដែលមានសន្តិសុខ និងសោភណ្ឌភាព គឺមានតែនៅឆ្នេរអូរឈើទាល ទល់មុខផ្ទះលំហែកាយរបស់លោកនាយករដ្ឋមន្ត្រីមួយទេ។ ប៉ុន្តែឆ្នេរក្រៅពីនេះ ត្រូវវិនិយោគទៅឲ្យក្រុមហ៊ុន ឬឈ្មួញ បានធ្វើរបងថ្មហ៊ុមព័ទ្ធដីចំណីឆ្នេរធ្វើកម្មសិទ្ធិស្ទើរទាំងស្រុងអស់ទៅហើយ។
មន្ត្រីសិទ្ធិមនុស្សរូបនេះ បានស្នើដល់ប្រមុខដឹកនាំពិចារណាបើកឆ្នេរ ឬអភិវឌ្ឍន៍ឆ្នេរសមុទ្រនាខេត្តព្រះសីហនុ ឲ្យបានទូលំទូលាយនៅក្នុងដំណើរទស្សនកិច្ចមកកាន់ខេត្តនេះ នៅថ្ងៃទី១៤ ខែឧសភា ព្រោះឆ្នេរភាគច្រើនត្រូវមន្ត្រីមានអំណាច និងឈ្មួញមានទ្រព្យធនព័ទ្ធរបងថ្មធ្វើកម្មសិទ្ធិស្ទើរទាំងស្រុង៖ «ខ្ញុំធ្លាប់សំណូមពរជាច្រើនលើកច្រើនសារួចមកហើយ គឺថា ខេត្តនេះ ជាខេត្តមួយមានភ្ញៀវទេសចរចេញចូលមកទស្សនា ឬមកងូតទឹកកម្សាន្ត។ ប៉ុន្តែបើឆ្នេរសមុទ្រនៅខេត្តព្រះសីហនុ បានចាក់របងថ្មបិទជាប់ ឬចាក់ដីលុប ហើយធ្វើរបងថ្មជាប់ដល់សមុទ្រ និងបង្ហូរទឹកស្អុយចូលសមុទ្រ គឺមិនមែនជាយុត្តិសាស្ត្រទាក់ទាញភ្ញៀវទេសចរទេ។ ប៉ុន្តែផ្ទុយទៅវិញ ជាបញ្ហាមួយដែលជំរុញឲ្យភ្ញៀវទេសចរងាកទៅរកប្រទេសផ្សេងទៀត មានវៀតណាម និងថៃ ជាដើម»។
ទោះយ៉ាងណា ការទន្ទឹងរង់ចាំជួបលោកនាយករដ្ឋមន្ត្រី ហ៊ុន សែន របស់ប្រជាពលរដ្ឋ និងភ្ញៀវទេសចរ ដែលបានមកកម្សាន្តនៅខេត្តព្រះសីហនុ មិនទាន់មានឱកាសជួបផ្ទាល់ស្នើឲ្យបើកឆ្នេរសមុទ្រ ដែលហ៊ុមព័ទ្ធដោយរបងថ្មជាមួយប្រមុខដឹកនាំទេ ព្រោះសន្តិសុខត្រូវបានរឹតបន្តឹង ទាំងលើដីគោក និងក្នុងលំហសមុទ្រ។ វិធានការការពារសន្តិសុខជូនប្រមុខដឹកនាំនៅលើដីគោក មានកម្លាំងកងរាជអាវុធហត្ថ និងកម្លាំងនគរបាល ត្រូវបានដាក់ពង្រាយនៅគ្រប់ច្រកល្ហក ជាពិសេសនៅក្នុងលំហសមុទ្រ ក៏ឃើញមាននាវា ឬម៉ារីនល្បាត របស់កងទ័ពជើងទឹក និងនាវាល្បាត ២គ្រឿង របស់អង្គភាពបង្ក្រាបបទល្មើសលើផ្ទៃសមុទ្រ បានចេញល្បាតនៅមុខផ្ទះប្រមុខដឹកនាំ នាឆ្នេរអូរឈើទាល រង់ចាំការពារសន្តិសុខសុវត្ថិភាព ជូនប្រមុខដឹកនាំដោយយកចិត្តទុកដាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។