គ្រូពេទ្យបញ្ជាក់ថា មូលហេតុសំខាន់ ដែលនាំឱ្យឈឺឆ្អឹងខ្នង មកពីការសឹកទ្រនាប់កង ឆ្អឹងខ្នងនោះ។
បញ្ហាឈឺឆ្អឹងខ្នង គឺគ្រូពេទ្យនិយាយសំដៅទៅរកបញ្ហាខុសធម្មតានៃទម្រង់ និងមុខងាររបស់ឆ្អឹងខ្នង ចាប់ពីកញ្ចឹងកដល់ចង្កេះ។
ក្នុងសិក្ខាសាលាដែលរៀបចំដោយក្រុមហ៊ុនផ្នែកសុខភាពអន្តរជាតិមួយ ឈ្មោះ អិនធើរមេឌីខា (INTERMEDICA) គ្រូពេទ្យជំនាញឯកទេសផ្នែកឆ្អឹងខ្នង នៅកោះតៃវ៉ាន់ លោកវេជ្ជបណ្ឌិត ឈិន ឈីងឈិន ថ្លែងថា ជំងឺឈឺខ្នង ជាជំងឺមួយពិបាកព្យាបាល។ លោកវេជ្ជបណ្ឌិត ឈីងឈិន បញ្ជាក់ថា មានអាការៈជំងឺជាច្រើនទាក់ទងនឹងឆ្អឹងខ្នង។ បញ្ហាសំខាន់មួយនៃជំងឺឆ្អឹងខ្នង គឺសឹករិចរិលទ្រនាប់ឆ្អឹងកងខ្នង ដែលភាសាអង់គ្លេស ហៅថា ឌីស (Disc)។
លោកវេជ្ជបណ្ឌិត ឈីងឈិន ពន្យល់ថា បញ្ហាដែលនាំឱ្យមានជំងឺឈឺខ្នង ជាទូទៅមានមូលហេតុធំៗ ចំនួន ៣ គឺទីមួយ មកពីអាយុយើងចាស់ជរាជាធម្មជាតិ។ ទីពីរ មកពីជំហរឥរិយាបថរបស់យើងមិនត្រឹមត្រូវ និងទីបី ដោយសារតែការរងរបួសគ្រោះថ្នាក់ ឬការប៉ះទង្គិចផ្សេងៗ។ តាមរយៈការបកប្រែជាភាសាខ្មែរ លោកវេជ្ជបណ្ឌិត ឈីងឈិន លើកបង្ហាញរូបភាពជាឧទាហរណ៍មួយមកពន្យល់ថា ការឈរ ឬអង្គុយកាច់ឆ្អឹងខ្នងខុសទំនង ក៏ជាមូលហេតុមួយដែរ។
សំឡេង៖ «ទីមួយគឺរូបភាពបង្ហាញឌីសឆ្អឹងកងរបស់យើង ទីមួយគឺមានសរសៃព័ទ្ធជុំវិញឆ្អឹងកង និងទីពីរ គឺស្នូលនៃឌីស។ ឌីសរបស់យើង នៅពេលដែលអាកប្បកិរិយារបស់យើង ជំហររបស់យើងមិនត្រឹមត្រូវ ដូចជា យើងកៀបកនិយាយទូរស័ព្ទយូរ ដែលធ្វើឌីសយើងកៀបទៅប្រេះ ហើយដោយសារតែយើងមិនបានថែរក្សា និងការពារឱ្យបានត្រឹមត្រូវ និងមិនបានព្យាបាលវាឱ្យល្អ វាកាន់តែប្រេះកាន់តែខ្លាំង វាធ្លាយចេញមកក្រៅនូវសារធាតុទាំងអស់។ នៅពេលដែលវាធ្លាយចេញទៅ វានឹងកៀប និងប៉ះសរសៃប្រសាទ ធ្វើឱ្យមនុស្សឈឺ។ ឧទាហរណ៍ថា សរសៃនេះជាសរសៃប្រសាទជើង វាអាចធ្វើឱ្យយើងឈឺជើង ឬស្ពឹកត្រឹមត្រូវ រូបភាពនេះ »។
លោកវេជ្ជបណ្ឌិត ឈីងឈិន មានប្រសាសន៍បន្តថា ជាធម្មតា ទ្រនាប់កងឆ្អឹងខ្នង ឬហៅថា ឌីសឆ្អឹងខ្នង ដែលមានសុខភាពល្អ គឺតែងតែបញ្ចេញសារធាតុសំណល់ចាស់ចោល ហើយបញ្ចូលសារធាតុចិញ្ចឹមថ្មី។ នៅពេលណា ទ្រនាប់ឌីសឆ្អឹងខ្នងមិនអាចរក្សាលំនឹងចលនាចេញចូលបែបនេះបាន ទ្រនាប់ឌីសនោះនឹងខូច ហើយបង្កជាបញ្ហា។
សំឡេង៖ «នៅពេលដែលឌីសឆ្អឹងកងយើងមិនអាចបញ្ចេញសារធាតុចាស់ចោល ហើយនៅកកនៅក្នុងឌីស ធ្វើឱ្យគ្លុយកូស (Glucose) ថយចុះជាមួយអុកស៊ីហ្សែនថយចុះ ដែលជំរុញឱ្យឌីសឆ្អឹងកងយើងខូច ឬសឹករិចរិល»។
ចំពោះសញ្ញា និងអាការៈរបស់ជំងឺទាក់ទងនឹងកងឆ្អឹងខ្នង លោកវេជ្ជបណ្ឌិត ឈីងឈិន ពន្យល់ថា នៅពេលទ្រនាប់ឆ្អឹងកងខ្នងហ្នឹងខូច ឬសឹករិចរិល ហើយលានចេញខុសពីជួរឆ្អឹងខ្នង វានឹងធ្វើឱ្យអ្នកជំងឺឈឺនៅនឹងខ្នង ឬក៏មានបញ្ហាដំណើរការមិនសូវល្អនៃអវយវៈ និងសរីរាង្គក្នុងខ្លួនរបស់អ្នកជំងឺ។ អាការៈឈឺខ្លាំង ឬតិច គឺអាស្រ័យដោយកម្រិតខូចខាតនៃទ្រនាប់ឌីសឆ្អឹងកងនោះ។
សំឡេង៖ «ស្ថានភាពនៃជំងឺឌីសឆ្អឹងខ្នងរបស់យើង វាអាចកើតឡើងនៅពេលដែលឌីសឆ្អឹងខ្នងរបស់យើងលានចេញមកប៉ះនឹងសរសៃប្រសាទ ដែលយើងមានអារម្មណ៍ថា ឈឺនេះឈឺនោះ។ នៅពេលដែលវានៅក្នុងកម្រិតស្រាល ធ្វើឱ្យយើងមានអារម្មណ៍ថា អវយវៈរបស់យើងរោយ ឈឺ ចុក។ ក្នុងករណីកម្រិតមធ្យម វាអាចធ្វើឱ្យគ្រឿងរបស់មនុស្សយើង និងអវយវៈយើងដំណើរការមិនស្រួល...»។
រីឯសញ្ញាសម្រាប់បញ្ហាកងឆ្អឹងខ្នងផ្នែកខាងក្រោម ម្ដុំចង្កេះវិញ មានដូចជា៖
សំឡេង៖ «ហើយបើសិនជានៅខាងក្រោមវិញ ឆ្អឹងកងខាងក្រោម អាចអវយវៈដូចជា ជើងយើងពិការដើរមិនរួច»។
ទាក់ទងទៅនឹងការព្យាបាល ត្រូវបានលោកវេជ្ជបណ្ឌិត ឈីងឈិន ថ្លែងថា មានអ្នកជំងឺជាច្រើននាក់ មិនបានដឹងអំពីមូលហេតុពិតប្រាកដថា ជំងឺឆ្អឹងខ្នងនេះបណ្ដាលមកពីទ្រនាប់ឌីសឆ្អឹងខ្នងលានគាបសរសៃប្រសាទទេ ហើយគាត់ច្រើនប្រើថ្នាំប្រភេទរម្ងាប់សរសៃ ដើម្បីបំបាត់ការឈឺចាប់។ ការព្យាបាលតាមវិធីនេះ គឺជាការអូសបន្លាយជំងឺឱ្យនៅរឹតតែយូរ ហើយអាចនាំឱ្យខូចខាតទ្រនាប់ឆ្អឹងនោះរឹតតែធ្ងន់ធ្ងរថែមទៀត។
លោកវេជ្ជបណ្ឌិត ឈីងឈិន មានប្រសាសន៍បន្ថែមថា ជាទូទៅ ការព្យាបាលជំងឺនេះ មានវិធី ២ យ៉ាង។
សំឡេង៖ «ក្នុងវិធីព្យាបាលបច្ចុប្បន្ននេះ គឺយើងមានវិធីព្យាបាលពីរ។ ទីមួ គឺការមិនវះកាត់ ដែលប្រើប្រាស់ថ្នាំ ធូរស្រាលក្នុងរយៈពេលខ្លី។ ក៏ប៉ុន្តែមិនអាចថាជាសះស្បើយ ១០០% ទេ ហើយបើយើងប្រើប្រាស់ថ្នាំរយៈពេលយូរ វាអាចធ្វើឱ្យប៉ះពាល់ដល់ខ្លួនប្រាណយើង ធ្វើឱ្យឈឺក្រពះ ឬក៏ជំងឺផ្សេងៗ»។
វិធីព្យាបាលដោយការវះកាត់ គឺគ្រូពេទ្យច្រើនវះកាត់ ជួសជុលសម្រួលទ្រនាប់ឌីសឆ្អឹងកងខ្នងនោះឡើងវិញ។ ក៏ប៉ុន្តែ លោកវេជ្ជបណ្ឌិតថ្លែងថា ការព្យាបាលដោយការវះកាត់នេះ មិនប្រាកដថាជាសះស្បើយជារហូតទេ។
សំឡេង៖ «ចំពោះការវះកាត់បច្ចុប្បន្ន គឺមានដូចជាចាក់ថ្នាំគីមីបញ្ចូល ដើម្បីរំលាយឌីស។ មួយទៀតគឺកាត់ឌីស ដែលលានចេញមកខាងក្រៅ និងមួយទៀត គឺការចាប់ភ្ជាប់ឆ្អឹងកងខ្នងរបស់មនុស្សមិនឱ្យកម្រើក»។ ការព្យាបាលបែបនេះ វាអាចធូរស្បើយក្នុងរយៈពេលខ្លី។ ប៉ុន្តែក្នុងរយៈពេលមួយតទៅមុខទៀត វានឹងរើមកវិញដដែល ដូចជាឌីសឆ្អឹងកងលយចេញមកហ្នឹង វាអាចធូរស្រាលរយៈពេលខ្លី មួយរយៈពេលក្រោយមកវានឹងចេញបន្តមកទៀត ធ្វើឱ្យមនុស្សយើងឈឺលើសដើម»។
ក្រៅពីវះកាត់ លោកវេជ្ជបណ្ឌិត ឈីងឈិន ថ្លែងថា ឆ្លងកាត់ការស្រាវជ្រាវរបស់លោកអស់រយៈ ២០ ឆ្នាំ លោកបានរកឃើញឱសថសម្រាប់ជួយបំប៉នកោសិកាទ្រនាប់ឌីសឆ្អឹងខ្នងឡើងវិញ ដែលផ្សំពីរុក្ខជាតិ។ ឱសថនេះមានឈ្មោះថា អែលហ្គូឃែរ (Elgucare)។
សំឡេង៖ «ប្រសិទ្ធភាពគឺធ្វើឱ្យសរសៃឈាមកកើតឡើងវិញ ហើយធ្វើឱ្យស្នូលឌីសយើងហ្នឹងសម្បូរណ៍ជាតិទឹកឡើងវិញ។ ធ្វើឱ្យកោសិកាយើងមានភាពរស់រវើក ដែលជំរុញកោសិកាឌីសយើងកើនឡើង មានកំហាប់ឡើងវិញ»។
លោកបន្តថា លទ្ធផលនៃការព្យាបាលដោយថ្នាំ អែលហ្គូឃែរ (Elgucare) កន្លងមក មានប្រសិទ្ធភាពខ្ពស់ក្នុងរយៈពេល ៣ បន្ទាប់។
សំឡេង៖ «គឺលទ្ធផលព្យាបាលជំងឺឈឺចង្កេះ ក្រោយពេលប្រើប្រាស់ អែលហ្គូឃែរ របស់យើង ក្រោយរយៈពេល ៣ ខែ បង្ហាញឱ្យឃើញថា ៨០% គឺទទួលបានការជាសះស្បើយច្រើន។ ចំណែកឯ ២០% ទៀត ទទួលការជាសះស្បើយតិចតួចដោយសារតែជំងឺកងរបស់គាត់ ហើយម្យ៉ាងទៀតអាយុរបស់គាត់ គឺចាស់ជរា»។
លោកវេជ្ជបណ្ឌិត ឈីងឈិន មានពន្យល់ថា ផលវិបាកដែលមិនបានព្យាបាលបញ្ហាលានទ្រនាប់ឌីសឆ្អឹងកងខ្នងឱ្យបានត្រឹមត្រូវ និងទាន់ពេល អាចបង្កឱ្យមានបញ្ហាធ្ងន់ធ្ងរបន្តទៀតច្រើន។
សំឡេង៖ «ការដែលឌីសបាត់បង់ភាពរស់រវើករបស់វា ដែលយើងហៅថាងាប់ឌីសឆ្អឹងកងរបស់យើងនេះ វាអាចនឹងលានទៅប៉ះសរសៃប្រសាទណាមួយ ឧទាហរណ៍ដូចជា ឆ្អឹងក វាឱ្យយើងចេះតែវិលមុខជាប្រចាំ ហើយនិងម្រាមដៃម្រាមជើងស្ពឹក លែងមានអារម្មណ៍។ បើសិនជានៅខាងក្រោមវិញ ឆ្អឹងកងខាងក្រោមអាចប៉ះពាល់អវយវៈខាងក្រោម ដូចជាជោះងយើងពិការដើរមិនរួច ឬក៏ប៉ះពាល់ដល់ការបន្តពូជរបស់យើងក៏មានដែរ»។
ដើម្បីបង្ការកុំឱ្យខូចទ្រនាប់ឌីសកងឆ្អឹងខ្នង លោកវេជ្ជបណ្ឌិត ឈីងឈិន ណែនាំថា ត្រូវរក្សាឥរិយាបថឆ្អឹងខ្នងឱ្យបានត្រង់ និងមានលំនឹងល្អ ហើយមិនត្រូវពត់កាច់យូរពេកទេ ព្រោះវាអាចធ្វើឱ្យជ្រុងឆ្អឹងកងសង្កត់លើទ្រនាប់ខ្លាំង និងលានចេញ។
ការអង្គុយយូរពេកក៏មិនសម្រាប់សុខភាពទ្រនាប់ឌីសកងឆ្អឹងខ្នងដែរ។
សំឡេង៖ «យើងទាំងអស់គ្នា ពេលអង្គុយបានមួយម៉ោង គួរតែងើបឡើង ដើម្បីធ្វើចលនាផ្សេងៗ ដើម្បីរក្សាលំនឹងឆ្អឹងខ្នង»។
មិនចំពោះតែការអង្គុយយូរទេ គឺត្រូវចៀសវាងការឈរដែរ។
គប្បីប្រើពូកទន់ល្មមសម្រាប់សម្រាន្ត ដោយមិនត្រូវឱ្យទន់ពេក ឬរឹងពេកទេ។ ត្រូវរក្សាទម្ងន់រាងកាយឱ្យសមរម្យសម្រាប់សុខភាព គឺមិនឱ្យធាត់ពេកទេ នាំឱ្យទម្ងន់សង្កត់លើឆ្អឹងខ្នងខ្លាំង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។