បុគ្គលិកអប់រំមួយចំនួនបង្ហាញការមិនពេញចិត្តទេ ចំពោះសកម្មភាពរ៉ៃអង្គាសប្រាក់នៅតាមសាលារដ្ឋ និងឯកជន ព្រោះពួកគាត់កំពុងរងគ្រោះដោយសារវិបត្តិជំងឺកូវីដ-១៩។
បុគ្គលិកអប់រំនៅសាលាឯកជនម្នាក់ដែលសុំមិនបញ្ចេញឈ្មោះ និងសំឡេង ប្រាប់អាស៊ីសេរីថា ប្រធានក្រុមប្រឹក្សាភិបាលនៃសមាគមគ្រឹះស្ថានឧត្តមសិក្សាកម្ពុជា និងជានាយកវិទ្យាស្ថានវ៉ាន់ដាគណនេយ្យលោក ហេង វ៉ាន់ដា បានផ្ញើសារតាមប្រព័ន្ធតេឡេក្រាម (Telegram) ដល់សាលាឯកជនទាំងអស់ដែលជាសមាជិករបស់សមាគមឲ្យចូលរួមឧបត្ថម្ភថវិកាដល់លោក ដើម្បីទទួលបានចាក់វ៉ាក់សាំងកូវីដ-១៩។ លោកបន្តថា លោក ហេង វ៉ាន់ដា បានផ្ញើសារម្តងហើយម្តងទៀតដើម្បីរំលឹកឲ្យសាលារៀនទាំងអស់បង់ថវិកា ប៉ុន្តែលោកមិនបានបញ្ជាក់ថា ប្រមូលថវិកាទាំងនោះយកទៅធ្វើអ្វីនោះទេ។ បុគ្គលិកអប់រំរូបនេះមិនពេញចិត្តចំពោះសកម្មភាពរ៉ៃអង្គាសថវិកាបែបនេះទេ ព្រោះសាលាឯកជនកំពុងជួបវិបត្តិបាត់បង់ប្រាក់ចំណូលដោយសារការរីករាលដាលជំងឺកូវីដ-១៩ ដែរ។ ម្យ៉ាងទៀត លោក យល់ថា ការប្រមូលថវិកានេះ គឺជាទង្វើមិនត្រឹមត្រូវឡើយ ព្រោះរដ្ឋាភិបាលប្រកាសថា នឹងចាក់វ៉ាក់សាំងជូនប្រជាពលរដ្ឋដោយឥតគិតថ្លៃ ហើយវ៉ាក់សាំងទាំងនោះ គឺជាជំនួយរបស់បរទេសនិងប្រើថវិកាជាតិដើម្បីទិញ។
សារជាអក្សរដែលរងការចោទថា ជាសាររបស់លោក ហេង វ៉ាន់ដា នោះបានសរសេរថា ដើម្បីរួមចំណែកចាក់វ៉ាក់សាំងជូនបុគ្គលិកអប់រំនៅថ្ងៃទី២៩ ខែមីនា ដែលរៀបចំដោយក្រសួងអប់រំនិងក្រសួងសុខាភិបាលនោះលោកអំពាវនាវឲ្យសមាជិកទាំងអស់ជួយផ្សព្វផ្សាយឲ្យបានទូលំទូលាយ និងចូលរួមឧបត្ថម្ភថវិកាដោយស្ម័គ្រចិត្ត។ ក្នុងនោះលោកបានរាយឈ្មោះសាលាមួយចំនួនដែលបានចូលរួមឧបត្ថម្ភថវិកា ចាប់ពីប្រាំរយ (៥០០) ដុល្លារ ទៅមួយពាន់ប្រាំរយ (១.៥០០) ដុល្លារ ដែលសរុបបានជិត ៥ម៉ឺន (៤៨.៦៦០.៧០) ដុល្លារ។ សារនោះ បានរំលឹកម្តងហើយម្តងទៀត ដើម្បីឲ្យសមាជិកសមាគមចូលរួមបរិច្ចាគប្រាក់តាមការអំពាវនាវទោះតិចក្តីច្រើនក្តី។
ជុំវិញការចោទប្រកាន់នេះ ប្រធានក្រុមប្រឹក្សាភិបាលនៃសមាគមគ្រឹះស្ថានឧត្តមសិក្សាកម្ពុជា និងជានាយកវិទ្យាស្ថានវ៉ាន់ដាគណនេយ្យលោក ហេង វ៉ាន់ដា ប្រាប់អាស៊ីសេរីដោយខ្លីថា លោកមិនដឹងរឿងរៃអង្គាសប្រាក់នៅតាមគ្រឹះស្ថានឯកជននោះទេ ហើយលោកចុចផ្តាច់ទូរស័ព្ទភ្លាមៗ។
អាស៊ីសេរីមិនអាចទាក់ទងអ្នកនាំពាក្យក្រសួងសុខាភិបាលអ្នកស្រី ឱ វណ្ណឌីន និងអ្នកនាំពាក្យក្រសួងអប់រំយុវជននិងកិឡាលោក រស់ សុវាចា ដើម្បីសាកសួរព័ត៌មាននេះបានទេ នៅថ្ងៃទី២៨ ខែមីនា។
ប្រធានសមាគមគ្រូបង្រៀនកម្ពុជាឯករាជ្យអ្នកស្រី អ៊ុក ឆាយ៉ាវី មានប្រសាសន៍ថា សាលារដ្ឋខ្លះក៏មានការរ៉ៃអង្គាសប្រាក់ដើម្បីទិញវ៉ាក់សាំង ដូចសាលាឯកជនដែរ។ អ្នកស្រីបន្តទៀតថា ការចូលរួមថវិកាទិញវ៉ាក់សាំងកូវីដ១៩របស់លោកគ្រូអ្នកគ្រូភាគច្រើនពួកគាត់ទទួលរងគំនាប និងមិនសប្បាយចិត្តនោះទេ ដោយពួកគាត់ព្រួយបារម្ភថ្នាក់លើចោទប្រកាន់ថា មាននិន្នាការ និងកត់សម្ភាល់ទុកជាដើម។ អ្នកស្រីយល់ថា ប្រសិនបើការអំពាវនាវរបស់ប្រធានសមាគមគ្រឹះស្ថានឧត្តមសិក្សានេះគឺជាការពិត នោះអ្នកស្រីយល់ថា ជាសារបង្ខិតបង្ខំ ធ្វើឱ្យប៉ះពាល់ដល់អារម្មណ៍បុគ្គលិកអប់រំ ដែលខ្វះខាតដោយសារការរីករាលដាលឆ្លងជំងឺកូវីដ-១៩៖ «ខ្ញុំឃើញថា ទោះបីជារដ្ឋាភិបាលកំពុងតែមានថវិកាជាច្រើនហើយក៏ដោយ ក៏ពួកគាត់ដែលជាថ្នាក់ក្រោមជាតិ តែងតែធ្វើដើម្បីមុខមាត់ពួកគាត់បន្ថែមទៀត ថាពួកគាត់ហ្នឹងខិតខំប្រឹងប្រែងជួយ។ ការបរិច្ចាគហ្នឹង ទោះបីជា ៥០០០ រៀលក្ដី ឬ ១០០០០ រៀលក្ដី ក៏នៅតែជាការទើសទាល់របស់ពួកគាត់»។
ការអំពាវនាវរបស់ប្រធានក្រុមប្រឹក្សាភិបាលនៃគ្រឹះស្ថានឧត្តមសិក្សាកម្ពុជា ដែលរ៉ៃអង្គាសប្រាក់ពីបុគ្គលិកអប់រំនេះ គឺផ្ទុយពីការអះអាងរបស់រដ្ឋាភិបាល លោក ហ៊ុន សែន កន្លងមកដែលថា ការចាក់វ៉ាក់សាំងកូវីដ-១៩ ជូនប្រជាពលរដ្ឋខ្មែរដោយឥតគិតថ្លៃ ស្ម័គ្រចិត្ត និងមិនរើងអើងនិន្នាការនយោបាយ។
កាលពីដើមខែកុម្ភៈ អាជ្ញាធរកម្ពុជា ក៏បានបណ្តេញបុរសជនជាតិចិនម្នាក់ជាម្ចាស់កាសែតអង្គរធូដេ(Angkor Today) មិនឲ្យចូលកម្ពុជាជារៀងរហូត បន្ទាប់ពីស្ថាប័នព័ត៌មានរបស់គាត់បានចុះផ្សាយអត្ថបទមួយក្រោមចំណងជើងថា «កម្ពុជាលក់វ៉ាក់សាំងដែលជាជំនួយរបស់ចិន»៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។