[អានអត្ថបទជា ភាសាអង់គ្លេស៖ China sends 2 more ships to Cambodia's Ream naval base]
រដ្ឋាភិបាលចិនទំនងជាបានបញ្ជូននាវាចម្បាំង ២គ្រឿងទៀតមកកាន់មូលដ្ឋានកងទ័ពជើងទឹករាម។ រូបភាពផ្កាយរណបដែលវិទ្យុអាស៊ីសេរីទទួលបានបង្ហាញថា នាវាចម្បាំងទាំង ២ គ្រឿងនេះ ត្រូវបានគេមើលឃើញកាលពីថ្ងៃទី១៧ កុម្ភៈ។ នាវាទាំងពីរគ្រឿងនេះ បានចូលចតនៅកំពង់ផែថ្មីដែលចិនបានស្ថាបនាក្នុងមូលដ្ឋានទ័ពរាម នៅទល់មុខគ្នានឹង នាវាចម្បាំងចិនពីរគ្រឿងទៀតដែលបានចតនៅទីនោះ តាំងតែពីឆ្នាំមុន។
វិទ្យុអាស៊ីសេរីមិនទាន់អាចទាក់ទងក្រសួងការពារជាតិ ដើម្បីសាកសួរអំពីរឿងនេះបាននៅឡើយទេ គិតត្រឹមយប់ថ្ងៃទី ១៨ កុម្ភៈ។
អត្ថបទដែលទាក់ទង៖
នាវាចម្បាំងចិន ២គ្រឿង បន្តចតនៅកំពង់ផែរាម ទោះជាសមយុទ្ធនាគមាសបិទបញ្ចប់ទៅជាង១ខែក្តី
នាវាចម្បាំងចិន បន្តចូលចតនៅកំពង់ផែរាម
ប្រភពមួយចំនួនបានប្រាប់វិទ្យុអាស៊ីសេរីកាលពីឆ្នាំមុនថា ចិននឹងប្រគល់គ្រឿងបរិក្ខារថ្មីៗជាច្រើននៅឯមូលដ្ឋានទ័ពរាម បូករួមទាំងកំពង់ផែ និងនាវាចម្បាំង ២ គ្រឿងផងដែរ ដល់កម្ពុជា។ ជាការតបស្នង ក្រុមអ្នកវិភាគយល់ថា វាទំនងជាប្រទេសទាំងពីរបានឈានដល់កិច្ចព្រមព្រៀង ដែលអនុញ្ញាតឱ្យកងទ័ពជើងទឹកចិនមានសិទ្ធិប្រើប្រាស់មូលដ្ឋានទ័ពថ្មីនេះ។
ការមកដល់នៃនាវាចម្បាំងចិនពីរគ្រឿងទៀតនៅពេលនេះ អាចបញ្ជាក់ថា ការផ្ទេរនាវាចម្បាំងពីរគ្រឿងដល់កម្ពុជានោះ នឹងជិតមកដល់ហើយ។
កាលពីថ្ងៃទី៩ កុម្ភៈ រដ្ឋមន្ត្រីការពារជាតិ លោក ទៀ សីហា និងឪពុករបស់លោក គឺលោក ទៀ បាញ់ បានចុះទៅត្រួតពិនិត្យវឌ្ឍនភាពនៃទំនើបកម្មមូលដ្ឋានទ័ពរាម ដោយមានការចូលរួមពីឯកអគ្គរដ្ឋទូតចិន លោក វ៉ាង វិនពីន (Wang Wenbin) ផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។