អ្នកស្នាក់នៅក្នុងតំបន់ក្រហម កំពុងប្រឈមបញ្ហាខ្វះទាំងអាហារ និង ទឹកដោះគោសម្រាប់ទារក។ ការត្អូញត្អែរនេះ គឺផ្ទុយពីការប្រកាសរបស់លោកនាយករដ្ឋមន្ត្រី ហ៊ុន សែន ដែលបញ្ជាឲ្យអាជ្ញាធរពាក់ព័ន្ធជួយសម្របសម្រួលក្នុងការលក់ដូរ និងចែកស្បៀងអាហារមានគ្រឿងឧបភោគ និងបរិភោគដល់មុខផ្ទះប្រជាពលរដ្ឋក្នុងតំបន់ក្រហម។
កម្មការិនីម្នាក់ស្នាក់នៅបន្ទប់ជួលនៃតំបន់ក្រហមក្នុងសង្កាត់ចោមចៅទី១ ខណ្ឌពោធិ៍សែនជ័យលោកស្រី កើត ស៊ីនឿន និងមានកូនតូចអាយុ ៤ ខែក្នុងបន្ទុក រៀបរាប់ថា លោកស្រីនិងប្ដី បាត់បង់ការងារដូចគ្នាដោយសារវិបត្តិជំងឺកូវីដ១៩ (Covid-19)។
ក្រៅពីប្រឈមម្ហូបអាហារ គ្រួសារកម្មករមួយនេះ ក៏ប្រឈមគ្មានទឹកដោះគោសម្រាប់បំបៅកូនតូចដែរ។ លោកស្រី កើត ស៊ីនឿន ប្រាប់ថា អាជ្ញាធរបានបិទផ្សារ បិទទីតាំងលក់ដូរនានា និងបិទខ្ទប់ មិនឲ្យកម្មករចេញពីបរិវេណបន្ទប់ជួលទេ ដូច្នេះពួកគាត់គ្មានលទ្ធភាពរកទិញម្ហូបអាហារ និងទឹកដោះគោឲ្យកូនទេ។ ស្ត្រីសរសៃខ្ចីរូបនេះ ស្នើសុំអាជ្ញាធរជួយឧបត្ថម្ភស្បៀងអាហារ និងទឹកដោះគោសម្រាប់កូនតូចរបស់លោកស្រីផង៖ « ពួកខ្ញុំហ្នឹង សំណូមពរឲ្យខាងក្រសួង រដ្ឋាភិបាលអ្វីហ្នឹង ជំនួយឧបត្ថម្ភអ្វីហ្នឹង។ ខ្ញុំគ្រាន់តែចង់ឲ្យពួកគាត់ហ្នឹងមកជួយមើលពួកខ្ញុំផង ហើយពួកខ្ញុំគ្មានស្បៀងអ្វីហូបទេ ឥឡូវនេះ។ ខ្ញុំគ្មានបានត្រៀមអ្វីផង ដោយសារមិនដឹងថា គេបិទអ្វីថ្ងៃណា គ្រាន់តែថា ចេញមកគេបិទឈឹងតែម្ដង»។
ចំណែកអ្នករត់រ៉ឺម៉ក់កង់បីម្នាក់ទៀតដែលរស់នៅជិតតំបន់ក្រហម ក្នុងសង្កាត់បឹងសាឡាង ខណ្ឌទួលគោក លោក ហៀង សុភក្ត្រា ក៏អះអាងថា អាជ្ញាធរមូលដ្ឋាន មិនទាន់ចុះចែកអំណោយ ឲ្យអ្នកភូមិដែរ។ លោកបញ្ជាក់ថា ស្ថានភាពអ្នកភូមិម្នាក់ៗ ប្រឈមបញ្ហាធ្ងន់ធ្ងរ គឺគ្មានអាហារបរិភោគ ព្រោះគ្មានទាំងប្រាក់ និងមិនអាចចេញទៅផ្សារបាន។ លោកសំណូមពរអាជ្ញាធរពន្លឿនការចែកស្បៀងអាហារ ដល់អ្នកក្រីក្រ ទាំងក្នុងតំបន់ក្រហម និងក្នុងតំបន់រងការបិទខ្ទប់ផ្សេងទៀត៖ « ទ្រាំនៅតែក្នុងផ្ទះរហូតហ្នឹងបង។ អត់មានធ្វើអ្វីកើតទេ ព្រោះអ្វី យើងចេញក្រៅផ្ទះក៏អត់បាន។ យើងទៅណា ក៏អត់បាន។ យើងនៅតែក្នុងផ្ទះសុទ្ធ ហើយពាងអង្ករយើង កាលពីជំនាន់យើងនៅចេញរកលុយបានហ្នឹង បានតែមួយត្រឹមហូប ហើយនិងបង់លុយធនាគារតិចតួចៗ ទៅ។ ដល់តែពេលមកឈឹបអ៊ីចឹង យើងអត់មានលុយទុកសម្រាប់ខ្លួន។ ពួកខ្ញុំ លំបាកមែនទែនបងអើយ ! ជួយផ្សព្វផ្សាយដល់អាជ្ញាធរដែនដី និងរដ្ឋាភិបាលឲ្យបានដឹងពីស្ថានភាពពួកខ្ញុំផង។ អត់មានអ្វីហូបទេបង ៤ថ្ងៃ ថ្ងៃហ្នឹងហើយ»។
អាជ្ញាធររាជធានីភ្នំពេញកាលពីយប់ថ្ងៃទី១៩ ខែមេសា បានបន្ថែមបម្រាមតឹងរ៉ឹងមួយទៀតសម្រាប់អ្នករស់នៅតំបន់ដែលមានឆ្លងជំងឺកូវីដ១៩ច្រើន គឺការដាក់ ភូមិ ឬ សង្កាត់ នោះ ជាតំបន់ក្រហម មានដូចជា ភូមិ១៤ ភូមិ១៦ និងភូមិ១៧ ក្នុងសង្កាត់បឹងសាឡាង សង្កាត់ស្ទឹងមានជ័យ១ទាំងមូល សង្កាត់ស្ទឹងមានជ័យទី២ និងស្ទឹងមានជ័យទី៣ នៃខណ្ឌមានជ័យ និង សង្កាត់ចោមចៅទី១ នៃខណ្ឌពោធិ៍សែនជ័យ។
ពលរដ្ឋគ្រប់រូបដែលកំពុងស្នាក់នៅក្នុងតំបន់ក្រហមនេះមិនអាចចេញក្រៅលំនៅឋាន របស់ខ្លួនជាដាច់ខាត។ ក្នុងករណីល្មើស នឹងបម្រាបនេះ អាជ្ញាធរនឹងពិន័យជាទឹកប្រាក់ចន្លោះពីមួយ (១.០០០.០០០) លានរៀល ដល់ទៅម្ភៃ (២០.០០០.០០០) លានរៀល និងការផ្ដន្ទាទោស ពន្ធនាគារចន្លោះពី៦ខែ ទៅ៥ឆ្នាំ។
ប៉ុន្តែ អាជ្ញាធរ បានលើកលែងករណីមួយចំនួនឲ្យពលរដ្ឋអាចធ្វើដំណើរបាន ដូចជា មូលហេតុសុខភាពបន្ទាន់ ការទៅផ្ដល់សំណាកធ្វើតេស្តរកជំងឺកូវីដ១៩ និងការទៅចាក់វ៉ាក់សាំងដូសទី២ នៅទីតាំងជិតបំផុត ក្នុងតំបន់ក្រហម។ ជាមួយគ្នានេះ អាជ្ញាធរក៏បានផ្អាកអាជីវកម្មទាំងអស់ បិទផ្សារ និងផ្អាកសកម្មភាពនានា ក្នុងតំបន់ក្រហមទាំងស្រុង។ លើកលែងតែការងារចាំបាច់របស់រដ្ឋ និងតម្រូវការផ្នែកសុខាភិបាលតែប៉ុណ្ណោះ តែត្រូវភ្ជាប់ឯកសារបញ្ជាក់ពីអាជ្ញាធរមានសមត្ថកិច្ច។
ទោះជាយ៉ាងណា រដ្ឋាភិបាលបានបញ្ជាឱ្យក្រសួងពាណិជ្ជកម្ម សម្រួលឱ្យមានការផ្គត់ផ្គង់ ដឹកជញ្ជូន និងចែកចាយស្បៀងអាហារ គ្រឿងឧបភោគបរិភោគ លក់ឱ្យ ពលរដ្ឋក្នុងតំបន់ក្រហម ដល់មុខផ្ទះតែម្ដង។ រដ្ឋាភិបាលក៏ចេញបញ្ជាឱ្យ អាជ្ញាធរ ចាត់ចែងជំនួយសង្គ្រោះបន្ទាន់ ដល់ពលរដ្ឋងាយរងគ្រោះ ក្រីក្រ និងជួបការលំបាកក្នុងតំបន់ក្រហមដែរ។
ទាក់ទងនឹងបញ្ហានេះ តំណាងក្រសួងពាណិជ្ជកម្ម អះអាងថា ក្រសួងបានចាត់ឲ្យមន្ត្រីដឹកជញ្ជូនស្បៀងអាហារ មានអង្ករ និងគ្រឿងឧបភោគបរិភោគនានា ទៅផ្គត់ផ្គង់លក់ឲ្យពលរដ្ឋ ក្នុងតម្លៃទាបជាងទីផ្សារ សម្រាប់អ្នកនៅក្នុងតំបន់ក្រហម។
អ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ ប្រាប់អាស៊ីសេរីថា នៅព្រឹកថ្ងៃទី២០ មេសា ក្រសួងបានដឹកជញ្ជូនស្បៀង តាមឡានធំ ចំនួន៥គ្រឿង យកទៅផ្គត់ផ្គង់ នៅតំបន់ក្រហម ទាំង៣ខណ្ឌ។ លោក បន្តថា ពលរដ្ឋនៅក្នុងតំបន់ក្រហម អាចទូរស័ព្ទ មកកុម្ម៉ង់ទិញស្បៀងអាហារ តាមលេខទូរស័ព្ទ ដែលអាជ្ញាធរមូលដ្ឋានផ្ដល់ឲ្យ ហើយ ក្រសួង នឹងសហការជាមួយអាជ្ញាធរមូលដ្ឋាន ចាត់ចែងឲ្យមានការដឹកជញ្ជូនស្បៀងអាហារ បន្ត តាមរ៉ឺម៉កកង់បី ឬ ម៉ូតូ ទៅលក់ឲ្យពលរដ្ឋ ដល់មុខលំនៅឋាន៖ « ចំណុចទី២ ដែលបងចង់ជម្រាបជូន គឺក្រៅពីទំនិញដែលយើងមានបច្ចុប្បន្ននេះ នៅក្នុងស្ដុកស្រាប់ យើងនឹងខិតខំរកទំនិញចាំបាច់ផ្សេងទៀត សម្រាប់លក់ជូនប្រជាពលរដ្ឋ ដែលឈានទៅដល់ត្រីងៀត មានឆៃប៉ូវ និងទំនិញយុទ្ធសាស្ត្រខ្លះ ដែលអាចប្រើរយៈពេលយូរ»។
តែយ៉ាងណា អ្នកឃ្លាំមើលយល់ថា ដំណោះស្រាយនេះ នឹងមិនសូវមានប្រសិទ្ធភាពទេ ហើយពលរដ្ឋនឹងនៅតែប្រឈមបញ្ហាខ្វះខាតអាហារធ្ងន់ធ្ងរដដែល។ អគ្គលេខាធិការរងនៃសមាគមឯករាជ្យនៃសេដ្ឋកិច្ចក្រៅប្រព័ន្ធលោក កៅ ពឿន ចង់ឲ្យអាជ្ញាធរបើកលំហឱ្យពលរដ្ឋ និងអ្នកលក់ដូរក្រីក្រអាចប្រកបរបរលក់ដូរបានច្រើនជាងនេះ។ លោក យល់ថា អាជ្ញាធរ គួរតែបើកឲ្យមានការលក់ដូរបានច្រើនកន្លែង តែដាក់ទីតាំងលក់ឲ្យនៅដាច់ឆ្ងាយៗពីគ្នា និងអនុញ្ញាតឲ្យពលរដ្ឋចេញក្រៅផ្ទះមកទិញម្ហូបអាហារបណ្ដាក់វេនគ្នាជាដើម៖ « ស្ដាប់សាររបស់សម្ដេច គាត់ថា អនុញ្ញាតឲ្យមានការលក់ដូរម្ហូបអាហារអ្វីខ្លះៗហ្នឹង។ ប៉ុន្តែ ជាការជាក់ស្ដែងគឺម្ហូបអាហារហ្នឹង ឃើញដេញគាត់ អត់ឲ្យលក់ ឲ្យអ្វីទេ ? ហើយសួរថា តើយើងបានអ្វីហូប បើអ្នកលក់ក៏មិនមកលក់បាន។ អត់ដឹងថា គាត់គិតរឿងថា ឲ្យអ្នកលក់ធំដុំអ្វីឯណា ? មិនសូវមានអ្នកលក់ធំដុំឯណា។ បើអ្នកលក់ធំដុំ គេអ្នកមានគេបិទទ្វារអស់ហើយគេខ្លាចមានតែអ្នកលក់អត់ធំដុំហ្នឹងហើយ អាចផ្គត់ផ្គង់ការហូបចុកបាន»។
ក្រៅពីវិធានការបិទតំបន់ក្រហមនេះហើយ អាជ្ញាធររាជធានីភ្នំពេញ កាលពីថ្ងៃទី១៨ ខែមេសា ក៏បានចេញសេចក្ដីសម្រេច ផាកពិន័យអន្តរការណ៍ ចំពោះបុគ្គលមិនគោរពដោយចេតនា នូវវិធានការរដ្ឋបាលរបស់អាជ្ញាធរក្រុង ក្នុងការទប់ស្កាត់ការឆ្លងរាលដាលជំងឺកូវីដ ១៩ និងជំងឺឆ្លងកាចសាហាវ។ ការផាកពិន័យនោះ ក្នុងចន្លោះចាប់ពី ពីរ (២.០០០.០០០) លានរៀល ដល់ប្រាំ (៥.០០០.០០០) លានរៀល។
ក្នុងករណីការបំពានបម្រាបនោះ បណ្ដាលឲ្យឆ្លងជំងឺកូវីដ១៩ អាជ្ញាធរនឹងពិន័យទោសពន្ធនាគារ និងពិន័យប្រាក់បន្ថែម។ បន្ថែមលើការពិន័យនេះ អភិបាលរាជធានីភ្នំពេញ លោក ឃួង ស្រេង បានបញ្ជាតាមសារសំឡេងឱ្យគណៈបញ្ជាខណ្ឌទាំងអស់ឃាត់ខ្លួនអ្នកគ្មានភារៈកិច្ច ដែលនៅតែបន្តធ្វើដំណើរ តាមផ្លូវទាំងអស់ ព្រោះសកម្មភាពនេះ ជាការល្មើស នឹងបម្រាមបិទខ្ទប់ របស់រដ្ឋាភិបាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។