រដ្ឋាភិបាលត្រូវការពង្រឹងគោលនយោបាយសំខាន់ៗ ៣ចំណុច ដើម្បីស្តារសេដ្ឋកិច្ចឡើងវិញ ក្រោយពីការរាតត្បាតនៃជំងឺកូវីដ១៩។
វិទ្យាស្ថាន យូហ្សូស អ៊ីហាស (Yusof Ishak Institute (ISEAS) ដែលមានឈ្មោះដើម ជាវិទ្យាស្ថានស្រាវជ្រាវអាស៊ីអាគ្នេយ៍ កាលពីថ្ងៃទី២០ ខែមេសា បានចេញផ្សាយអត្ថបទស្រាវជ្រាវមួយដោយរកឃើញថា ២ឆ្នាំក្រោយកម្ពុជា រងផលប៉ះពាល់សេដ្ឋកិច្ចធ្ងន់ធ្ងរ ដោយសារវិបត្តិកូវីដ១៩ និងយុទ្ធនាការចាក់វ៉ាក់សាំងបង្ការជំងឺនេះបានច្រើនមកក្តី ក៏ប៉ុន្តែកម្ពុជាត្រូវប្រឈមហានីភ័យធំៗបី ដែលត្រូវការដោះស្រាយចាំបាច់ ដើម្បីគាំទ្រការងើបឡើងវិញនៃកំណើនសេដ្ឋកិច្ចរយៈពេលវែង។
អត្ថបទដដែលគូសបញ្ជាក់ថា គោលនយោបាយ៣ចំណុចសំខាន់ៗនោះ រួមមានទី១ ត្រូវរក្សាសុវត្ថិភាពសុខភាព និងពង្រឹងប្រព័ន្ធថែរក្សាសុខភាព ដើម្បីអាចដោះស្រាយជាបន្ទាន់ ក្នុងការកាត់បន្ថយផលប៉ះពាល់ដល់សេដ្ឋកិច្ច និងការរស់នៅរបស់ពលរដ្ឋ ក្នុងលក្ខខណ្ឌដែលមានការរាតត្បាតខ្លាំងនៃជំងឺកូវីដ១៩។ ប្រព័ន្ធសេវាសុខភាពនៅកម្ពុជា នៅមានកម្រិតទាបជាងគេ នៅក្នុងតំបន់អាស៊ី។
ចំណុចទី២ រដ្ឋាភិបាលកម្ពុជា ត្រូវមានធនធានថ្មីបន្ថែមទៀត ដើម្បីគាំទ្រដល់ការលូតលាស់សេដ្ឋកិច្ចទៅថ្ងៃអនាគត ខណៈដែលការរីកដុះដាលផ្នែកសំណង់និងវិស័យអចលនទ្រព្យ នឹងត្រូវបិទបញ្ចប់។ អាស្រ័យហេតុនេះ ដើម្បីពង្រឹងកំណើនសេដ្ឋកិច្ច កម្ពុជាត្រូវពង្រីកវិនិយោគទុនបរទេស ផ្នែកវិស័យកសិកម្ម ផលិតកម្ម និងឧស្សាហកម្មកាត់ដេរ។ បន្ថែមពីនេះ វិស័យទេសចរណ៍ ក៏អាចជាចំណែកមួយ ជួយបង្កើនសេដ្ឋកិច្ចផងដែរ ប៉ុន្តែលុះត្រាតែកម្ពុជា ត្រូវយកចិត្តទុកដាក់រៀបចំកម្មវិធីថ្មីៗ ដើម្បីទាក់ទាញភ្ញៀវទេសចរបរទេសផងដែរ។
ចំណែកបញ្ហាប្រឈមចុងក្រោយ គឺទាក់ទងនឹងការគ្រប់គ្រងផ្នែកហិរញ្ញវត្ថុ។ វិធានការនេះសំខាន់ណាស់ ក្នុងដោះស្រាយជាបន្ទាន់ ពាក់ព័ន្ធនឹងការរាតត្បាតនៃជំងឺកូវីដ១៩ និងការធ្លាក់ចុះនៃកំណើនសេដ្ឋកិច្ចជាតិ។ ប្រសិនបើបញ្ហាទាំងនេះ ពុំអាចដោះស្រាយបានទេ នឹងជំរុញឲ្យពលរដ្ឋខ្មែរ ជំពាក់បំណុលធនាគារ និងមីក្រូហិរញ្ញវត្ថុ កាន់តែច្រើនឡើងៗ។ បញ្ហាទាំងនេះហើយ នឹងនាំឲ្យដួលរំលំផ្នែកហិរញ្ញវត្ថុ ដូចនេះ រដ្ឋាភិបាល ត្រូវបង្កើនបទប្បញ្ញត្តិ និងត្រួតពិនិត្យឲ្យបានត្រឹមត្រូវ សំរាប់និរន្តភាពផ្នែកហិរញ្ញវត្ថុសំរាប់រយៈពេលវែង។
ទាក់ទងនឹងការលើកឡើងទាំង៣ចំណុច ដើម្បីស្ដារសេដ្ឋកិច្ចឡើងវិញនេះ វិទ្យុអាស៊ីសេរី នៅមិនទាន់អាចទាក់ទងសុំការបញ្ជាក់បន្ថែម ពីអ្នកនាំពាក្យរដ្ឋាភិបាល អ្នកនាំពាក្យក្រសួងសេដ្ឋកិច្ច និងក្រសួងពាណិជ្ជកម្ម បាននៅឡើយទេ កាលពីថ្ងៃទី២២ ខែមេសា។
ទោះជាយ៉ាងណា មូលនិធិរូបិយវត្ថុអន្តរជាតិ (IMF) ព្យាករថា កំណើនសេដ្ឋកិច្ចកម្ពុជា នឹងអាចកើនឡើងដល់ ៥,២ % សំរាប់ឆ្នាំ២០២២នេះ បន្ទាប់ពីកំណើនសេដ្ឋកិច្ចកាលពីឆ្នាំ២០២០ បានត្រឹម ៣,១% និងមានប្រមាណតែ ២,១% ប៉ុណ្ណោះ កាលពីឆ្នាំ២០២១ ដែលនេះបង្ហាញថា កំណើនសេដ្ឋកិច្ចកម្ពុជា នៅមានភាពផុយស្រួយនៅឡើយ ដែលរដ្ឋាភិបាលកម្ពុជាត្រូវមានយុទ្ធសាស្ត្រច្បាស់លាស់ ដើម្បីដោះស្រាយហានីភ័យទាំង៣ចំណុចនេះ។
ទាក់ទងនឹងជំងឺកូវីដ១៩នេះដែរ ក្រសួងសុខាភិបាលរកឃើញករណីឆ្លងជំងឺនេះ ចំនួន ២៦នាក់បន្ថែមទៀត ដែលសុទ្ធតែជាមេរោគប្រភេទអូមីក្រុង (Omicron) និងភាគច្រើនជាករណីឆ្លងក្នុងសហគមន៍។ ក៏ប៉ុន្តែ មិនមានករណីស្លាប់ទេនៅថ្ងៃដដែលនេះ។
គិតត្រឹមព្រឹកថ្ងៃទី២២ មេសា កម្ពុជាមានអ្នកកើតជំងឺកូវីដ-១៩ ជាង ១សែន ៣ម៉ឺន៦ពាន់នាក់ (១៣៦.១៧២) ក្នុងនោះអ្នកជាសះស្បើយមានប្រមាណ ១ សែន ៣ម៉ឺន២ពាន់នាក់ (១៣២.៨៨០) និងអ្នកស្លាប់មានចំនួន ៣ពាន់ ៥៦នាក់ (៣.០៥៦)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។