[អានអត្ថបទជា អង់គ្លេស៖ EXCLUSIVE: $7 million in Cambodian Red Cross donations tied to alleged cyberscammers]
កាកបាទក្រហមកម្ពុជា ដែលដឹកនាំដោយភរិយាលោក ហ៊ុន សែន គឺអ្នកស្រី ប៊ុន រ៉ានី បានទទួលជំនួយជាង ៧លានដុល្លារ ពីក្រុមហ៊ុន និងក្រុមបុគ្គល ដែល ពាក់ព័ន្ធនឹងអំពើឧក្រិដ្ឋកម្មនៅប្រទេសកម្ពុជាផង និងអន្តរជាតិផង។ សង្គមស៊ីវិល ជាតិ និងអន្តរជាតិ ទាមទារឱ្យស៊ើបអង្កេត ចំពោះការបរិច្ចាគខុសប្រក្រតីនេះ។
ការស៊ើបអង្កេតមួយរបស់វិទ្យុអាស៊ីសេរី រកឃើញថា ចាប់តាំងពីឆ្នាំ២០២០មក កាកបាទក្រហមកម្ពុជារបស់អ្នកស្រី ប៊ុន រ៉ានី ហ៊ុន សែន បានទទួលអំណោយជាង ៧លានដុល្លារ (៧.២) ពីក្រុមហ៊ុន និងក្រុមបុគ្គល ដែលទាក់ទងអំពើបោកប្រាស់ និងការរំលោភសិទ្ធិមនុស្ស។
យោងតាមការស៊ើបអង្កេតនេះ អ្នកដែលបានផ្ដល់ជំនួយគូរឱ្យកត់សម្គាល់ ក្នុង រយៈពេល ៤ឆ្នាំចុងក្រោយមានទាំងអ្នកជំនួញខ្មែរ និងបរទេស ជាពិសេសជនជាតិចិន។ លោក ចេន ហ្ស៊ី (Chen Zhi) ប្រធានក្រុមហ៊ុន ព្រីនស៍ គ្រូប(Prince Group) ដែលពាក់ព័ន្ធ នឹងការជួញដូរមនុស្ស និងការបោកប្រាស់ដោយបង្ខំបានបរិច្ចាគលុយ ចំនួន ២លានដុល្លារដល់កាកបាទក្រហមរបស់អ្នកស្រី ប៊ុន រ៉ានី ចន្លោះពីឆ្នាំ ២០២១ និងឆ្នាំ ២០២៤។ រីឯ ឧកញ៉ា ទ្រី ភាព ដែលល្បីល្បាញក្នុងឧក្រិដ្ឋកម្មបំផ្លាញ ព្រៃឈើខុសច្បាប់ និងរងទណ្ឌកម្មពីសហរដ្ឋអាមេរិក បានផ្ដល់លុយចំនួន ៣០ ម៉ឺនដុល្លារ (៣០០.០០០$) ក្នុងមួយឆ្នាំ ដល់កាកបាទក្រហមចាប់ពីឆ្នាំ ២០២១មក។
ចំណែកអ្នកជំនួញជនជាតិចិនឈ្មោះ លី តាវ (Li Tao) ដែលរងទណ្ឌកម្មពី សហរដ្ឋអាមេរិកដែរ ក្នុងរឿងរំលោភសិទ្ធិមនុស្ស បានផ្ដល់លុយជិត ២លានដុល្លារ (១.៩) ក្នុងរយៈពេល ៤ឆ្នាំ។ បន្ថែមលើនេះ អ្នកជំនួញឈ្មោះ ឈិន អាយឡែន (Chen AI Len) នាយក សណ្ឋាគារ ខេប៊ី (K.B. Hotel) ដ៏មានរឿងចម្រូងចម្រាស ល្បីល្បាញក្នុងករណីជួញដូរមនុស្ស ដែលត្រូវបានរដ្ឋាភិបាលអង់គ្លេសដាក់ទណ្ឌកម្មនោះ បានផ្ដល់លុយ ១១ម៉ឺនដុល្លារ ដល់កាកបាទក្រហមរបស់អ្នកស្រី ប៊ុន រ៉ានី ក្នុងឆ្នាំ២០២១។
លើសពីនេះទៀតមូលនិធិមួយ ដែលទាក់ទងនឹងក្រុមហ៊ុន ចឹង ហេងគ្រុប (Zheng Heng Group) ដែលត្រូវបានដាក់ទណ្ឌកម្ម ដោយរដ្ឋាភិបាលអង់គ្លេសដែរ ជុំវិញ រឿងបោកប្រាស់បានផ្ដល់ចំនួន ១០ម៉ឺនដុល្លារ (១០០.០០០) ដល់កាកបាទក្រហម ក្នុងឆ្នាំ២០២៤ ខណៈម្ចាស់ជំនួយផ្សេងៗទៀត ដែលពាក់ព័ន្ធនឹងអំពើបោកប្រាស់ ដូចជា ក្រុមហ៊ុន ជីនប៉ី គ្រូប (Jin Bei Group) ជាដើម បានផ្ដល់លុយ ២ម៉ឺនដុល្លារ (២០.០០០) ក្នុងឆ្នាំ២០២៤ ក្នុងគ្រាដែលមានព័ត៌មានទាក់ទងនឹងក្រុមហ៊ុននេះ អំពី ការជួញដូរមនុស្សនៅខេត្តព្រះសីហនុ និងការជួញដូរមនុស្សតាមប្រព័ន្ធ អ៊ីនធឺណិត នៅប្រទេសកម្ពុជា។
ការស៊ើបអង្កេតរបស់វិទ្យុអាស៊ីសេរី រកឃើញដែរថា អ្នកជំនួញជនជាតិខ្មែរ កើតនៅប្រទេសមីយ៉ាន់ម៉ា (Myanmar) ឬភូមា លោក ឯក ផង (Aik Paung) ដែលមានសេចក្ដីរាយការណ៍ ពាក់ព័ន្ធនឹងអំពើឆបោកនៅខេត្តព្រះសីហនុ បានបរិច្ចាគលុយយ៉ាងតិច ១៤ម៉ឺនដុល្លារ (១៤០.០០០) ឱ្យកាកបាទក្រហមអ្នកស្រី ប៊ុន រ៉ានី ចាប់ពីឆ្នាំ២០២០មក ។
អ្នកផ្ដល់ជំនួយធំម្នាក់ទៀត ដល់កាកបាទក្រហមរបស់អ្នកស្រី ប៊ុន រ៉ានី ហ៊ុន សែន គឺ ឧកញ៉ា លី យ៉ុងផាត់ ប្រធានសមាគមឧកញ៉ាកម្ពុជា ដែលរងទណ្ឌកម្មពីសហរដ្ឋអាមេរិក។ ក្នុងរយៈពេល ៣ឆ្នាំចុងក្រោយនេះ ឧកញ៉ា លី យ៉ុងផាត់ បានផ្ដល់លុយជាបុគ្គល ឱ្យកាកបាទក្រហមជិត ៧០ម៉ឺនដុល្លារ (៦៦០.០០០)។ លើសពីនេះលោក លី យ៉ុងផាត់ ក៏បានសម្របសម្រួលដោយឡែកពីគ្នា ឱ្យមានការបរិច្ចាគរួម ពីសមាគមឧកញ៉ាកម្ពុជាសរុបជិត ៣លានដុល្លារ ឱ្យកាកបាទក្រហមអ្នកស្រី ប៊ុន រ៉ានី។
វិទ្យុអាស៊ីសេរី មិនអាចសុំការបំភ្លឺជុំវិញរឿងនេះ ពីអគ្គលេខាធិការនៃអគ្គលេខាធិការដ្ឋានកាកបាទក្រហមកម្ពុជា អ្នកស្រី ពុំ ចន្ទីនី និងអគ្គលេខាធិការរងទី១ នៃកាកបាទក្រហមកម្ពុជា អ្នកស្រី មែន នារីសោភ័គ បានទេ នៅថ្ងៃទី១៦ ខែកុម្ភៈ។ រីឯលោក ឱម យ៉ិនទៀង ប្រធានអង្គភាពប្រឆាំងអំពីពុករលួយ ប្រាប់វិទ្យុអាស៊ីសេរី នៅថ្ងៃទី១៦ ខែកុម្ភៈនេះ ថា លោកជាប់រវល់កិច្ចការការទូត។
លោក ឱម យ៉ិនទៀង៖ «សុំទោសខ្ញុំកំពុងធ្វើការជាមួយស្ថានទូតមួយ»។
សាស្ត្រាចារ្យ និងអ្នកជំនាញកិច្ចការកម្ពុជាលោក អៀ សុផល មានប្រសាសន៍ថា កាកបាទក្រហមកម្ពុជា ដែលដឹកនាំដោយភរិយាលោក ហ៊ុន សែន ជាផ្នែកមួយរបស់គណបក្សប្រជាជនកម្ពុជា ហើយពួកឧកញ៉ាល្បីៗ បរិច្ចាគលុយច្រើនដល់ស្ថាប័ននេះ ដើម្បីទទួលបានការការពារ និងការអនុគ្រោះអាជីវកម្មរបស់ពួកគេ។
អត្ថបទដែលទាក់ទង៖
[ ពលរដ្ឋរងភាពអយុត្តិធម៌សង្គមរិះគន់កាកបាទក្រហមថា ជាស្ថាប័នរើសអើងជនរងគ្រោះOpens in new window ]
មន្ត្រីសង្គមស៊ីវិល៖ កាកបាទក្រហម «គួរតែបំភ្លឺ» ពីភាពមិនប្រក្រតីទាំងនេះ
ប្រធានសមាគមការពារសិទ្ធិមនុស្សអាដហុក លោក នី សុខា ប្រាប់វិទ្យុអាស៊ីសេរីថា កាកបាទក្រហម និងស្ថាប័នពាក់ព័ន្ធ គួរតែចេញបំភ្លឺឱ្យបានច្បាស់លាស់ ពាក់ព័ន្ធនឹងការស៊ើបអង្កេត ឃើញអំពីភាពមិនប្រក្រតីទាំងនេះ ពីព្រោះកាកបាទក្រហមកម្ពុជា ជាអង្គការធ្វើការងារលើវិស័យសប្បុរសធម៌ ដែលអាចទទួលយកជំនួយស្អាតស្អំប៉ុណ្ណោះ។
លោក នី សុខា៖ «មានន័យថា យើងជួយមនុស្សដែលមានលក្ខណៈរងគ្រោះ ក៏ប៉ុន្តែបើយើងមានការពាក់ព័ន្ធជាមួយនឹងលុយ ដែលមិនត្រឹមត្រូវ លុយដែលមិនស្អាតស្អំ មានន័យថា លុយដែលបានពីអំពើដែលធ្វើឱ្យមនុស្សរងគ្រោះ អ៊ីចឹងយើងយកទៅជួយមនុស្សដែលរងគ្រោះវាហាក់បីដូចជា អត់មានភាពមួយសាកសម។ ដូច្នេះ ខ្ញុំគ្រាន់តែយល់ថា ខ្ញុំក៏មិនច្បាស់ដែរ អំពីរឿងទាំងអស់ហ្នឹង។ ប៉ុន្តែប្រសិនបើមានរបាយការណ៍ហ្នឹង កើតឡើង ខ្ញុំគិតថា អង្គភាពផ្សេងៗ ដើម្បីធ្វើការស្រាវជ្រាវ ដើម្បីវែកញែករឿងហ្នឹង ឱ្យបានច្បាស់ ដើម្បីជៀសវាងកុំឱ្យមានការយល់ច្រឡំពីមហាជនកុំឱ្យមានការចោទប្រកាន់ផ្សេងៗ»។
កាកបាទក្រហមកម្ពុជា គឺជាសមាជិកនៃបណ្ដាញកាកបាទក្រហម និងអឌ្ឍចន្ទ ក្រហមអន្តរជាតិ (IFRC)។ កាកបាទក្រហមកម្ពុជា មិនមែនទទួលបានត្រឹមតែការបរិច្ចាគពីសប្បុរសជនក្នុងស្រុកទេ ប៉ុន្តែថែមទាំងបានជំនួយពីកាកបាទក្រហម និង អឌ្ឍចន្ទក្រហមអន្តរជាតិដែរ។
ក្នុងសេចក្ដីថ្លែងការណ៍របស់ខ្លួន កាកបាទក្រហមនិងអឌ្ឍចន្ទក្រហមអន្តរជាតិ បានផ្ដល់ជំនួយដល់កាកបាទក្រហមកម្ពុជា ជាង ២៨ម៉ឺនដុល្លារ (២៨៦.០០០) ក្នុងពេល ៥ឆ្នាំចុងក្រោយនេះ។ ដោយឡែក ឯកសារសវនកម្មរបស់កាកបាទក្រហមកម្ពុជា ដែលបានដាក់ជូនកាកបាទក្រហម និងអឌ្ឍចន្ទក្រហមអន្តរជាតិ បង្ហាញថា កាកបាទក្រហមកម្ពុជាទទួលបានការបរិច្ចាគជាង ២៩ម៉ឺនលានដុល្លារ (២៩.៨) ពីឆ្នាំ២០២២ ដល់ឆ្នាំ២០២៣ ហើយកាកបាទក្រហមកម្ពុជា មានលុយជិត ១៧០លានដុល្លារ ក្នុងធនាគារចំនួនបី។
កាកបាទក្រហម និងអឌ្ឍចន្ទក្រហមអន្តរជាតិ បានប្រាប់វិទ្យុអាស៊ីសេរីថា ខ្លួនយកចិត្តទុកយ៉ាងខ្លាំង ចំពោះការចោទប្រកាន់ដែលអាចជឿទុកចិត្តបាន អំពីការរំលោភលើគោលការណ៍សុចរិតភាពរបស់កាកបាទក្រហមកម្ពុជា។ ការចោទប្រកាន់ទាំងនោះ រួមមាន ការគ្រប់គ្រងមូលនិធិមិនត្រឹមត្រូវ ការក្លែងបន្លំ អំពើពុករលួយ និងការរំលោភបំពានសិទ្ធិអំណាចជាដើម។
អ្នកជំនាញកិច្ចការជួញដូរមនុស្សនៅអាស៊ីអាគ្នេយ៍ លោក យ៉ាកុក ស៊ីម (Jacob Sims)ប្រាប់វិទ្យុ អាស៊ីសេរីថា របៀបបរិច្ចាគរបស់ឈ្មួញទាំងឡាយនោះ បង្ហាញច្បាស់ថា កាកបាទក្រហមកម្ពុជា គឺជាយន្តការមួយក្នុងចំណោមយន្តការជាច្រើនផ្សេងទៀត សម្រាប់បង្ហូរលុយឧបត្ថម្ភ ឱ្យឥស្សរជនកំពូលៗ ក្នុងប្រព័ន្ធពុករលួយដ៏ជ្រៅមួយ។
កាលនៅជាតំណាងរាស្ត្រ លោក លិម គិមយ៉ា ធ្លាប់និយាយក្នុងកិច្ចប្រជុំរដ្ឋសភាកាលពីឆ្នាំ ២០១៥ ថា កាកបាទក្រហមកម្ពុជារបស់អ្នកស្រី ប៊ុន រ៉ានី មានការរើសអើងនិន្នាការនយោបាយក្នុងការផ្ដល់ជំនួយមនុស្សធម៌ដល់ជនរងគ្រោះ។
លោក លិម គិមយ៉ា៖«អង្គការកាកបាទក្រហមខ្មែរ មានការរើសអើងក្នុងការជួយដល់ប្រជាពលរដ្ឋ ដែលគ្នាទទួលរងគ្រោះដោយគ្រោះមហន្តរាយ។ បើអ្នករងគ្រោះហ្នឹងមិនមែនជាអ្នកគាំទ្រគណបក្សប្រជាជនកម្ពុជាទេ អ្នកទទួលរងគ្រោះនោះច្បាស់ជាមិនទទួលបានជំនួយពីអង្គការកាកបាទក្រហមខ្មែរទេ»។
គ្រានោះ លោក ហ៊ុន សែន ដែលកំពុងស្ថិតនៅក្នុងកិច្ចប្រជុំរដ្ឋសភានោះដែរ បានផ្ទុះកំហឹង ហើយបានបបួលលោក លិម គិមយ៉ា ទៅស្បថឱ្យស្លាប់ទៀតផង។
លោក ហ៊ុន សែន៖«ឥឡូវរឿងកាកបាទក្រហមចែកជំនួយរើសមុខមាត់នេះ តើហ៊ានស្បថឱ្យរន្ទះបាញ់ទេ?ឥឡូវខ្ញុំនិយាយជាសាធារណៈនៅក្នុងសភា តើគណបក្សនានាហ៊ានស្បថទេជាមួយនឹងគណបក្សប្រជាជនមុខព្រះអង្គដងកើ?»
លោក លិម គិមយ៉ា ត្រូវបានខ្មាន់កាំភ្លើងជនជាតិថៃឈ្មោះ ឯកាឡាក់ ផែណយ (Ekkalak Phaenoi) បាញ់សម្លាប់កាលពីថ្ងៃទី៧ ខែមករា។ ជនសង្ស័យជនជាតិខ្មែរពីរនាក់ទៀត ដែលស្ថិតនៅកម្ពុជា មិនត្រូវបានរដ្ឋាភិបាលត្រកូលហ៊ុន ចាប់បញ្ជូនទៅឱ្យតុលាការថៃ អនុវត្តដំណើរការក្ដីឡើយ ក្នុងរយៈពេលជាងមួយខែមកនេះ បើទោះបីជាមានដីការបស់តុលាការព្រហ្មទណ្ឌថៃ និងប៉ូលិសអន្តរជាតិអាំងទែប៉ូល ចេញសេចក្ដីសម្រេចតាមចាប់ខ្លួនក៏ដោយ។
នាយកអង្គការតស៊ូមតិសិទ្ធិមនុស្ស និងការងារអាស៊ី (AHRLA) លោក ហ្វីល រ៉ូប៊ឺតសុន(Phil Robertson) ប្រាប់វិទ្យុអាស៊ីសេរីថា ការបរិច្ចាគរបស់អ្នកជំនួញទាំងឡាយ មើលទៅដូចស្ម័គ្រចិត្ត ប៉ុន្តែអ្នកបរិច្ចាគជាប់ទាក់ទងដោយផ្ទាល់ទៅនឹងសហគ្រាសបោកប្រាស់ និងឧក្រិដ្ឋកម្ម។ លោកថា ក្រុមអ្នកទាំងនេះ កំពុងតែបង្កឱ្យមានការខូចខាតជាសកល ដូច្នេះ កាកបាទក្រហមអន្តរជាតិ គួរមានជំហរ និងវិធានការច្បាស់លាស់ ចាត់ការចំពោះរឿងនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។