នៅទន្ទឹមនឹងអង្គការសុខភាពលើកឡើងថា កម្ពុជាកំពុងស្ថិតនៅមាត់ជ្រោះសោកនាដកម្មដ៏ធ្ងន់ធ្ងរ ដោយបង្កឡើងដោយជំងឺកូវីដ១៩ លោក សម រង្ស៊ី ប្រធានស្ដីទីគណបក្សសង្គ្រោះជាតិ បានសរសេរនៅលើបណ្ដាញសង្គមហ្វេសប៊ុក ដាក់ជាសំណួរថា តើគួរបង្ខិតបង្ខំឲ្យពលរដ្ឋចាក់វ៉ាក់សាំងចិន ដែលអង្គការសុខភាពពិភពលោក (WHO) មិនទាន់ទទួលស្គាល់ ឬយ៉ាងណា?
លោក សម រង្ស៊ី បានសរសេរថា មកទល់ពេលនេះ វ៉ាក់សាំងបង្ការជំងឺកូវីដ១៩ របស់ចិន មិនទាន់ត្រូវបានអង្គការសុខភាពពិភពលោក (WHO) ទទួលស្គាល់ថា មានសុវត្ថិភាព និងប្រសិទ្ធភាពពេញលេញនៅឡើយទេ។ លោកថា វ៉ាក់សាំង ដែលគេអាចជឿជាក់ និងទុកចិត្តបាន ១០០% កំពុងតែពេញនិយមជាងគេ ក្នុងពិភពលោក មានឈ្មោះ ភីហ្វៃហ្សឺ (PFIZER), ម៉ូឌើរណា (MODERNA) និង ចនសុន អែន ចនសុន (JOHNSON & JOHNSON) ។ វ៉ាក់សាំងទាំង ៣នេះ គឺជាវ៉ាក់សាំង ផលិតដោយក្រុមហ៊ុនដែលមានទីតាំងនៅសហរដ្ឋអាមេរិក (USA) មានន័យថា សហរដ្ឋអាមេរិក គឺជាប្រទេសដែលមានក្រុមអ្នកស្រាវជ្រាវ និងអ្នកជំនាញវិទ្យាសាស្ត្រ ពូកែជាងគេ ក្នុងពិភពលោក។
លោក សម រង្ស៊ី បានលើកជាសំណួរថា ហេតុអ្វីបានជាលោក ហ៊ុន សែន ដែលបានរៃអង្គាសប្រាក់រាប់សិបលានដុល្លារ ដោយបោកបញ្ឆោតប្រជារាស្ត្រខ្មែរថា យកទៅទិញវ៉ាក់សាំង គាត់មិនខិតខំរកទិញវ៉ាក់សាំងល្អៗ ជាងគេក្នុងពិភពលោក តែបែរមករំពឹងតែលើវ៉ាក់សាំងចិនទៅវិញ?
លើសពីនេះទៅទៀតលោក ហ៊ុន សែន បានបង្ខំឲ្យពលរដ្ឋខ្មែរម្នាក់ៗ ចាក់វ៉ាក់សាំងចិននេះគ្រប់គ្នា ទោះជានរណាមិនយល់ស្រប ក៏គេបង្ខំដែរ ដោយគំរាមបញ្ឈប់ពីការងារជាដើម។ លោក សម រង្ស៊ី អះអាងថា មិនយូរប៉ុន្មានទេ ប្រទេសក្រីក្រដូចកម្ពុជា នឹងទទួលបានវ៉ាក់សាំងល្អប្រសើរជាងគេ ដោយមិនគិតថ្លៃ ដូចវ៉ាក់សាំង ដែលប្រទេសសេរីជឿនលឿនកំពុងប្រើប្រាស់អ៊ីចឹងដែរ។ ការផ្តល់វ៉ាក់សាំងដោយមិនគិតថ្លៃនេះ គឺធ្វើឡើងតាមរយៈគម្រោង កូវ៉ាក់ COVAX រៀបចំដោយអង្គការសុខភាពពិភពលោក (WHO) និងអង្គការសហប្រជាជាតិ។
លោក សម រង្ស៊ី ចោទលោកនាយករដ្ឋមន្ត្រី ហ៊ុន សែន ថា តាំងពីដើមទីមក លោក ហ៊ុន សែន និយាយពីការឆ្លងជំងឺកូវីដ១៩ ដោយមិនយល់អ្វីទាល់តែសោះ ដូចជា ការទស្សន៍ទាយរបស់លោកថា ទាល់តែចាំដល់ថ្ងៃទី៣១ កុម្ភៈ ទើបជំងឺនេះអាចមកដល់ប្រទេសកម្ពុជា និងការហាមឃាត់ មិនឲ្យអ្នកនៅជុំវិញលោកពាក់ម៉ាស់ការពារខ្លួន និងការពារអ្នកដទៃជាដើម។
អង្គការសុខភាពពិភពលោកត្រូវការទិន្នន័យប្រសិទ្ធភាព និងសុវត្ថិភាពរបស់វ៉ា់ក់សាំងចាប់ពី ៥០% ឡើងទៅ ដើម្បីបង្ហាញថា វ៉ាក់សាំងនោះ នឹងមិនបង្កគ្រោះថ្នាក់ដល់មនុស្សនៅពេលចាក់វា។ ខាងក្រុមហ៊ុនផលិតវ៉ាក់សាំង ស៊ីណូហ្វាម (Sinopharm) អះអាងថា វ៉ាក់សាំងនេះមានប្រសិទ្ធភាពជាង ៧៩% ក្នុងការការពារកុំឲ្យឆ្លងជំងឺកូវីដ ១៩។ រីឯវ៉ាក់សាំងស៊ីណូវ៉ាក់វិញ (Sinovac) ទិន្នន័យបណ្ដោះអាសន្នបង្ហាញថា មានប្រសិទ្ធភាពចន្លោះពី ៥០% ទៅ ៨៣% ។ នេះដោយផ្អែកលើការចាក់សាកល្បងនៅប្រទេសប្រេហ្សីល (Brazil) ទូគី (Turky) និងឥណ្ឌូនេស៊ី (Indonesia) ជាដើម។
អ្នកនាំពាក្យរបស់អង្គការសុខភាពពិភពលោកបានថ្លែងកាលពីដើមខែមីនាថា វ៉ាក់សាំងចិនទាំងពីរប្រភេទនេះ (Sinopharm & Sinovac) អាចទទួលបានការចុះបញ្ជីប្រើជាបន្ទាន់ក្នុងពេលឆាប់ៗ នេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។