បេះដូងជាសរីរាង្គសំខាន់បំផុតមួយនៃបណ្ដាសរីរាង្គដទៃទៀតក្នុងរូបកាយមនុស្សយើង។ បេះដូងមានតួនាទីជាស្នប់សម្រាប់សប់ឈាមនាំជីវជាតិអាហារ និងខ្យល់អុកស៊ីហ្សែន (Oxygen=O2) ទៅចិញ្ចឹមកោសិការាប់លានកោដិនៅរាយពាសពេញរាងកាយ។ ផ្ទុយពីនេះ បេះដូងក៏មានតួនាទីនាំយកកាកសំណល់ខ្យល់ឧស្ម័នកាបោន (Carbon dioxide = CO2) ទឹក និងសំណល់ចំណីអាហារពីកោសិកាមកវិញដែរ។
ដូច្នេះហើយ នៅពេលណាបេះដូងមានបញ្ហាឈប់ដើរ ឬហៅថា គាំង ឈាមនឹងឈប់រត់ទៅចិញ្ចឹមកោសិកា រាងកាយយើងខ្វះអុកស៊ីហ្សែន កោសិកានឹងស្លាប់ ហើយមនុស្សយើងក៏នឹងស្លាប់ដូចគ្នា។
គ្រូពេទ្យបានឱ្យដឹងថា មូលហេតុដែលនាំឱ្យមានជំងឺបេះដូង គឺបណ្ដាលមកពីមូលហេតុច្រើនយ៉ាង ដូចជារបួស ជំងឺរលាកសាច់ដុំបេះដូង និងជំងឺស្ទះសរសៃឈាមជាដើម ដែលបញ្ហានេះច្រើនកើនចំពោះមនុស្សចាស់មានបញ្ហាលើសឈាម អ្នកជក់បារី អ្នកធាត់ជ្រុល ដែលមានខ្លាញ់កូលេស្ទើរ៉ល (Cholesterol) ច្រើន។
ក្រៅពីនេះជំងឺបេះដូងក៏កើតមានចំពោះកុមារដែរ ដែលកើតមានពីកំណើត គឺបេះដូងប្រហោង ដែលជាបញ្ហាជញ្ជាំងខណ្ឌចែកបន្ទប់បេះដូងមានប្រហោង។ អត្រាបញ្ហាបេះដូងប្រហោង ត្រូវបានគ្រូពេទ្យជំនាញខាងបេះដូងឱ្យដឹងថា នៅតាមមន្ទីរពេទ្យកុមារក្នុងប្រទេសកម្ពុជាបច្ចុប្បន្ន មានកុមារជាច្រើនមានបញ្ហាបេះដូងប្រភេទនេះ ដែលបណ្ដាលមកពីការលូតលាស់របស់បេះដូងមិនបានល្អ ឬលូតលាស់ខុសធម្មតា។
ទីប្រឹក្សាជាន់ខ្ពស់ផ្នែកវះកាត់ប្រអប់ទ្រូង និងបេះដូងនៃមន្ទីរពេទ្យម៉ោនអេលីហ្សាប៊ែត (Mount Elizabeth) និងមន្ទីរពេទ្យគ្លិនីហ្គលស៍ (Gleneagles) នៅប្រទេសសិង្ហបុរី លោកវេជ្ជបណ្ឌិត ស៊្រីមរ៉ាម សាងការ (Shrimram Sangkar) ដែលមានពិសោធន៍ផ្នែកវះកាត់បេះដូងនៅប្រទេសកម្ពុជារយៈពេល ៨ ឆ្នាំ ថ្លែងឱ្យដឹងថា មូលហេតុដែលបណ្ដាលឱ្យកុមារស្លាប់ភាគច្រើននៅតាមបណ្ដាមន្ទីរកុមារនានា ក្នុងប្រទេសកម្ពុជា គឺបញ្ហាបេះដូងខូច ឬហៅថា បេះដូងប្រហោង ច្រើនជាងការស្លាប់បណ្ដាលមកពីមូលហេតុដទៃទៀត។
ទាក់ទងទៅនឹងមូលហេតុ ដែលនាំឱ្យមានបញ្ហាបេះដូង លោកវេជ្ជបណ្ឌិត ស៊្រីមរ៉ាម សាងការ មានប្រសាសន៍ថា បញ្ហាខូចបេះដូង មានសំខាន់ពីរយ៉ាង គឺទីមួយបណ្ដាលមកពីផលវិបាកនៃជំងឺរលាកសន្លាក់ ដែលធ្វើឱ្យខូចវ៉ាល់វ៍ ឬសន្ទះប្រឹសបេះដូង។ ក៏ប៉ុន្តែ នៅពេលបច្ចុប្បន្ននេះ ស្ថិតិពិភពលោកបានថយចុះ។ ទីពីរ បញ្ហារបស់បេះដូងនេះក៏អាចទាក់ទងនឹងថ្នាំដែលម្ដាយប្រើប្រាស់នៅពេលមានផ្ទៃពោះ ឬក៏ម្ដាយមានជំងឺទឹកនោមផ្អែម។