អ្នកជំនាញវេជ្ជសាស្រ្ត ហួសចិត្តដែលក្រសួងសុខាភិបាលកម្ពុជាទទួលស្គាល់ និងអនុញ្ញាតឲ្យប្រើប្រាស់ថ្នាំបុរាណចិន ដោយគ្មានឯកសារបង្ហាញអំពីប្រសិទ្ធភាពនិងការពិសោធន៍ផ្នែកវេជ្ជសាស្រ្តអ្វីទាំងអស់។
ឱសថការីខ្មែរអូស្រ្តាលីលោក លឹម សួរ ថាមន្រ្តីសុខាភិបាលកម្ពុជាមិនគួរណាជឿតាមចិនថាថ្នាំនេះមានប្រសិទ្ធភាពក្នុងការជួយព្យាបាលជំងឺកូវីដ-១៩រួចព្រមទាំងចាប៉ីទាំងទ្រគាំទ្រថ្នាំនេះ។ លោក លឹម សួរ បន្តថា ការព្រមទទួលស្គាល់ថ្នាំបុរាណចិននេះគឺខុសស្តង់ដារអន្តរជាតិព្រោះថ្នាំនេះអង្គការសុខភាពពិភពលោក (WHO) មិនបានទទួលស្គាល់ឲ្យប្រើប្រាស់នោះទេ។ជាងនេះទៅទៀតលោកថា អ្នកប្រើប្រាស់អាចប្រឈមប៉ះពាល់សុខភាព ជាពិសេសអ្នកមានជំងឺប្រចាំកាយ។
ប្រតិកម្មរបស់អ្នកជំនាញខាងឱសថរូបនេះធ្វើឡើងក្រោយក្រសួងសុខាភិបាលកម្ពុជាកាលពីខែ មេសា ប្រកាសឲ្យប្រើប្រាស់ថ្នាំបុរាណចិនឈ្មោះ លានហួរ គីងវិន (Lianhua Qingwen) សម្រាប់ជួយបន្ធូរអាការអ្នកជំងឺកូវីដ-១៩។សូម្បីតែលោកនាយករដ្ឋមន្រ្តី ហ៊ុន សែនក៏ចេញមុខប្រកាសជាសាធារណៈដែរថា លោកប្រើថ្នាំនេះជាប្រចាំបើទោះបីលោកអះអាងថា លោកគ្មានជំងឺកូវីដ-១៩៖ «ញុំក៏លេបដែរ ! ហើយខ្ញុំមានចាក់ថ្នាំចិនមុន មុននឹងចេញដំណើរ ទៅណាត្រូវលេបថ្នាំហ្នឹង ទោះបីមិនឈឺក៏ដោយ ត្រូវលេបការពារវាបន្ថែម។ ដូច្នេះត្រូវទិញ ឲ្យវាច្រើនបន្តិចមក»។
ការណ៍ដែលលោក ហ៊ុន សែន ថាលេបថ្នាំបុរាណចិនទាំងលោកមិនឈឺ និងថាលេបដើម្បីការពារបន្ថែមនេះគឺជាការអះអាងផ្ទុយទៅនឹងមន្រ្តីសុខាភិបាលកម្ពុជាអ្នកស្រី ឱ វណ្ណឌីន ដែលអះអាងបញ្ជាក់ថារហូតមកដល់ពេលនេះគ្មានឱសថណាអាចការពារជំងឺកូវីដ-១៩ នោះទេ។ ទោះជាយ៉ាងនេះក្តី អ្នកស្រី ឱ វណ្ឌឌីន ថាថ្នាំបុរាណចិននេះល្អ។ អ្នកស្រី មិនបានបង្ហាញភ័ស្តុតាងពិសោធន៍និងសិក្សាផ្នែកវេជ្ជសាស្រ្តណាមួយ អំពីការអះអាងនេះទេប៉ុន្តែអ្នកស្រីឲ្យជឿលើប្រសិទ្ធភាពល្បីនៃថ្នាំបុរាណគ្រប់មុខដែលគេធ្លាប់យកមកប្រើប្រាស់តជំនាន់មកហើយ៖ «ឱសថបុរាណនេះ បើ យើងមើលពីបុរុមកាលរបស់យើងមក ក្នុងប្រទេសកម្ពុជា ក៏មានការប្រើប្រាស់ឱសថបុរាណនេះច្រើនណាស់។ ឥឡូវយើងមិនបាច់និយាយអ្វីទេ សូម្បីតែឫសយិនស៊ិន បងប្អូនយើង ដូចជាពេញនិយម យកមកប្រើយកមកពិសារ ។ ចុះម៉េចមិនថាអាហ្នឹង ផង ? ហេតុអ្វីក៏យើង មានទស្សនៈទានមួយខ្មៅ សម្រាប់តែឱសថបុរាណចិន»។
វិទ្យុអាស៊ីសេរី មិនទាន់អាចសុំការបំភ្លឺជុំវិញរឿងនេះពីមន្រ្តីតំណាងអង្គការសុខភាពពិភពលោកប្រចាំនៅកម្ពុជាបាននៅឡើយទេ។
ប៉ុន្តែ អង្គការសុខភាពពិភពលោកបានធ្វើពិសោធន៍អំពីប្រសិទ្ធភាពឱសថបួនមុខដែលប្រទេសជាច្រើនបានប្រើប្រាស់ដើម្បីព្យាបាលជំងឺកូវីដ-១៩។ឱសថទាំងនោះគ្មានឈ្មោះឱសថបុរាណចិននេះទេ។
ជាងនេះទៅទៀតមន្រ្តីសុខាភិបាលនៃរដ្ឋាភិបាលនៃប្រទេសមួយចំនួនដូចជាប្រទេសហ្វីលីពីនបានព្រមានប្រជាពលរដ្ឋខ្លួនរឿងប្រើប្រាស់ឱសថបុរាណចិននេះព្រោះវាប៉ះពាល់ដល់អ្នកដែលមានជំងឺប្រចាំកាយដូចជាជំងឺថ្លើមទឹកនោមផ្អែម និងតម្រងនោមជាដើម។ពួកគេព្រមានថាឱសថនេះមានផលអាក្រក់ច្រើនជាងល្អ ជាពិសេស ពេលប្រើសម្រាប់កុមារស្រ្តីមានផ្ទៃពោះ និងមនុស្សចាស់ជរាជាដើមនឹងផ្តល់ដំបូលន្មានឲ្យប្រើប្រាស់វាតែក្នុងករណីមានវេជ្ជបញ្ជាចេញពីគ្រូពេទ្យប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។