ទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ (USAID) និងដៃគូអភិវឌ្ឍ ប្រកាសពីយុទ្ធនាការផ្លាស់ប្ដូរឥរិយាបថសហគមន៍ ដើម្បីជួយឱ្យកុមារមានការលូតលាស់ និងសម្រេចបាននូវ សក្ដានុពលអភិវឌ្ឍពេញលេញ។
សេចក្តីប្រកាសព័ត៌មានរបស់ USAID នៅថ្ងៃទី១ ខែមេសា ឲ្យដឹងថា គោលបំណងសំខាន់នៃគម្រោងអភិវឌ្ឍន៍កុមារតូចនេះ គឺគាំទ្រដល់ការលើកកម្ពស់ ការចិញ្ចឹមបីបាច់ថែរក្សា សំរាប់កុមារចាប់ពីមុនពេលកើត រហូតដល់អាយុ៥ឆ្នាំ។ គម្រោងអភិវឌ្ឍន៍កុមារតូចនេះ ក៏នឹងជួយដល់ក្រុមគ្រួសារ និងកុមារមានការអភិវឌ្ឍយឺតនិងពិការភាព ទទួលបាននូវសេវាថែទាំនិងគាំទ្រដ៏សមស្រប។
នាយកគម្រោងអភិវឌ្ឍន៍កុមារតូច នៃវិទ្យាស្ថានស្រាវជ្រាវត្រីកោណអន្តរជាតិ (RTI International) លោក ចន វីលៀម អាមេស (John Ames) ថ្លែងនៅចំពោះមុខ ភាគីពាក់ព័ន្ធប្រមាណ ៣០ស្ថាប័ន និងក្រុមគ្រួសារចំនួន ១៧០គ្រួសារ ក្នុងក្រុងសៀមរាប នៅថ្ងៃទី ១ មេសានេះ ថា «យុទ្ធនាការនេះ មានគោលបំណងលើកកម្ពស់ការចូលរួមដោយស្មើភាពគ្នា រវាងបុរសនិងស្ត្រីក្នុងការចិញ្ចឹម បីបាច់ថែរក្សាកូនតូចៗ ដើម្បីជួយឱ្យកុមារមានការអភិវឌ្ឍបានល្អ លើបញ្ញាស្មារតី ការគិត ភាសា អារម្មណ៍ និងការលូតលាស់ផ្នែករាងកាយរបស់ពួកគេ»។
គម្រោងអភិវឌ្ឍន៍កុមារតូច ដឹកនាំអនុវត្តដោយវិទ្យាស្ថានស្រាវជ្រាវត្រីកោណ (RTI International) សហការជាមួយអង្គការហេឡែន ខេលល័រ អន្តរជាតិ (Helen Keller International) អង្គការសេហ្វ ហេវិន (Safe Haven) និងរដ្ឋាភិបាលកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។