នៅសល់៣ថ្ងៃទៀតទេ ពេលវេលានៃការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២២នេះ នឹងផុតកំណត់ហើយ។
គណៈកម្មាធិការជាតិរៀបចំការបោះឆ្នោត (គ.ជ.ប) បានបើកឲ្យប្រជាពលរដ្ឋ ដែលគ្រប់អាយុបោះឆ្នោតទៅពិនិត្យបញ្ជីឈ្មោះ និងចុះឈ្មោះបោះឆ្នោតសម្រាប់ឆ្នាំ២០២២ នេះ ចាប់តាំងពីថ្ងៃទី២០ ខែតុលា ហើយនឹងបិទបញ្ចប់ត្រឹមថ្ងៃទី៨ ធ្នូខាងមុខ។
អំឡុងពេលនេះ គ.ជ.ប បន្តអំពាវនាវឱ្យពលរដ្ឋទៅពិនិត្យបញ្ជីឈ្មោះ និងចុះឈ្មោះបោះឆ្នោតនៅតាមបណ្តាសាលាឃុំ-សង្កាត់ ឬនៅតាមភូមិមួយចំនួនក្នុងឃុំ-សង្កាត់ ទូទាំងប្រទេស ឬតាមរយៈគេហទំព័រ និងកម្មវិធីទូរស័ព្ទដៃ។
គណៈកម្មាធិការជាតិរៀបចំការបោះឆ្នោត (គ.ជ.ប) កាលពីថ្ងៃទី០៤ ខែធ្នូ បានចេញផ្សាយលទ្ធផលបណ្ដោះអាសន្ន សម្រាប់រយៈពេល៤៥ថ្ងៃ នៃការពិនិត្យបញ្ជីឈ្មោះ និងការចុះឈ្មោះបោះឆ្នោត នៅទូទាំងប្រទេស។ ក្នុងនោះជាបណ្ដោះអាសន្នមានពលរដ្ឋចំនួនជាង ៥សែន ៣ម៉ឺន៦ពាន់នាក់ (៥៣៦.៥៩៧នាក់) បានទៅពិនិត្យ និងចុះឈ្មោះបោះឆ្នោតថ្មី។
លទ្ធផលបណ្ដោះអាសន្នរបស់ គ.ជ.ប នេះ ក៏បង្ហាញដែរថា អ្នកដែលនឹងត្រូវលុបឈ្មោះចេញពីបញ្ជីបោះឆ្នោតសរុបមានចំនួនជាង ២សែន ៣ម៉ឺន៨ពាន់នាក់ (២៣៨.២០៥នាក់)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។