អ្នកវិភាគ និងមន្ត្រីបក្សប្រឆាំងថា លោកនាយករដ្ឋមន្ត្រី ហ៊ុន សែន ព្យាយាម កៀរគរថវិកាពីឧកញ៉ា រហូតដល់ពលរដ្ឋទូទៅ នៅពេលនេះ ទំនងរដ្ឋាភិបាលកំពុងជួបវិបត្តិខ្វះលុយ។ ទោះយ៉ាងណា មន្ត្រីបក្សកាន់អំណាចអះអាងថា កិច្ចប្រែងរៃអង្គាសប្រាក់របស់លោក ហ៊ុន សែន ពេលនេះគឺមិនចង់ឱ្យពលរដ្ឋស្លាប់ដោយសារគ្រាប់មីនបន្តទៀត។
អ្នកវិភាគនិងមន្ត្រីបក្សប្រឆាំង បារម្ភដល់ការផុងខ្លួនក្នុងយុទ្ធសាស្ត្រ កៀរគរថវិការបស់លោក នាយករដ្ឋមន្ត្រី ហ៊ុន សែន ពេលនេះ គឺមន្ត្រីរាជការដែលមានប្រាក់តិចតួច និងក្រុមឈ្មួញធម្មតាដែលគ្មានលុយចាយសល់ដូចក្រុមឧកញ៉ាមួយចំនួន។
អ្នកវិភាគនយោបាយ លោក គឹម សុខ យល់ថា លោក ហ៊ុន សែន មានល្បិចខ្ពស់ក្នុងការប្រមូលលុយពីក្រុមឧកញ៉ា រហូតដល់ពលរដ្ឋទូទៅ។ លោកអះអាងថា នេះក៏ជាឱកាសសម្រាប់ក្រុមឈ្មួញខិលខូចអាចលាងលុយរបស់ខ្លួនតាមរយៈការបរិច្ចាគនេះ ហើយអ្នកទាំងនោះអាចនឹងទទួលបានប្រយោជន៍ពីលោក ហ៊ុន សែន វិញ៖ «ទំនងគម្រោងកម្ចាត់មីនស័ក្ដិសមជាងគេហើយទើបលោក ហ៊ុន សែន ប្រកាសបង្កើតគម្រោងហ្នឹងដើម្បីកម្ចាត់មីននៅកម្ពុជា មិនចាំបាច់បង្កើតគម្រោងហ្នឹងធ្វើអី អង្គការស៊ីម៉ាក់ ( មជ្ឈមណ្ឌលសកម្មភាពកំចាត់មីនកម្ពុជា ) ដែលជាសមផលរបស់អ៊ុនតាក់ ធ្វើឲ្យទៅជាអង្គការឯករាជ្យទៅទទួលជំនួយច្រើនណាស់ពីសហគមន៍អន្តរជាតិ ទាំងសហរដ្ឋអាមេរិកផង»។
រីឯ អ្នកឃ្លាំមើលនយោបាយ និងជាអ្នកសម្របសម្រួលគម្រោងនៃសមាគមបណ្ដាញយុវជនកម្ពុជា(CYN) លោក ម៉ើ ចាន់ដារ៉ា ចង់ឃើញរដ្ឋាភិបាល យកថវិការដ្ឋមកដោះស្រាយឲ្យអស់លទ្ធភាពជាមុនសិន មុននឹងធ្វើការកៀរគរថវិកាពីមហាជន។ យុវជនរូបនេះព្រួយបារម្ភថា បើរដ្ឋាភិបាលចាយលុយពីមហាជនមិនចំគោលដៅ និងគ្មានតម្លាភាព នឹងធ្វើឲ្យការលះបង់លុយរបស់ពលរដ្ឋគ្មានតម្លៃ៖ «យើងជឿជាក់ថា បើគ្រប់គ្រងថវិកាជាតិមានប្រសិទ្ធភាព មានតម្លាភាព មានគណនេយ្យ ភាព ខ្ញុំជឿជាក់យ៉ាងមុតមាំថា យើងមិនចាំបាច់ត្រូវរៃអង្គាសទេ ការបង់ពន្ធពីវិស័យទេសចរណ៍ការប្រមូលពន្ធផ្សេងៗពីអគ្គនាយកដ្ឋានពន្ធដារ ខ្ញុំមើលឃើញថា មានលើសគោលដៅរបស់ដល់ជាង៤០ភាគរយទៅ៥០ភាគរយ ខ្ញុំគិតថា លុយទាំងអស់ហ្នឹងយើងបង្វិល»។
ចំណែក អនុប្រធានគណបក្សសង្គ្រោះជាតិប្រចាំខេត្តកំពង់ឆ្នាំង លោក ដួង ចន្ត្រា ដែលកំពុងភៀសខ្លួននៅប្រទេសថៃ យល់ថា រដ្ឋាភិបាល លោក ហ៊ុន សែន អាចកំពុងក្ស័យធន ដោយខ្វះលុយបើកប្រាក់ខែឲ្យមន្ត្រីរាជការ និងគ្មានថវិកាបន្តសម្រាប់ដោះមីនដែលនៅសេសសល់។ លោកបន្តថា រដ្ឋាភិបាលតែងអួតអាងថា ប្រមូលពន្ធបានលើសផែនការស្ទើររាល់ឆ្នាំ ប៉ុន្តែ រដ្ឋាភិបាល លោក ហ៊ុន សែន តែងដើរខ្ចីបរទេស ជាពិសេសខ្ចីលុយចិន។ មន្ត្រីបក្សប្រឆាំងរូបនេះ ជំរុញទៅរដ្ឋាភិបាល លោក ហ៊ុន សែន ងាកមកដើរលើផ្លូវប្រជាធិបតេយ្យឡើងវិញដើម្បីឲ្យសហភាពអឺរ៉ុប និងសហរដ្ឋអាមេរិក ផ្ដល់ប្រព័ន្ធអនុគ្រោះពន្ធពេញលេញមកកម្ពុជាវិញ៖ «អ៊ីចឹងទាំងអស់ហ្នឹងអសកម្មទាំងអស់វិស័យទាំង៥នៅកម្ពុជា ធ្វើឲ្យកម្ពុជាយើងពុំមានអីពឹងពរក្រៅពីខ្ចីលុយគេមកប្រើប្រាស់ នៅពេលខ្ចីគេមិនបានមានតែរៃអង្គាសអ្នកមានសេដ្ឋីឧកញ៉ា នៅកម្ពុជា ដើម្បីឧបត្ថម្ភជាទឹកចុងក្រោយតែប៉ុណ្ណឹង»។
ការបញ្ចេញប្រតិកម្មរបស់អ្នកវិភាគនិងមន្ត្រីបក្សប្រឆាំងនេះ កើតឡើងក្រោយពេលលោកនាយករដ្ឋមន្ត្រី ហ៊ុន សែន លើកឡើងម្ដងហើយម្ដងទៀត ស្នើទៅឧកញ៉ា រហូតដល់ពលរដ្ឋទូទៅឲ្យជួយបរិច្ចាគលុយជួយរដ្ឋាភិបាល ក្នុងការបោសសម្អាតមីននៅកម្ពុជា។ លោកថា ពេលនេះរដ្ឋាភិបាលទទួលបានលុយពីក្រុមឧកញ៉ាជិត១៥លានដុល្លារ។ ទោះយ៉ាងណា លោក ហ៊ុន សែន កាលពីថ្ងៃ០៦កក្កដា បានស្ដីបន្ទោសទៅមន្ត្រីពិធីការរបស់លោកម្នាក់គឺ លោក សេង ទៀង ថា មិនបានបង្កើតគណនេយ្យបន្ថែម សម្រាប់ឲ្យពលរដ្ឋទូទៅ ឬអ្នករកស៊ីធម្មតាអាចចូលរួមក្នុងការបរិច្ចាគនេះ៖ «អ្នកដែលគេចង់ចូលប្រាំម៉ឺន ដប់ម៉ឺន ម្ភៃម៉ឺន ទៅតាមសទ្ធាជ្រះថ្លាដែលគេចង់រួមចំណែកធ្វើឲ្យប្រទេសនេះលែងមានគ្រោះថ្នាក់ដោយសារគ្រាប់មីនអត់ទាន់មានអ្នកដឹងថា កុង ( គណនេយ្យ ) នៅកន្លែងណា អ៊ីចឹងត្រូវបើកទៅប្រកាសទៅ តែមិនព្រមធ្វើ»។
ទាក់ទងរឿងនេះ វិទ្យុអាស៊ីសេរី មិនទាន់អាចសុំបំភ្លឺពីអគ្គនាយក មជ្ឈមណ្ឌលសកម្មភាពកំចាត់មីនកម្ពុជា លោក ហេង រតនា និងអ្នកនាំពាក្យរដ្ឋាភិបាលលោក ផៃ ស៊ីផាន បានទេ នៅថ្ងៃទី០៧ ខែកក្កដា។ ទោះយ៉ាងណា អនុប្រធានទី១ អាជ្ញាធរមីន លោក លី ធុជ បានប្រាប់សារព័ត៌មានហ្វ្រេសញូវថា ថវិកាដែលទទួលបានពីការបរិច្ចាគ អាជ្ញាធរមីន បានយកទៅប្រើប្រាស់បន្តបន្ទាប់ក្នុងសកម្មភាពបោសសំអាតគ្រប់មីន។
ចំណែក អ្នកនាំពាក្យគណបក្សប្រជាជនកម្ពុជា លោក សុខ ឥសាន ប្រាប់អាស៊ីសេរីថា អ្នកដែលរិះគន់រឿងនេះ ព្រោះអ្នកទាំងនោះចង់ឃើញពលរដ្ឋបន្តស្លាប់ដោយគ្រាប់មីន ហើយយកការបាត់បង់អាយុជីវិតពលរដ្ឋនេះដើម្បីវាយប្រហាររដ្ឋាភិបាល។ បើទោះជាមន្ត្រីជាន់ខ្ពស់បក្សកាន់អំណាចរូបនេះ គាំទ្រនិងកោតសរសើរ ការផ្ដួចផ្ដើមរៃអង្គាសលុយនេះថា ជាចេតនាល្អរបស់លោក ហ៊ុន សែន ក្នុងការជួយសង្គ្រោះអាយុជីវិតពលរដ្ឋឲ្យរួចផុតពីគ្រាប់មីនក្ដី ក៏ខ្លួនលោកផ្ទាល់មិនទាន់បានចូលរួមបរិច្ចាគថវិកានៅឡើយទេព្រោះលោកថា គ្មានលទ្ធភាព៖ «បងប្អូនអ្នកមានលទ្ធភាពមួយចំនួនធំ ដែលចេះតែផ្ដល់វិភាគទានចិត្តជ្រះថ្លាពីទ្រព្យសម្បត្តិផ្ទាល់ខ្លួននេះ ជាការឆ្លុះបញ្ចាំងឲ្យឃើញការគាំទ្រនយោបាយសប្បុរសធម៌ក៏ដូចជាសង្គ្រោះអាយុជីវិតប្រជាជនរបស់រាជរដ្ឋាភិបាល អ៊ីចឹងទេបានបងប្អូនអ្នកដែលមានលទ្ធភាពតាំងពីលុយច្រើនដល់លុយតិចបាទ»។
នេះគឺជាការបរិច្ចាគថវិកាទ្រង់ទ្រាយធំជាលើកទី៤ហើយ បន្ទាប់ពីមានការរៃអង្គាស ថវិកាតាមការអំពាវនាវរបស់រដ្ឋាភិបាលសម្រាប់ជួយជនរងគ្រោះដោយទឹកជំនន់ កាលពីខែតុលា និងចូលរួមបរិច្ចាគថវិកា ដើម្បីត្រៀមទិញវ៉ាក់សាំង កាលពីខែធ្នូ ឆ្នាំ២០២០ ព្រមទាំងការដោះស្រាយបញ្ហាកូវីដ កាលពីឆ្នាំ២០២១៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។