បុគ្គលណាដែលត្រូវពាក់ម៉ាស់នៅកន្លែងត្រូវពាក់ម៉ាស់ ប៉ុន្តែខកខានមិនបានពាក់ម៉ាស់ នឹងត្រូវពិន័យជាប្រាក់ចាប់ពី ២សែនរៀល (៥០ដុល្លារ) ដល់ ១លានរៀល (២៥០ដុល្លារ)។ ប្រាក់មួយលានរៀលនេះ បើពិន័យប៉ះចំលើកម្មកររោងចក្រ គឺស្មើនឹងប្រាក់ខែជាងមួយខែរបស់គាត់ម្នាក់។
នេះបើតាមអ្វីដែលមានចែងក្នុងមាត្រា ៥ នៃ អនុក្រឹត្យថ្មី ស្តីពីវិធានការសុខាភិបាលដើម្បីទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត។ អនុក្រឹត្យដដែលនេះ បញ្ជាក់ថា មានតែក្រសួងសុខាភិបាលប៉ុណ្ណោះ ដែលជាអ្នកកំណត់ថា បុគ្គលណាខ្លះដែលត្រូវពាក់ម៉ាស់ និងទីកន្លែងណាខ្លះ ដែលតម្រូវឲ្យបុគ្គលទាំងនោះពាក់ម៉ាស់។
ការពិន័យនេះទៀតសោត ធ្វើទៅបានទាល់តែបុគ្គលនោះបំពានជាលើកទី២ ពោលគឺបើពួកគាត់បំពានលើកទីមួយ ច្បាប់តម្រូវឲ្យណែនាំ និងព្រមានជាមុនសិន។ អ្នកដែលណែនាំ និងព្រមាននោះ គឺមន្រ្តីសុខាភិបាល ឬអាជ្ញាធរមានសមត្ថកិច្ច។
ទោះជាយ៉ាងនេះក្ដី តាំងពីថ្ងៃទី១២ ខែមីនាមក អនុក្រឹត្យនេះចេញបាន ១០ថ្ងៃទៅហើយ ប៉ុន្តែក្រសួងសុខាភិបាលនៅតែមិនទាន់ប្រកាស ឬចេញសេចក្ដីសម្រេចណាមួយ ដើម្បីកំណត់បុគ្គលដែលត្រូវពាក់ម៉ាស់ និងទីកន្លែងណាតម្រូវឲ្យបុគ្គលទាំងនោះពាក់ម៉ាស់នៅឡើយទេ។
អ្វីដែលក្រសួងសុខាភិបាលធ្លាប់ធ្វើកន្លងទៅ គឺមានតែការអំពាវនាវឲ្យប្រជាពលរដ្ឋអនុវត្តវិធានការ ៣ការពារ និង ៣កុំ។ ៣ ការពារ រួមមាន ពាក់ម៉ាស់ លាងដៃញឹកញាប់ និងរក្សាគម្លាតសុវត្ថិភាពបុគ្គលពីមួយម៉ែត្រកន្លះឡើង។ ៣កុំ រួមមាន កុំទៅកន្លែងដែលបិទជិតឈឹងគ្មានខ្យល់ចេញចូល កុំប្រើម៉ាស៊ីនត្រជាក់ច្រើនពេក កុំទៅកន្លែងមនុស្សកុះករកកកុញច្រើន និងកុំចាប់ដៃគ្នា កុំកៀកស្មាគ្នា កុំឱបគ្នានៅពេលជួបគ្នាជាដើម។
រដ្ឋមន្រ្តីក្រសួងយុត្តិធម៌លោក កើត រិទ្ធ ក៏នៅរង់ចាំសេចក្តីប្រកាស និងសម្រេចរបស់ក្រសួងសុខាភិបាល ជុំវិញរឿងនេះដែរ។ លោកថ្លែងតាមប្រព័ន្ធតេឡេក្រាម ដែលក្រសួងយុត្តិធម៌ដកស្រង់ប្រសាសន៍នេះមកផ្សាយលើទំព័រហ្វេសប៊ុករបស់ក្រសួងកាលពីថ្ងៃទី១៥ ខែមីនាថា៖ « ការផាកពិន័យអ្នកអត់ពាក់ម៉ាស់ មិនទាន់ត្រូវបានធ្វើឡើងជាទូទៅទេ ពោលគឺធ្វើឡើងតែនៅកន្លែងដែលប្រឈមខ្ពស់ នៃការរីករាលដាលជំងឺកូវីដ - ១៩ តែប៉ុណ្ណោះ និងត្រូវមានសេចក្តីសម្រេចពីក្រសួងសុខាភិបាល »។
ស្របពេលដែលមន្រ្តីជាន់ខ្ពស់ក្រសួងយុត្តិធម៌ និងពលរដ្ឋទូទៅកំពុងរង់ចាំមើលសេចក្តីប្រកាស និងសម្រេចរបស់ក្រសួងសុខាភិបាល ស្ថានភាពរីករាលដាលនៃជំងឺកូវីដ-១៩ ក្នុងសហគមន៍ កាន់តែរីកធំជាលំដាប់។ ចំនួនអ្នកឆ្លងក្នុងសហគមន៍ ក្នុងរយៈពេល ៣០ថ្ងៃ គិតចាប់ពីថ្ងៃទី២០ ខែកុម្ភៈ កើនដល់ ១.១៦២នាក់ គិតត្រឹមថ្ងៃទី២១ ខែមីនា។ ចំនួនអ្នកឆ្លងក្នុងរយៈពេល ១ខែនេះ ច្រើនជាងពីរដងនៃចំនួនអ្នកឆ្លងជំងឺនេះនៅទូទាំងប្រទេសសម្រាប់រយៈពេល ១ឆ្នាំ។ អ្នកស្លាប់ក្នុងពេលសម្រាកព្យាបាលជំងឺកូវីដ-១៩ និងពេលកំពុងធ្វើចត្តាឡីស័កកើនឡើងដល់ ៦នាក់។ ប៉ុន្តែមានតែបីនាក់ប៉ុណ្ណោះ ដែលក្រសួងសុខាភិបាលទទួលស្គាល់ថាស្លាប់ដោយសារជំងឺកូវីដ-១៩។
ក្នុងពេលជាមួយគ្នានេះ កម្មករោងចក្រកាត់ដេរ និងអ្នកដើរផ្សារនៅតែប្រជ្រៀតគ្នាដែលមិនអាចរក្សាគម្លាតសុវត្ថិភាពបាន។ ប៉ុន្តែអនុក្រឹត្យថ្មីក៏កំណត់ពិន័យអ្នកដែលមិនរក្សាគម្លាតនេះដែរ។ មាត្រា៧ មាត្រា១៩ និងមាត្រា២០ នៃអនុក្រឹត្យដដែលចែងថា បុគ្គលនីមួយៗត្រូវរក្សាគម្លាតពីគ្នាយ៉ាងតិច ១ម៉ែត្រកន្លះ។ បើមិនដូច្នេះទេចំពោះបុគ្គលល្មើស នឹងត្រូវពិន័យដូចអត់ពាក់ម៉ាស់ដែរ គឺពី ២សែនរៀល ដល់ ១លានរៀល។ បើបុគ្គលល្មើសជាអ្នកទទួលខុសត្រូវក្នុងការរៀបចំការជួបជុំមនុស្ស ឬសកម្មភាពដទៃទៀតនឹងត្រូវពិន័យពី ១លានរៀល ដល់ ៥លានរៀល។ បើសហគ្រាស ឬគ្រឹះស្ថានឯកជន ឬម្ចាស់អាជីវកម្មវិញពួកគេនឹងត្រូវពិន័យ ពី ២លានរៀល ដល់ ១០លានរៀល។
ក្រសួងសុខាភិបាលជាអ្នកសម្រេចថា តើទីកន្លែងធ្វើការ ទីតាំងអាជីវកម្ម ឬទីកន្លែងសាធារណៈ និងកម្មវិធីជួបជុំមនុស្ស ឬសកម្មភាពសង្គមណាខ្លះ ដែលត្រូវរក្សាគម្លាតនេះដែរ។ ប៉ុន្តែក្រសួងនៅមិនទាន់ចេញសេចក្តីសម្រេច ឬប្រកាសណាមួយជុំវិញរឿងនេះនៅឡើយដែរ។
អាស៊ីសេរីមិនទាន់អាចសុំការបំភ្លឺពីអ្នកនាំពាក្យក្រសួងសុខាភិបាលអ្នកស្រី ឱ វណ្ណឌីន ជុំវិញរឿងនេះបានទេ ដោយសារអ្នកស្រីមិនលើកទូរសព្ទ។
ទោះជាយ៉ាងនេះក្ដី ពលរដ្ឋទូទៅនៅតែពពាក់ពពូនដើរផ្សារ និងកម្មកររោងចក្រជិះរថយន្តប្រជ្រៀតគ្នាដូចម្រាមដៃទៅធ្វើការរាល់ថ្ងៃ ដោយអ្នកខ្លះពាក់ម៉ាស់ អ្នកខ្លះមិនពាក់នោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។