ក្រសួងសុខាភិបាល បានសម្រេចបិទមន្ទីរសម្រាកព្យាបាលជំងឺឯកជនមួយឈ្មោះ ឃឹម រ៉ានី នៅរាជធានីភ្នំពេញ បន្ទាប់ពីបានចាក់ថ្នាំបណ្ដាលឲ្យយុវជនម្នាក់ស្លាប់ និងមិនគោរពតាមការណែនាំរបស់ក្រសួងសុខាភិបាល។
សេចក្ដីសម្រេចរបស់ក្រសួងសុខាភិបាល ដែលចុះហត្ថលេខាដោយរដ្ឋមន្ត្រីក្រសួងសុខាភិបាល លោក ម៉ម ប៊ុនហេង ចេញប្រកាសនៅថ្ងៃទី២៣ ខែឧសភា បានឲ្យដឹងថា មន្ទីរសម្រាកព្យាបាល ឃឹម រ៉ានី នេះមានទីតាំងនៅផ្ទះលេខ១៤ ផ្លូវលេខ៣១៥ សង្កាត់បឹងកក់១ ខណ្ឌទួលគោក រាជធានីភ្នំពេញ។ មូលហេតុនៃការបិទនេះ ក្រសួងបញ្ជាក់ថា ដោយសារមន្ទីរសម្រាកព្យាបាលនេះ បានបង្កឲ្យមានបញ្ហាជាច្រើនលើកច្រើនសា មិនគោរពតាមកិច្ចសន្យារបស់ខ្លួននៅពេលដាក់ពាក្យស្នើសុំបើកមន្ទីរសម្រាកព្យាបាល និងមិនគោរពតាមការណែនាំរបស់ក្រសួងសុខាភិបាល។
សារព័ត៌មានក្នុងស្រុក បានចុះផ្សាយថា កាលពីថ្ងៃទី២២ ខែឧសភា មានបុរសវ័យ ២៨ឆ្នាំម្នាក់ឈ្មោះ ឡាំ តៅគង់ មានទីលំនៅផ្ទះលេខ៥២សេ ផ្លូវលេខ២០៩ សង្កាត់ច្រាំងចំរេះទី១ ខណ្ឌឫស្សីកែវ ជាបុគ្គលិកក្រុមហ៊ុនប្រេងឥន្ធនៈសាវីម៉ិច មានអាការៈមិនស្រួលខ្លួនចេះតែឈឺខ្នង ហើយមិត្តភ័ក្ដិបាននាំទៅចាក់ថ្នាំនៅគ្លីនិក ឃឹម រ៉ានី នោះ។ សេចក្ដីរាយការណ៍ឲ្យដឹងទៀតថា បន្ទាប់ពីចាក់ថ្នាំចំនួន ២ម្ជុលបានតែបន្តិច ស្រាប់តែជនរងគ្រោះប្រកាច់បែកពពុះមាត់។ ពេលនោះស្រាប់តែបុគ្គលិកពេទ្យឲ្យមិត្តភ័ក្ដិទៅផ្ដិតមេដៃនៅលើក្រដាស រួចឲ្យប្រញាប់ដឹកទៅមន្ទីរពេទ្យកាល់ម៉ែត តែពេលទៅដល់ ស្រាប់តែគ្រូពេទ្យនៅមន្ទីរពេទ្យកាល់ម៉ែត ថាជនរងគ្រោះបានស្លាប់បាត់ទៅហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។