មនុស្សទី៦ ជាអ្នកផ្ទុកមេរោគអេដស៍នៅឃុំរកា ខេត្តបាត់ដំបង បានស្លាប់នៅរសៀលថ្ងៃទី៧ មីនា ឆ្នាំ២០១៥។ អ្នកផ្ទុកមេរោគអេដស៍នោះ ឈ្មោះ លោក ទឹម តូយ អាយុ ៦៩ឆ្នាំ នៅភូមិរកា ឃុំរកា ស្រុកសង្កែ ជាមនុស្សម្នាក់ក្នុងចំណោមអ្នកផ្ទុកមេរោគអេដស៍ជាង ២០០នាក់។
កូនស្រីនៃសព គឺអ្នកស្រី តូយ សុភី ថ្លែងថា ឪពុករបស់អ្នកស្រីធ្លាក់ខ្លួនឈឺធ្ងន់ប្រមាណ ១ខែមកហើយ ដោយរយៈមួយខែនេះធ្លាប់ទៅសម្រាកព្យាបាលជំងឺរបេងនៅមន្ទីរពេទ្យបង្អែកខេត្តបាត់ដំបង ចំនួន ២លើក ប៉ុន្តែមិនបានធូរស្រាលទេ។
អ្នកស្រីបន្តថា ដោយជំងឺកាន់តែធ្ងន់ទៅ ក្រោយមកសាច់ញាតិក៏នាំឪពុកត្រឡប់មកផ្ទះវិញបានប្រមាណ ១០ថ្ងៃក៏ស្លាប់តែម្ដង គឺក្រោយពីធ្វើតេស្តឈាមនៅមណ្ឌលសុខភាពរកា ហើយឃើញមានមេរោគអេដស៍កាលពីថ្ងៃទី២២ ធ្នូ ឆ្នាំ២០១៤៖ «គម្រោងថាដើរអញ្ជើញភ្ញៀវធ្វើសង្ឃទាន តែទៅដល់ពាក់កណ្ដាលផ្លូវមានគេទូរស័ព្ទថាឪពុកស្លាប់ ក៏ត្រឡប់មកវិញ។ មុនដំបូងគាត់មានជំងឺឈាមសហើយខ្វះជាតិកាល់ស្យូម និងមានរោគសួត ប៉ុន្តែគាត់លេបថ្នាំហើយអាចដើរជាធម្មតាទេ។ ក្រោយពីទៅជោះឈាមមានមេរោគអេដស៍ ក៏ធ្លាក់ខ្លួនឈឺរហូតមក»។
សៀវភៅតាមដានសុខភាពអ្នកមេរោគអេដស៍របស់មន្ទីរពេទ្យខេត្តបាត់ដំបង ឲ្យដឹងថា កន្លងមកអ្នកស្លាប់ធ្លាប់ទៅព្យាបាលជំងឺរបេងនៅមន្ទីរពេទ្យខេត្តលើកដំបូងនៅថ្ងៃ១៩ មករា ឆ្នាំ២០១៥ ក្រោយមកក៏ទៅជួបគ្រូពេទ្យជាបន្តបន្ទាប់រហូតដល់ថ្ងៃស្លាប់។ រហូតមកទល់ពេលនេះ អ្នកផ្ទុកមេរោគអេដស៍នៅឃុំរកា បានស្លាប់កើនឡើងដល់ចំនួន ៦នាក់ហើយ គឺមានមនុស្សចាស់ ៥នាក់ និងទារកអាយុ ៧ខែម្នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។