បញ្ហាគ្រឿងញៀន កំពុងក្លាយជាក្ដីកង្វល់ខ្លាំងនៅក្នុងសង្គមកម្ពុជា បច្ចុប្បន្ន។ នៅក្នុងទិវាប្រយុទ្ធប្រឆាំងការផលិត ការចរាចរ និងការប្រើប្រាស់គ្រឿងញៀនអន្តរជាតិនៅរាជធានីភ្នំពេញ ថ្ងៃទី២៦ មិថុនា មន្ត្រីពាក់ព័ន្ធឲ្យដឹងថា ករណីប្រើប្រាស់ និងជួញដូរគ្រឿងញៀនកំពុងកើនឡើង។
ទាំងមន្ត្រីថ្នាក់ជាតិ និងមន្ត្រីថ្នាក់រាជធានីភ្នំពេញ បង្ហាញរបាយការណ៍ថា ចំនួនអ្នកប្រើប្រាស់ និងជួញដូរគ្រឿងញៀនបានកើនឡើងខ្ពស់ ដែលគួរឲ្យបារម្ភពីការប្រឈមមុខខ្លាំងចំពោះការដោះស្រាយ។
ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ថ្លែងថា អ្នកប្រើប្រាស់ និងជួញដូរគ្រឿងញៀនក្នុងរយៈពេល ៦ខែនៅដើមឆ្នាំ២០១៦ នេះ មានចំនួនកើនឡើងជាង ៨ពាន់នាក់ (៨.៤០០នាក់)៖ « ការប្រឈមនឹង គ្រឿងញៀន យើងឃើញហើយ ការចាប់ចងតាមច្បាប់ កាលពីឆ្នាំមុនជាង ៧ពាន់នាក់។ ឥឡូវកើន ឆ្នាំ២០១៦ នេះ កើន ១២០ % ជិត ១៣០ % ហើយការ ប្រឈមនឹងមណ្ឌលបណ្ដោះអាសន្ន បើយើងចាប់កាន់តែច្រើន យើងត្រូវមានកន្លែងទុកដាក់ឲ្យសមរម្យ ។ ប៉ុន្តែយើងប្រឈមកន្លែង ទុកដាក់ វាមិនសូវបានគត់មត់ល្អ ហើយមិនសូវរលូន » ។
ការថ្លែងរបស់លោក កែ គឹមយ៉ាន គឺស្របពេលដែលគណៈកម្មការដុតបំផ្លាញគ្រឿងញៀន សម្រេចដុតបំផ្លាញចោលគ្រឿងញៀនជាង ១តោនកន្លះ (១.៥៦៤,១០៥គីឡូក្រាម) នៅថ្ងៃទី២៦ មិថុនា។
ប្រធានគណៈកម្មការដុតបំផ្លាញគ្រឿងញៀន លោក សៀង សុខ ជាព្រះរាជអាជ្ញាសាលាដំបូងរាជធានីភ្នំពេញ មានប្រសាសន៍ថា គ្រឿងញៀនដែលត្រូវដុតបំផ្លាញចោលនេះ គឺជាគ្រឿងញៀនបង្ក្រាបបានក្នុងសំណុំរឿងព្រហ្មទណ្ឌចំនួន ៣ករណីនៅពេលកន្លងមក។ អាជ្ញាធររឹបអូសបានទាំងសារធាតុញៀន និងឧបករណ៍ដែលផលិតគ្រឿងញៀនទាំងនេះ។ សារធាតុញៀនក្នុង ៣ករណីនេះ មានប្រភេទមេតំហ្វេតាមីន ហេរ៉ូអ៊ីន និងកញ្ឆា៖ «សារធាតុញៀនប្រភេទមេតំហ្វេតាមីន ទម្ងន់ ៦៧ , ៤១គីឡូក្រាម សារធាតុញៀនប្រភេទហេរ៉ូអ៊ីន ទម្ងន់ ៣៤៥ , ៣២គីឡូក្រាម សារធាតុញៀនប្រភេទកញ្ឆាស្ងួតទម្ងន់ ១ . ៤៩៤ , ៨៥គីឡូក្រាម សារធាតុប្រភេទប្រេងកញ្ឆាទម្ងន់ ១ , ៥គីឡូក្រាម » ។
របាយការណ៍របស់មន្ត្រីសាលារាជធានីភ្នំពេញបង្ហាញថា រាជធានីភ្នំពេញបានរងឥទ្ធិពលពីការចរាចរគ្រឿងញៀនទាំងក្នុង និងក្រៅតំបន់ ហើយបានបង្កឲ្យមានបញ្ហាស្មុគស្មាញផ្នែកសន្តិសុខ សណ្ដាប់ធ្នាប់ និងការអភិវឌ្ឍសង្គម ក្នុងនោះមានប្រជាពលរដ្ឋ និងយុវជនមួយចំនួនបានធ្លាក់ខ្លួនទៅជាអ្នកប្រើ និងញៀនគ្រឿងញៀន ដែលជាហេតុបង្កឲ្យមានអំពើហិង្សា ការបំផ្លាញទ្រព្យសម្បត្តិ ហើយធ្វើឲ្យមានបន្ទុកធ្ងន់ធ្ងរដល់គ្រួសារ និងសហគមន៍ត្រូវដោះស្រាយ។
អតីតអ្នកប្រើប្រាស់គ្រឿងញៀនវ័យ ១៩ឆ្នាំមួយរូប ដែលបានព្យាបាលផ្ដាច់គ្រឿងញៀននៅមណ្ឌលឱកាសខ្ញុំ គឺយុវជន រ៉ា យសសំណាង ឡើងថ្លែងពីបទពិសោធន៍ថា ថ្នាំញៀនបានបំផ្លាញសុភមង្គលគ្រួសាររបស់ប្អូន៖ «ខ្ញុំបាទបានធ្លាក់ខ្លួនប្រើប្រាស់ គ្រឿងញៀន បោះបង់ការសិក្សា ហើយបានក្លាយខ្លួនជាអ្នកញៀនគ្រឿងញៀន ។ ពេលនោះ ខ្ញុំតែងតែមានអារម្មណ៍ មួហ្មង ប្រព្រឹត្តតែអំពើហិង្សា បំផ្លាញ ទ្រព្យសម្បត្តិ របស់អ្នក ម្ដាយដែល ជាស្ត្រីមេម៉ាយ ដើម្បីបានលុយទៅប្រើប្រាស់ គ្រឿងញៀន ជាមួយមិត្តភ័ក្ដិមិនល្អ។ រត់ចេញពីផ្ទះ ធ្វើឲ្យអ្នកម្ដាយខ្ញុំបាទពិបាកចិត្តស្រែកយំរាល់ថ្ងៃ»។
អ្នកញៀនគ្រឿងញៀននៅកម្ពុជា ត្រូវបានរដ្ឋាភិបាលចាត់ទុកថាជាជនរងគ្រោះ ហើយត្រូវការការព្យាបាល។
ប្រធានអាជ្ញាធរជាតិប្រយុទ្ធប្រឆាំងគ្រឿងញៀន លោក កែ គឹមយ៉ាន ឲ្យដឹងថា បច្ចុប្បន្ននេះមានមន្ទីរពេទ្យព្យាបាលអ្នកញៀនគ្រឿងញៀនចំនួន ១៧០កន្លែងនៅទូទាំងប្រទេស។ នៅភ្នំពេញមាន ២១កន្លែង។ ទោះបីជាយ៉ាងនេះក្ដី លោកថាយន្តការនៃការព្យាបាលមិនដំណើរការល្អទេ ព្រោះពលរដ្ឋមិនទាន់ស្គាល់កន្លែងព្យាបាល និងខ្វះការលើកទឹកចិត្ត។ លោកសុំឲ្យមានការបង្កើតគណៈកម្មការតាមអាជ្ញាធរឃុំ-សង្កាត់ដើម្បីនាំអ្នកញៀនទៅព្យាបាល៖ «បើមិនអ៊ីចឹងទេ ប៉ូលិស គិតតែ ចាប់។ ចាប់ទៅចាប់មក យើងត្រូវលែងវិញ មិនមែនចាប់មិនឲ្យលែងទេ ។ កន្លងមកមាន មូលដ្ឋានខ្លះ សតិអារម្មណ៍ គាត់ ថាពិបាក ណាស់ចាប់លែងៗ។ ច្បាប់គេឲ្យលែងទេតើ !»។
លោកឲ្យដឹងថា បច្ចុប្បន្នមានពលរដ្ឋកម្ពុជា ប្រើប្រាស់គ្រឿងញៀនជាង ១ម៉ឺននាក់។ សេចក្ដីប្រកាសព័ត៌មានរបស់អង្គការ ខាណា (KHANA) បង្ហាញតួលេខប៉ាន់ស្មានថា នៅកម្ពុជា មានអ្នកប្រើប្រាស់គ្រឿងញៀនចំនួន ១ម៉ឺន ៣ពាន់នាក់ ហើយអ្នកប្រើប្រាស់ជាង ១ពាន់នាក់ (១.០៨៦នាក់)នៅរាជធានីភ្នំពេញ៕
វីដេអូ៖ អ្នកប្រើប្រាស់គ្រឿងញៀនកំពុងកើនឡើង
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។