មូលនិធិរូបិយវត្ថុអន្តរជាតិ IMF ព្យាករថា កំណើនសេដ្ឋកិច្ចកម្ពុជាក្នុងឆ្នាំ២០២២នេះ អាចនឹងសម្រេចបាន ៥% ហើយនឹងកើនដល់ជិត ៥,៥% នៅក្នុងឆ្នាំ២០២៣ខាងមុខ។ IMF ផ្តល់អំណះអំណាងថាកំណើននេះ គឺដោយសារតែការបន្តរើបឡើងវិញនៃវិស័យទេសចរណ៍ និងការបន្តដាក់ចេញនូវគោលនយោបាយគាំទ្រនានារបស់រដ្ឋាភិបាលដល់សេដ្ឋកិច្ចកម្ពុជា។
នេះបើយោងតាម សេចក្តីប្រកាសព័ត៌មានរបស់ IMFកាលពីថ្ងៃទី១៨ ខែធ្នូ ជុំវិញការបញ្ចប់កិច្ចពិគ្រោះយោបល់វាយតម្លៃសេដ្ឋកិច្ចកម្ពុជាឆ្នាំ២០២២ រវាងក្រុមប្រឹក្សានាយកប្រតិបត្តិរបស់អង្គការនេះជាមួយភាគីកម្ពុជា។
ទោះយ៉ាងណា អង្គការមូលនិធិរូបិយវត្ថុអន្តរជាតិ IMF ព្រមានថា សេដ្ឋកិច្ចកម្ពុជាក្នុងឆ្នាំ២០២២នេះ កំពុងទទួលរងនូវឥទ្ធិពលពីសេដ្ឋកិច្ចនៅប្រទេសចិន ការធ្លាក់ចុះនៃតម្រូវការរបស់អ្នកប្រើប្រាស់ក្នុងប្រទេសជឿនលឿន ជាពិសេសសហរដ្ឋអាមេរិក និងសហភាពអឺរ៉ុបដែលជាទីផ្សារចម្បងសម្រាប់វិស័យកម្មន្តសាល ឬឧស្សាហកម្មផលិតរបស់កម្ពុជា។ ទន្ទឹមគ្នានេះ អង្គការនេះ រំពឹងថា អត្រាអតិផរណានៅកម្ពុជានឹងកើនឡើងខ្ពស់ដល់ចំណុចកំពូលក្នុងឆ្នាំ២០២២នេះ ហើយធ្លាក់ចុះទាបបន្តិចមកវិញក្នុងឆ្នាំ២០២៣។ អង្គការនេះថា ភាពមិនប្រាកដប្រជាជុំវិញការវាយតម្លៃនេះ គឺនៅខ្ពស់នៅឡើយ ហើយហានិភ័យទាំងនេះអាចបណ្តាលឱ្យប៉ះពាល់ដល់កំណើនសេដ្ឋកិច្ចកម្ពុជា។
អង្គការមូលនិធិរូបិយវត្ថុអន្តរជាតិ IMFវាយតម្លៃថា ហានិភ័យដែលប្រឈមខ្លាំងបំផុតចំពោះសេដ្ឋកិច្ចកម្ពុជា គឺបណ្តាលមកពីការកើនឡើងនៃបំណុលឯកជន លក្ខខណ្ឌនានានៃសេដ្ឋកិច្ចរបស់ប្រទេសធំៗ និងកត្តាអតិផរណា។
ក្រុមអភិបាលនៃអង្គការ IMF លើកទឹកចិត្តដល់អាជ្ញាធរកម្ពុជាឱ្យដាក់ចេញនូវគោលនយោបាយហិរញ្ញវត្ថុដើម្បីជួយគាំទ្រដល់ក្រុមគ្រួសារពលរដ្ឋងាយរងគ្រោះ និងចាត់វិធានការនានាដោះស្រាយហានិភ័យផ្នែកហិរញ្ញវត្ថុ និងភាពងាយរងគ្រោះបណ្តាលមកពីអំពើពុករលួយ។ ក្រុមអភិបាល IMF ក៏គូសបញ្ជាក់អំពីសារសំខាន់នៃការអនុវត្តច្បាប់ស្តីពីការក្ស័យធន ការកែសម្រួលឡើងវិញនៃកម្ចីធនាគារ និងក្របខណ្ឌគាំពារប្រាក់បញ្ញើធនាគារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។