សាជីវកម្មហិរញ្ញវត្ថុអន្តជាតិ (IFC) កំពុងជួយជំរុញការប្រកួតប្រជែងនិងកំណើនប្រកបដោយចិរភាពក្នុងវិស័យកាត់ដេរនៅកម្ពុជា។
សាជីវកម្មហិរញ្ញវត្ថុអន្តជាតិ (IFC) ឲ្យដឹងថាទោះបីជាមានការប្រឈមការរាតត្បាតនៃជំងឺកូវីដ១៩ក៏ដោយក៏ក្រុមហ៊ុនផ្គត់ផ្គង់សម្លៀកបំពាក់និងវាយនភ័ណ្ឌក្នុងស្រុកបានកាត់បន្ថយការប្រើប្រាស់ថាមពលនិងទឹកតាមរយៈដំណោះស្រាយប្រកបដោយនិរន្តភាពជាច្រើន ក្រោមកម្មវិធីរបស់សាជីវកម្មហិរញ្ញវត្ថុអន្តជាតិដែលមានគោលបំណងបង្កើនប្រសិទ្ធភាពធនធាននិងកាត់បន្ថយការចំណាយប្រតិបត្តិការ។
នាយិកាប្រតិបត្តិនៃសាជីវកម្មហិរញ្ញវត្ថុអន្តជាតិប្រចាំតំបន់អាស៊ីប៉ាស៊ីហ្វីក អ្នកស្រី រ៉ាណា ខារ៉ាដឈេស ហាឌែត (Rana Karadsheh-Haddad) ថ្លែងក្នុងសេចក្តីប្រកាសព័ត៌មានកាលពីថ្ងៃទី៣១ ខែមីនាថា ថាមពលថ្លៃនិងផលិតភាពទាបបានជះឥទ្ធិពលដល់ការប្រកួតប្រជែងផ្នែកឧស្សាហកម្មកាត់ដេរនៅកម្ពុជា។អ្នកស្រីបន្តថា IFC កំពុងគាំទ្រដល់កំណើនវិស័យឯកជននិងលើកកំពស់ការប្រកួតប្រជែងរបស់ក្រុមហ៊ុនផលិតក្នុងស្រុកដោយបានបង្កើនភាពជាដៃគូជាមួយក្រុមហ៊ុនម៉ាកល្បីៗលំដាប់ពិភពលោកដើម្បីជំរុញនិរន្តភាពក្នុងវិស័យកាត់ដេរនៅកម្ពុជា។
សេចក្តីប្រកាសព័ត៌មានដដែលបន្តថាសាជីវកម្មហិរញ្ញវត្ថុអន្តជាតិ (IFC) បានជួយគាំទ្រក្រុមហ៊ុនផ្គត់ផ្គង់ចំនួន១០ក្នុងផ្នែកវិស័យកាត់ដេរនិងសំលៀកបំពាក់កាលពីឆ្នាំ២០១៩និងឆ្នាំ២០២០ដើម្បីសន្សំសំចៃការប្រើប្រាស់ថាមពលបានជិត២០% និងទឹក បានជិត៣០%។ ក្រុមហ៊ុនផ្គត់ផ្គង់ក្នុងស្រុកដែលបានអនុវត្តកម្មវិធីនេះនឹងត្រូវទទួលបានការលើកទឹកចិត្តក្នុងការកំណត់ថ្លៃពីកម្មវិធីហិរញ្ញប្បទានដល់ក្រុមហ៊ុនផ្គត់ផ្គង់ពាណិជ្ជកម្មសកលរបស់ (IFC)។
ក្នុងឆ្នាំ២០២១កម្មវិធីនេះបានផ្តល់ហិរញ្ញប្បទានចំនួន ២៧៦ លានដុល្លារដល់ក្រុមហ៊ុនផ្គត់ផ្គង់នៅកម្ពុជា។ឧស្សាហកម្មកាត់ដេរនៅកម្ពុជាបានផ្តល់ការងារដល់កម្មករជាង៧៥ម៉ឺននាក់ដែលភាគច្រើនជាស្ត្រីនិងបានចូលរួមចំណែកជាង១ភាគ៣នៃផលិតផលសរុបក្នុងស្រុករបស់កម្ពុជា។
ទោះបីជាកម្ពុជាបាននាំចេញសំលៀកបំពាក់គិតជាទឹកប្រាក់ចំនួនជាង១១ពាន់លានដុល្លារ(១១.៣) ក្នុងឆ្នាំ២០២១ក៏ដោយ ក៏ថ្លៃចំណាយលើថាមពល មានកម្រិតខ្ពស់គួបផ្សំនឹងផលិតភាពទាបធ្វើឲ្យប៉ះពាល់ដល់ការប្រកួតប្រជែងរបស់កម្ពុជានៅក្នុងតំបន់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។