សកម្មជនការពារដីធ្លី ជាស្ត្រី ក្នុងចំណោមព្រះសង្ឃ និងសកម្មជនគណបក្សនយោបាយ ដែលត្រូវសមត្ថកិច្ចចាប់ខ្លួន និងដាក់ពន្ធនាគារ កាលពីដើមខែវិច្ឆិកានេះ បានចាប់ផ្ដើមបង្អត់អាហារនៅក្នុងគុកមួយថ្ងៃ ប្រឆាំងសាលក្រមនៃសាលាដំបូងរាជធានីភ្នំពេញ និងទាមទារឲ្យតុលាការពិចារណា ទម្លាក់បទចោទនេះចេញ។ យុទ្ធនាការនេះ ធ្វើឡើងស្របពេលដែល ព្រះ សង្ឃ សកម្មជនដីធ្លី និងអង្គការសង្គមស៊ីវិល ប្រមាណ២រយនាក់ ទទូចឲ្យរដ្ឋាភិបាល ដោះលែងអ្នកជាប់ឃុំទាំង ១៩នាក់ឲ្យមានសេរីភាពវិញ។
នេះជាលើកទីមួយហើយ ដែលសកម្មជនដីធ្លីធ្វើយុទ្ធនាការ ប្រកាសបង្អត់អាហារនៅក្នុងគុក ចាប់តាំងពីសាលក្រមនៃសាលាដំបូងរាជធានីភ្នំពេញ សម្រេចផ្ដន្ទាទោសប្រឆាំង សកម្មភាពសុំសិទ្ធិរស់នៅដោយសមរម្យ កាលពី ៣សប្ដាហ៍កន្លងទៅនេះ។
ការបង្អត់អាហារពេញមួយថ្ងៃ នៅថ្ងៃទី ៣០ វិច្ឆិកា នេះ គឺធ្វើឡើងស្របពេលដែលយុទ្ធនាការទាមទារ សុំឲ្យដោះលែង ព្រះសង្ឃ សកម្មជនដីធ្លី និងសកម្មជនគណបក្សនយោបាយ ឈានចូលដល់សប្ដាហ៍ទីបី ដែលពុំទទួលបានលទ្ធផល។
ក្រុមអ្នកតវ៉ាបានស្រែកផង និង និយាយផង នៅខាងមុខមណ្ឌលកែប្រែ ម១ នៃពន្ធនាគារព្រៃស ថា អ្នកជាប់ឃុំជាស្ត្រី បានព្រមាននៅក្នុងគុកថា លើកនេះ អត់អាហារមួយថ្ងៃ ហើយលើកក្រោយនឹងបន្តបង្អត់អាហារទៀត រហូតប៉ះពាល់អាយុជីវិត បើការទាមទារនេះ នៅមិនទទួលបានយុត្តិធម៌ទេ។
ស្ទើរពេញមួយព្រឹក នៅថ្ងៃទី ៣០ វិច្ឆិកា សកម្មជនដីធ្លី ព្រះសង្ឃ និងក្រុមអង្គការមិនមែនរដ្ឋាភិបាលផង ប្រមាណ ២រយនាក់ បានប្រមូលផ្ដុំគ្នាដូចសព្វដង នៅខាងមុខមណ្ឌលកែប្រែ ម១ និង ម២។ ការតវ៉ាលើកនេះ ហាក់រាងប្លែកពីលើកមុនៗបន្តិច ដែលកាលណោះ ក្រុមអ្នកតវ៉ា បានយករូបចៅក្រម និងព្រះរាជអាជ្ញានៃសាលាដំបូងរាជធានីភ្នំពេញមួយចំនួន ដុតលាយជាមួយអំបិល និងម្ទេសស្រស រួចដាក់ដាក់បណ្ដាសា។ក៏ប៉ុន្តែលើកនេះ ខុសនៅត្រង់ថា អ្នកតវ៉ាបានរៀបចំពិធីខួបកំណើត កូនរបស់លោកស្រី ទេព វន្នី នៅខាងមុខមណ្ឌលកែប្រែម១តែម្ដង។
ក្រុមអង្គការមិនមែនរដ្ឋាភិបាល ដែលឃ្លាំមើលការចាប់ខ្លួននេះ យ៉ាងដិតដល់យល់ឃើញថា ការចាប់និងឃុំខ្លួន នេះជាល្បិចនយោបាយរបស់គណបក្សកាន់អំណាច ដើម្បីដាក់សម្ពាធឲ្យគណបក្សប្រឆាំង ទម្លាក់ការទាមទារ រឿងការបង្កើត គ.ជ.ប ថ្មី ប៉ុណ្ណោះ។
លោក អំ សំអាត មន្ត្រីបច្ចេកទេសជាន់ខ្ពស់នៃអង្គការលីកាដូ ចាត់ទុកថា នេះជាយុទ្ធសាស្ត្រនយោបាយរបស់គណបក្សប្រជាជនកម្ពុជា ដើម្បីគំរាមដល់អ្នកតវ៉ាដទៃទៀត ដោយហេតុថា សកម្មជនតវ៉ាដែលត្រូវបានចាប់ខ្លួនទាំងនេះ គឺជាផ្នែកមួយដែលនាំឲ្យរាំងស្ទះដល់ការអនុវត្តគោលនយោបាយ។ លោក អំ សំអាត មើលមិនឃើញទាល់តែសោះថា អ្នកដែលត្រូវចាប់ខ្លួនទាំងនោះ មានបទល្មើស ត្រូវចោទប្រកាន់តាមផ្លូវតុលាការ ក្រៅពីហេតុផលតែម្យ៉ាង គឺចង់កេងចំណេញផ្នែកនយោបាយប៉ុណ្ណោះនោះ។
ដោយឡែក លោក ណៃ វង់ដា មន្ត្រីការពារសិទ្ធិមនុស្ស សមាគមអាដហុក វិញយល់ឃើញថា ដើម្បីទប់ទល់ការចង់បានពីខាងគណបក្សសង្គ្រោះជាតិ រឿងការកែទម្រង់ គ.ជ.ប ថ្មី គណបក្សកាន់អំណាច ត្រូវអនុវត្តគោលនយោបាយដូចនេះ ព្រោះគណបក្សប្រជាជនកម្ពុជាមើលឃើញរួចជាស្រេចទៅហើយថា អ្នកត្រូវចាប់ខ្លួនទាំងនេះ គឺសុទ្ធសឹងជាសន្លឹកបៀរដែលអាចយកប្រៀបលើគណបក្សប្រឆាំងបាន។ ជាពិសេសដើម្បីចាប់បង្ខំឲ្យគណបក្សសង្គ្រោះជាតិបន្ទន់ឥរិយាបថ ក្នុងការទាមទារបានខ្លះ។
បើទោះជាយ៉ាងណា កាលពីពេលថ្មីៗនេះ លោកនាយករដ្ឋមន្ត្រី ហ៊ុន សែន បានអះអាងហើយថា ការចាប់ខ្លួនអ្នកដែលបិទផ្លូវ ឬ អ្នកផ្សេងទៀតនេះ វាមិនជាប់ទាក់ទិនរឿងនយោបាយឡើយ ក៏ប៉ុន្តែថានេះ គឺជាបទល្មើស ហើយរដ្ឋាភិបាលក៏ពុំមានសិទ្ធិណាមួយនោះទៀតផង ក្នុងការបង្គាប់បញ្ជាលើតុលាការ។
នៅមុនពិធីរំសាយម៉ោង ជិត ១២ ថ្ងៃត្រង់ ពោលគឺចាប់ពីព្រឹកថ្ងៃ អាទិត្យ ក្រៅពីក្រុមអ្នកអ្នកតវ៉ា បានរៀបចំពិធី តាមបែបព្រះពុទ្ធសាសនាហើយ ក្នុងនោះក៏មានការសូត្រកំណាព្យ ច្រៀងចម្រៀងដែលនិយាយពីការ ប្រើអំណាចរបស់រដ្ឋាភិបាល ប្រឆាំងពលរដ្ឋ ដែលហ៊ានតស៊ូដើម្បីសិទ្ធិរស់នៅដោយសមរម្យ។ បើទោះជាបែបណា ការតវ៉ានេះ ពុំមានការបង្ក្រាប ឬទប់ស្កាត់ការជួបជុំឡើយ។ កម្លាំងមានសមត្ថកិច្ចមួយចំនួន ត្រូវបានដាក់ពង្រាយដើម្បីឃ្លាំមើល ប៉ុណ្ណោះ ។
យ៉ាងណាមន្ត្រីការពារសិទ្ធិមនុស្ស សមាគមអាដហុក លោក ណៃ វង់ដា ដែលចុះឃ្លាំមើលសកម្មភាពនេះ យល់ឃើញថា កម្លាំងតវ៉ារបស់ប្រជាពលរដ្ឋនៅពេលនេះ វាហាក់នៅស្ដួចស្ដើងនៅឡើយ។ លោកថ្លែងថា ដើម្បីជំរុញឲ្យរឿងនេះ កាន់តែមានសម្ពាធដល់រដ្ឋាភិបាល គប្បីមានអ្នកចូលរួមច្រើនជាងនេះ។បន្ថែមពីលើនេះលោក អះអាងថា អង្គការសង្គមស៊ីវិល និងសហគមន៍ដីធ្លី នឹងធ្វើញត្តិរួមគ្នា ក្នុងពេលខាងមុខនេះ មុននឹងធ្វើយុទ្ធនាការហែជាក្បួន ដើម្បីទាមទារឲ្យមានការដោះលែង អ្នកដែលត្រូវចាប់ខ្លួនទាំងនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។