ក្រសួងមហាផ្ទៃចាប់ផ្ដើមធ្វើជំរឿនជនអន្តោប្រវេសន៍វៀតណាម ដែលកំពុងរស់នៅក្នុងប្រទេសកម្ពុជា ដើម្បីធានាថា ពួកគេរស់នៅស្របច្បាប់ និងបង់ពន្ធជូនរដ្ឋតាមច្បាប់។ ជំរឿនថ្មីនេះ ធ្វើឡើងបន្ទាប់ពីគណបក្សសង្គ្រោះជាតិ បានដាក់សំណើទៅក្រសួងមហាផ្ទៃ ឲ្យពិនិត្យឡើងវិញនូវស្ថិតិជនអន្តោប្រវេសន៍វៀតណាម ពិតប្រាកដនៅកម្ពុជា។
ស្នងការប៉ូលិសខេត្តពោធិ៍សាត់ លោក សារុន ចន្ទី បញ្ជាក់ថា នៅថ្ងៃពុធ ទី២៧ សីហា ប៉ូលិសខេត្តនឹងបើកកិច្ចប្រជុំដើម្បីរៀបចំផែនការធ្វើជំរឿនជនអន្តោប្រវេសន៍វៀតណាម ក្រោយពីមានការណែនាំរបស់ក្រសួងមហាផ្ទៃ រួចមក។ លោកបន្ថែមទៀតថា ជនអន្តោប្រវេសន៍វៀតណាម ប្រមាណ ៦០០គ្រួសារ មានចំនួនប្រមាណ ១ពាន់នាក់ កំពុងស្នាក់នៅក្នុងខេត្តពោធិ៍សាត់។
លោក សារុន ចន្ទី អះអាងថា ដំណើរការជំរឿននេះ បន្ទាប់ពីនាយកនៃអគ្គនាយកដ្ឋានជនអន្តោប្រវេសន៍ក្រសួងមហាផ្ទៃ លោក សុខ ផល កាលពីដើមសប្តាហ៍នេះ បានចុះទៅពិនិត្យស្ថានភាពជនអន្តោប្រវេសន៍វៀតណាម រស់នៅលើបឹងទន្លេសាបនៅក្នុងខេត្តពោធិ៍សាត់៖ «យើងនឹងដំណើរការធ្វើលើកនេះ យើងនឹងធ្វើដើម្បីពិនិត្យការស្នាក់នៅរបស់គាត់ ការរស់នៅតើគាត់មានឯកសារ ឬនៅស្របច្បាប់ឬនៅ?»។
កាលពីខែកក្កដា និងដើមខែសីហា ក្រសួងមហាផ្ទៃ បានផ្តល់ប័ណ្ណទទួលស្គាល់ជាជនអន្តោប្រវេសន៍ទៅឲ្យជនអន្តោប្រវេសន៍វៀតណាម ចំនួនជាង ៤០០នាក់ ប៉ុន្តែអ្នកទាំងនោះមិនទាន់មានសិទ្ធិរស់នៅស្របច្បាប់ឡើយ លុះត្រាតែពួកគេទទួលបានលិខិតរស់នៅស្របច្បាប់សម្រាប់រយៈពេល ២ឆ្នាំ និងបង់ពន្ធ ២៥ម៉ឺនរៀលជូនរដ្ឋ។ អ្នកទាំងនោះ ត្រូវធ្វើឯកសារជាថ្មីក្នុងរយៈពេលពីរឆ្នាំ។ ទោះបីជាយ៉ាងណាក៏ដោយ លោក សារុន ចន្ទី បញ្ជក់ថា លោកមិនទាន់បានដឹងថា ក្រសួងមហាផ្ទៃ នឹងចាត់វិធានការយ៉ាងណាចំពោះជនអន្តោប្រវេសន៍វៀតណាម ដែលមិនមានឯកសាររស់នៅក្នុងកម្ពុជា ស្របច្បាប់នៅឡើយទេ។
ប្រធានអង្គការការពារសិទ្ធិជនជាតិភាគតិច លោក អាង ចន្ទរិទ្ធ កាលពីថ្ងៃទីអង្គារ ទី២៦ សីហា ស្វាគមន៍ការធ្វើជំរឿនថ្មីទៅលើជនអន្តោប្រវេសន៍វៀតណាម ព្រោះថា ជំរឿននេះនឹងផ្តល់ប្រយោជន៍ដល់ជនអន្តោប្រវេសន៍វៀតណាមផង និងរដ្ឋាភិបាលផង៖ «មានប្រយោជន៍ដល់ប្រទេសជាតិច្រើន ប្រសិនបើគាត់ធ្វើដោយឯករាជ្យ ដោយឈរលើតាមផ្លូវច្បាប់ ហើយមានការចូលរួមតាមគ្រប់ភាគីពាក់ព័ន្ធ មិនត្រូវធ្វើតែដោយរដ្ឋាភិបាលទេ គឺអត់បង្ហាញជំហរឯករាជ្យ និងជឿទុកចិត្តបានទេ»។
របាយការណ៍អង្គការការពារសិទ្ធិជនជាតិភាគតិចស្ដីពីជនអន្តោប្រវេសន៍រស់នៅលើភូមិបណ្ដែតទឹក នៅលើបឹងទន្លេសាប នៅខេត្តកំពង់ឆ្នាំង ផ្សាយកាលពីថ្ងៃមីនា ឆ្នាំ២០១៤ រកឃើញថា ជនអន្តោប្រវេសន៍វៀតណាម កំពុងជួបផលលំបាកទាំងសេដ្ឋកិច្ច និងរងការរំលោភសិទ្ធិមនុស្ស។
របាយការណ៍ដែលមានចំណងជើងថា «មនុស្សតែលតោលនៅលើពិភពលោក (Limbo on Earth)» ដែលបានសិក្សាទៅលើជនអន្តោប្រវេសន៍វៀតណាម ចំនួនប្រមាណ ៥ពាន់នាក់ រស់នៅក្នុងឃុំផ្សារឆ្នាំង នៅខេត្តកំពង់ឆ្នាំង បង្ហាញថា ជនអន្តោប្រវេសន៍ទាំងនោះបានបាត់បង់សិទ្ធិជាពលរដ្ឋ។
ជនអន្តោប្រវេសន៍វៀតណាម ទាំងនោះ ដែលមួយចំនួនបានកើត និងរស់នៅកម្ពុជា ចាត់ទុកប្រទេសកម្ពុជា ដូចជាប្រទេសដើមកំណើតរបស់ខ្លួន ប៉ុន្តែពួកគេបាត់បង់ទាំងស្រុងនូវសិទ្ធិទទួលបានការអប់រំ សេដ្ឋកិច្ចសង្គម និងនយោបាយ។
ទោះបីជាយ៉ាងក៏ដោយ ស្នងការប៉ូលិសខេត្តពោធិ៍សាត់ លោក សារុន ចន្ទី បញ្ជាក់ថា ជនអន្តោប្រវេសន៍វៀតណាម ដែលប្រកបមុខរបរនៅខេត្ត អាចបង្កផលប៉ះពាល់ដល់ជីវភាពពលរកខ្មែរ។ លោកថា ជនអន្តោប្រវេសន៍វៀតណាម ត្រូវមានកាតព្វកិច្ចបង់ពន្ធជូនរដ្ឋ ប្រសិនបើពួកគេស្នាក់នៅកម្ពុជា៖ «ធម្មតាវាប៉ះពាល់ហើយ ឧបរមាថា គាត់មករស់នៅគាត់ត្រូវរកស៊ី គាត់ត្រូវអ្វីប៉ះពាល់ដល់ការរកស៊ីរបស់អ្នកស្រុក និងអ្នកភូមិយើងហើយ»។
លោក អាង ចន្ទរិទ្ធ អះអាងផ្ទុយទៅនឹងលោក សារុន ចន្ទី ដែលបានលើកឡើងថា ជនជាតិវៀតណាម នៅខេត្តពោធិ៍សាត់ មានចំនួន ១ពាន់នាក់។ លោកថា តាមការសិក្សារបស់អង្គការបញ្ជាក់ជនជាតិវៀតណាម រស់នៅខេត្តពោធិ៍សាត់ មានច្រើនពាន់នាក់។ បច្ចុប្បន្ននេះជនជាតិវៀតណាម ជាច្រើនបានប្រមូលផ្តុំគ្នារស់នៅតាមខេត្តរាជធានីសំខាន់ៗដូចជារាជធានីភ្នំពេញ ខេត្តបាត់ដំបង សៀមរាប កំពង់ឆ្នាំង និងពោធិ៍សាត់។ ជនអន្តោប្រវេសន៍វៀតណាម ទាំងនោះ ភាគច្រើនមិនមានឯកសាររស់នៅស្របច្បាប់ឡើយ។
បច្ចុប្បន្ននេះ ជនអន្តោប្រវេសន៍វៀតណាម នៅកម្ពុជា ទាំងស្របនិងមិនស្របច្បាប់ នៅមិនទាន់មានតួលេខពិតប្រាកដ បញ្ជាក់ពីចំនួននៃជនអន្តោប្រវេសន៍វៀតណាមឡើយ ក៏ប៉ុន្តែលោក ហ៊ុន សែន ធ្លាប់ប្រកាសថា តួលេខជនអន្តោប្រវេសន៍វៀតណាម នៅកម្ពុជា មានជាង ១០ម៉ឺននាក់។
លោក សម រង្ស៊ី ប្រធានគណបក្សសង្គ្រោះជាតិ កាលពីពេលថ្មីៗនេះ បញ្ជាក់ថា ប្រសិនបើលោកដឹកនាំប្រទេស លោកនឹងផ្ដល់សញ្ជាតិឲ្យជនអន្តោប្រវេសន៍វៀតណាម ដើមកំណើតកម្ពុជា។ លោក សម រង្ស៊ី អះអាងថា ជនអន្តោប្រវេសន៍វៀតណាម រស់នៅកម្ពុជាបច្ចុប្បន្ន ប្រមាណ ៥សែននាក់ ក្នុងនោះមានប្រមាណជាងពាក់កណ្ដាល អាចបំពេញបានលក្ខខណ្ឌច្បាប់ដើម្បីក្លាយជាពលរដ្ឋកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។