លោក ជា មុនី ប្រធានសហជីពសេរីកម្មករ និងជាប្អូនប្រុសរបស់លោក ជា វិជ្ជា ថ្លែងថា លោកត្រេកអរចំពោះការដោះលែងមនុស្សដែលពុំមានទោស ប៉ុន្តែលោកក៏ចង់ឃើញឃាតករពិតនិងអ្នកបញ្ជានៅពីក្រោយខ្នងឃាតកម្មនោះផងដែរ។
លោក ជា មុនី មានប្រសាសន៍ដូច្នេះថា ៖ «ជាទូទៅ យើងចង់បានឃាតករ តើគាត់បាញ់ដោយហេតុផលនយោបាយ ឬបាញ់ដោយសារគំនុំ ប៉ុន្តែលោក ជា វិជ្ជា មិនមានគំនុំទេ។ អ៊ីចឹង សម្រាប់យើងខ្ញុំដែលជាក្រុមគ្រួសាររបស់លោក ជា វិជ្ជា យើងចង់ឃើញថា ហេតុអ្វីបានជាឃាតករមកបាញ់លោក ជា វិជ្ជា»។
ភារធារីស្ថានទូតអាមេរិកប្រចាំកម្ពុជា អ្នកស្រី Piper Campbell មានប្រសាសន៍ថា ការសម្រេចចិត្តឲ្យអ្នកទាំងពីរនៅក្រៅឃុំបណ្តោះអាសន្ន ហើយបង្វែរករណីនេះត្រឡប់ទៅឲ្យសាលាឧទ្ធរណ៍ដើម្បីពិនិត្យឡើងវិញ គឺជាវិធីល្អប្រសើរមួយសម្រាប់ការឈានមកដល់នៃឆ្នាំថ្មីនេះ។
ប៊ន សំណាង និង សុខ សំអឿន ត្រូវបានតុលាការដំបូងកាត់ទោសឲ្យជាប់គុកចំនួន ២០ឆ្នាំ ក្នុងករណីសង្ស័យសម្លាប់លោក ជា វិជ្ជា អតីតមេដឹកនាំសហជីពសេរីកម្មករ កាលពីខែមករា ឆ្នាំ២០០៤។
រយៈពេលជិត៦ឆ្នាំមកហើយ ប៊ន សំណាង និង សុខ សំអឿន ត្រូវបានគេឃុំខ្លួននៅក្នុងពន្ធនាគារ បើទោះបីជាសាក្សីឈ្មោះ វ៉ា សុធី ដែលបច្ចុប្បន្នកំពុងរស់នៅសហរដ្ឋអាមេរិក បានអះអាងថា អ្នកទាំងពីរមិនមែនជាឃាតករពិតប្រាកដក៏ដោយ។
រហូតមកដល់ថ្ងៃ២៨ ខែធ្នូ កន្លងទៅ អង្គការការពារសិទ្ធិមនុស្សអន្តរជាតិ ឈ្មោះ Human Rihgts Watch បានអំពាវនាវឲ្យតុលាការដោះលែងអ្នកទាំងពីរនោះ។
មន្រ្តីគណៈកម្មការប្រព្រឹត្តិកម្មដែលមានតំណាងអង្គការសិទ្ធិមនុស្សនិងសង្គមស៊ីវិល ១៨អង្គការជាសមាជិក លោក ចាន់ សូវ៉េត អត្ថាធិប្បាយថា ទោះបីជាមានការដោះលែង ប៊ន សំណាង និង សុខ សំអឿន ក៏ដោយ គេនៅតែបារម្ភចំពោះបញ្ហានេះនៅឡើយទេ ៖ «ជុំវិញបញ្ហាហ្នឹង សង្គមស៊ីវិលយើង គណៈកម្មការប្រព្រឹត្តិកម្ម ក៏នៅតែមានការព្រួយបារម្ភដែរ។ ប្រសិនបើអ្នកទាំងពីរត្រូវបានដោះលែង ឬនៅពេលជំនុំជម្រះទោសនាពេលខាងមុខ អាចថានឹងជាប់ទោសវិញ ឬយ៉ាងណានោះ ក៏យើងខ្ញុំខាងសង្គមស៊ីវិលនៅតែមានការតាមដាននិងបន្តគាំទ្រលើអ្វីដែលជាភាពពិតនិងយុត្តិធម៌»។
ចំណែកប្រធានអង្គការក្រុមអ្នកច្បាប់ការពារសិទ្ធិកម្ពុជាវិញ លោក សុក សំអឿន ថ្លែងថា ការដោះលែង ប៊ន សំណាង និង សុខ សំអឿន បាននាំឲ្យលោកភ្ញាក់ផ្អើលដោយគេកម្រឃើញប្រធានតុលាការកំពូលចូលរួមជំនុំជម្រះរឿងធំៗដូច្នេះណាស់។ ប៉ុន្តែលោកនៅតែគ្មានជំនឿថា គេអាចរកឃើញមុខឃាតករពិតក្នុងករណីសម្លាប់ ជា វិជ្ជា នោះឡើយ។
លោក សុក សំអឿន មានប្រសាសន៍យ៉ាងដូច្នេះថា ៖ «ខ្ញុំមានការចាប់អារម្មណ៍ដែរ ព្រោះខ្ញុំក្នុងករណីធំៗអ៊ីចឹង កម្រឃើញប្រធានតុលាការចូលរួមណាស់។ អ៊ីចឹង ខ្ញុំគិតថា ប្រហែលជាលោកប្រធានតុលាការកំពូលគាត់ចាប់ផ្ដើមគិតថាចង់កែទម្រង់ប្រព័ន្ធតុលាការ ឬយ៉ាងណា។ នេះយើងមិនទាន់ដឹងយ៉ាងម៉េចទេ ព្រោះវាយូរឆ្នាំណាស់ហើយ វាអាចរកមិនឃើញ។ បើគេរកឃើញ គេរកឃើញយូរហើយ។ នេះដោយសាររកមិនឃើញអ៊ីចឹងហើយ ដើម្បីលាងកេរ្តិ៍ឈ្មោះ ឬកុំឲ្យមេស្ដីឲ្យ លោក ហេង ពៅ ទៅជាប្រឌិតរឿងផ្ដេសផ្ដាសអ៊ីចឹងទៅ»។
ប្រធានសមាគមគ្រូបង្រៀនកម្ពុជាឯករាជ លោក រ៉ុង ឈុន បន្ថែមថា គេមានជំនឿថា ប៊ន សំណាង និង សុខ សំអឿន នោះ មិនមែនជាឃាតករពិតទេ ដូច្នេះជាមួយគ្នានឹងការដោះលែងនេះ លោកនៅតែជំរុញឲ្យអាជ្ញាធរក្រុងភ្នំពេញ បន្តការរកមុខឃាតករឲ្យបានឆាប់ ជៀសវាងការអូសបន្លាយពេលយូរអង្វែង។
លោក រ៉ុង ឈុន ថ្លែងដូច្នេះថា ៖ «គេមិនត្រូវឲ្យពេលវេលាអូសបន្លាយ ហើយក៏យើងមិនចង់ឃើញឲ្យមាននិទណ្ឌភាពនៅកម្ពុជាចេះតែបន្តទៅទៀតទេ»។
អ្នកនាំពាក្យក្រសួងមហាផ្ទៃវិញ លោកឧត្តមសេនីយ៍ ខៀវ សុភ័គ បានអះអាងថា ប៉ូលិសកំពុងរង់ចាំបញ្ជាជាថ្មីរបស់តុលាការក្នុងការបើកការស៊ើបអង្កេត ៖ «តុលាការមិនទាន់ណែនាំ ឬចេញសាលក្រមថា បដិសេធចោលជននោះថាមិនមែនមានទោសឯណា គ្រាន់តែដោះលែងឲ្យនៅក្រៅឃុំជាបណ្ដោះអាសន្ន ...ហើយបើថា [តុលាការ]ថា ចាប់ហ្នឹងមិនត្រឹមត្រូវទេ ឯកសារមិនគ្រប់ នោះយើងនឹងបើកការស៊ើបអង្កេតបន្តទៀតទៅ»។
គួរជម្រាបជូនថា អតីតស្នងការប៉ូលិសក្រុងភ្នំពេញ លោក ហេងពៅ ធ្លាប់បានអះអាងនៅមុននឹងលោកត្រូវបានគេចាប់ឃុំឃាំង កាលពីឆ្នាំ២០០៧ កន្លងទៅ ថា ឃាតកម្មលើអតីតប្រធានសហជីពសេរីកម្មករ លោក ជា វិជ្ជា ត្រូវបានធ្វើឡើងដោយមនុស្សពីរនាក់ រៀបចំដោយលោក ហុក ឡងឌី ដែលជាអគ្គស្នងការប៉ូលិសជាតិ។ ប៉ុន្តែមកដល់ពេលនេះ ពុំទាន់មានប្រភពឯករាជ្យណាមួយអះអាងថា ការចោទប្រកាន់ដូច្នេះ ពិត ឬមិនពិតឡើយ៕