អង្គការសង្គមស៊ីវិល បង្ហាញថា ប្រជាពលរដ្ឋខ្មែរដែលនៅតែរងគ្រោះពេលចេញទៅធ្វើការនៅក្រៅប្រទេសម្ដងហើយម្ដងទៀតនោះ ដោយសារខ្វះការចែកចាយបទពិសោធន៍ពីជនរងគ្រោះមុនៗ។ ការអះអាងយ៉ាងដូច្នេះ បន្ទាប់ពីពលករខ្មែររងគ្រោះលើទូកនេសាទថៃ ជាច្រើននាក់ ដែលបញ្ជូនមកដល់កម្ពុជា វិញ នៅថ្ងៃទី២ ខែមិថុនា ប៉ុន្តែពលករទាំងនោះព្យាយាមមិននិយាយអ្វីទាល់តែសោះអំពីជីវិតជាទាសករនៅបរទេសដល់អ្នកកាសែត។
ប្រធានអង្គការខារ៉ាមកម្ពុជា (Caram Cambodia) ដែលធ្វើការពាក់ព័ន្ធនឹងពលករចំណាកស្រុក លោក យ៉ា ណាវុធ និយាយថា ជនរងគ្រោះកម្ពុជា ដែលទៅធ្វើការនៅក្រៅប្រទេស ដូចជាពលកររងគ្រោះលើទូកនេសាទថៃ និងស្ត្រីខ្មែរដែលរងការជួញដូរទៅរៀបការជាមួយជនបរទេសនោះ មិនគួរបិទបាំងព័ត៌មានអំពីបទពិសោធន៍ដ៏ជូរចត់របស់ខ្លួនដល់អ្នកកាសែត ឬមហាជននានានោះទេ។
លោកបន្តថា ការចែកចាយព័ត៌មាន ឬបទពិសោធន៍ដល់គ្នាទៅវិញទៅមកនោះ មានសារសំខាន់ណាស់ដើម្បីផ្សព្វផ្សាយអោយបានទូលំទូលាយ កុំអោយពលរដ្ឋខ្មែរដទៃទៀតចាញ់បោកល្បិចកលរបស់មេខ្យល់នាំទៅធ្វើការនៅក្រៅប្រទេសនោះ។ លោកឲ្យដឹងទៀតថា ដោយសារកង្វះការចែកចាយព័ត៌មានពីជនរងគ្រោះមុនៗនេះហើយ ទើបបណ្ដាលអោយប្រជាពលរដ្ឋខ្មែរនៅតែបន្តរងគ្រោះម្ដងហើយម្ដងទៀត៖ «គួរតែឲ្យអ្នកកាសែតជួបជាមួយជនរងគ្រោះ ដើម្បីផ្សព្វផ្សាយអំពីស្ថានភាពជនរងគ្រោះដែលជួបប្រទះបញ្ហានៅប្រទេសទទួល ហើយរបៀបដែលមេខ្យល់បោកបញ្ឆោតជនរងគ្រោះទៅធ្វើការនៅក្រៅប្រទេស»។
ជាក់ស្ដែង នៅថ្ងៃទី២ ខែមិថុនា ពលករខ្មែររងគ្រោះលើទូកនេសាទថៃ ចំនួន ៣៨នាក់ និងស្ត្រីខ្មែរម្នាក់ទៀតដែលរងការធ្វើបាបពេលនៅបម្រើការងារតាមផ្ទះនៅប្រទេសឥណ្ឌូនេស៊ី ត្រូវបានសង្គ្រោះនិងបញ្ជូនមកដល់កម្ពុជា វិញហើយ ប៉ុន្តែក្រុមជនរងគ្រោះទាំងនេះបានបិទមាត់មិនធ្វើអត្ថាធិប្បាយសូម្បីមួយម៉ាត់ជាមួយអ្នកកាសែតអំពីជីវិតរបស់ពួកគេ ដែលត្រូវគេបោកប្រើដូចជាទាសករនោះទេ។ ពួកគេបានដើរឡើងឡានក្រុងយ៉ាងលឿនទាំងទឹកមុខក្រញូវ ក្រោយចុះពីយន្តហោះតាមច្រកទ្វារ វី.អាយ.ភី (VIP) នៅអាកាសយានដ្ឋានអន្តរជាតិភ្នំពេញ។ ពួកគេម្នាក់ៗ ហាក់ដូចជាមាននរណាម្នាក់ហាមប្រាមយ៉ាងដាច់អហង្ការ មិនអោយឆ្លើយផ្ដោះផ្ដងជាមួយអ្នកកាសែតឡើយ៖ «សូមបងនិយាយចេញមក ថាតើគេបោកប្រាស់ និងធ្វើបាបយ៉ាងម៉េចខ្លះនៅក្រៅប្រទេស ហើយបងចាកចេញពីខ្មែរប៉ុន្មានឆ្នាំហើយ? ហេតុអ្វីពួកបងមិនឆ្លើយ តើអ្នកណាគេមិនឲ្យនិយាយ?»។
ស្របពេលជាមួយគ្នាដែរ អ្នកនាំពាក្យក្រសួងការបរទេសកម្ពុជា លោក កុយ គួង អះអាងថា សមត្ថកិច្ចមិនដែលហាមឃាត់ជនរងគ្រោះមិនឲ្យឆ្លើយជាមួយអ្នកកាសែតទេ ប៉ុន្តែអាចមកពីជនរងគ្រោះខ្លួនឯងមិនចង់ឲ្យអ្នកកាសែតផ្សព្វផ្សាយរឿងរ៉ាវរបស់ពួកគេជាសាធារណៈ៖ «សមត្ថកិច្ចមិនចង់ឲ្យពួកគាត់លាក់បាំងរឿងហ្នឹងទេ ពោលគឺយើងចង់ឲ្យពួកគាត់ជួបអ្នកកាសែត ដើម្បីនិយាយរឿងទុក្ខលំបាកទាំងនេះ វារឹតតែល្អ ព្រោះដើម្បីផ្តល់មេរៀនដល់ប្រជាពលរដ្ឋខ្មែរដទៃទៀត»។
ទាក់ទិនបញ្ហានេះ រដ្ឋលេខាធិការក្រសួងមហាផ្ទៃ និងជាអគ្គលេខាធិការនៃគណៈកម្មាធិការជាតិដឹកនាំការបង្ក្រាបការជួញដូរ និងរត់ពន្ធមនុស្ស ការកេងប្រវ័ញ្ចកម្លាំងពលកម្ម និងផ្លូវភេទលើស្ត្រី និងកុមារ អ្នកស្រី ជូ ប៊ុនអេង មានប្រសាសន៍ព្រួយបារម្ភដែរថា ការលាក់បាំងព័ត៌មានពីជនរងគ្រោះនេះ ពិបាកក្នុងការស្វែងរកការចាប់ខ្លួនមេខ្យល់ និងជួយជនរងគ្រោះដែរ៖ «គាត់មិនព្រមផ្តល់នូវព័ត៌មានពិត ដូចជាព័ត៌មានជាក់លាក់ឲ្យយើងអាចធ្វើជាមូលដ្ឋានគ្រឹះ សម្រាប់កសាងសំណុំរឿង ដើម្បីរកជនល្មើសអីហ្នឹង គឺយើងមានការលំបាកខ្លាំងណាស់»។
មួយរយៈចុងក្រោយនេះ ពលករខ្មែររងគ្រោះលើទូកនេសាទថៃ រាប់រយនាក់ ត្រូវបានបញ្ជូនមកដល់កម្ពុជា វិញហើយ ក្រោយពេលស្ថានទូតកម្ពុជា ប្រចាំនៅឥណ្ឌូនេស៊ី សហការយ៉ាងជិតស្និទ្ធជាមួយអង្គការទេសន្តរប្រវេសក៍អន្តរជាតិ (IOM) និងអាជ្ញាធរឥណ្ឌូនេស៊ី ជួយសង្គ្រោះពួកគេពីទូកនេសាទថៃ ដែលឆ្លងចូលដែនសមុទ្រឥណ្ឌូនេស៊ី ដោយខុសច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។