ធនាគារជាតិនៃកម្ពុជាប្រកាសឱ្យដឹងថា អតិផរណាបានកើនឡើងដល់ទៅ ៧,២ ភាគរយ ដែលជាការកើនឡើងមួយខ្ពស់មិនធ្លាប់មាន។ មន្ត្រីរបស់ធនាគារនេះ អះអាងថា ការកើនឡើងអតិថរណា គឺបណ្ដាលមកពីវិបត្តិសង្គ្រាមរវាងរុស្សីនិងអ៊ុយក្រែន ដែលជះឥទ្ធិពលលើតម្លៃប្រេងឥន្ធនៈ និងម្ហូបអាហារពិភពលោក។ សង្គមស៊ីវិលថា នៅក្នុងកាលៈទេសៈនេះរដ្ឋាភិបាលគួរគិតគូររកដំណោះស្រាយជួយប្រជាជន ជាជាងការបន្ទោសទៅលើអ្នកដទៃ។
ប្រជាពលរដ្ឋកំពុងមានការព្រួយបារម្ភថា ការកើនឡើងអតិផរណា គឺទំនិញឡើងថ្លៃ លុយចុះថោក នៅពេលនេះនឹងបន្ថែមបន្ទុកទៅលើជីវភាពរបស់ពួកគាត់ ឱ្យលំបាកមួយកម្រិតទៀត។ ការព្រួយបារម្ភនេះកើតមានឡើងបន្ទាប់ពីធនាគារជាតិនៃកម្ពុជាប្រកាសឱ្យដឹងពីស្ថានភាពសេដ្ឋកិច្ចក្នុងប្រទេស ដែលកំពុងប្រឈមទៅនឹងការកើនឡើងអតិផរណាមួយខ្ពស់បំផុត មិនធ្លាប់មានក្នុងរយៈពេល១០ឆ្នាំចុងក្រោយនេះ។
ពលរដ្ឋម្នាក់រស់នៅខេត្តសៀមរាប កញ្ញា គឹម ស្រីណែត ប្រាប់វិទ្យុអាស៊ីសេរីនៅថ្ងៃពុធ ទី២០ កក្កដា ថា ប្រជាពលរដ្ឋទូទៅរួមទាំងកញ្ញាផ្ទាល់ កំពុងប្រឈមទៅនឹងបញ្ហាជីវភាពខ្វះខាត ដោយសារទំនិញឡើងថ្លៃឥតឈប់ឈរ ស្របពេលប្រាក់ចំណូលពលរដ្ឋ មានកម្រិតទាបនៅឡើយ។ កញ្ញាបន្តថា តម្លៃប្រេងសាំងជាបញ្ហាប្រឈមធំ ក្នុងចំណោមបញ្ហាផ្សេងៗ ដោយសារតម្លៃប្រេងសាំងនៅកម្ពុជាហាក់មិនមានការថយចុះនោះទេ ទោះបីរដ្ឋាភិបាលប្រកាសពីការធ្លាក់ចុះតម្លៃប្រេងសាំងនៅថ្ងៃទី២០ កក្កដានេះក៏ដោយ។ កញ្ញាស្នើឱ្យរដ្ឋាភិបាលរកដំណោះស្រាយណាមួយឱ្យមានប្រសិទ្ធភាព ជួយដល់ប្រជាពលរដ្ឋដូចនៅប្រទេសជិតខាង៖ «ប្រទេសជិតខាងគេជួយសម្រួលប្រជាពលរដ្ឋគេ ជាពិសេសរឿងសាំងហ្នឹងហើយ។ យើងវិញដូចជាពិបាកនៅក្នុងការធ្លាក់ ( ថ្លៃសាំង ) តែម្ដង តែបើដំឡើងវិញគឺហក់លឿនហ្មង។ អ៊ីចឹងប្រជាពលរដ្ឋគឺពិបាកមែនទែននៅក្នុងការរស់នៅ ព្រោះអីវាប្រឈមទាំងវិបត្តិកូវីដ សេដ្ឋកិច្ចធ្លាក់ចុះ ណាមួយ EBA ( ប្រព័ន្ធអនុគ្រោះពន្ធនាំចេញ ) ត្រូវគេកាត់បន្ថយទៀត អ៊ីចឹងទៅប្រជាពលរដ្ឋរងសម្ពាធមែនទែន»។
ជុំវិញបញ្ហានេះ ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាព លោក យ៉ង់ គឹមអេង និយាយថា លើលោកនេះ នៅពេលបញ្ហាកើតឡើងនៅតំបន់ណាមួយវាអាចនឹងជះឥទ្ធិពលទៅលើតំបន់ ឬប្រទេសផ្សេងៗទៀត។ ជាក់ស្ដែងវិបត្តិសេដ្ឋកិច្ចដែលបណ្ដាលមកពីសង្គ្រាមរវាងរុស្សីនិងអ៊ុយក្រែន ជាបញ្ហាដើមចមបណ្ដាលឱ្យអតិផរណានៅកម្ពុជាមានការកើនឡើង និងប៉ះពាល់ដល់ជីវភាពប្រជាពលរដ្ឋ។ ប៉ុន្តែលោកថា ស្ថានភាពនេះនឹងកាន់តែធ្ងន់ធ្ងរប្រសិនបើរដ្ឋាភិបាលមិនប្រញាប់ទប់ស្កាត់ការកើនឡើងថ្លៃទំនិញ និងប្រេងសាំង ដែលកំពុងហក់ឡើងជាលំដាប់ទេនោះ៖ «យើងត្រូវមានវិធានការថា ទោះបីបញ្ហាកើតឡើង ថាយើងត្រូវមានវិធានការទប់ស្កាត់បែបម៉េច ? តើយើងត្រូវមានវិធានការដោះស្រាយបញ្ហានោះដោយរបៀបណា ? យ៉ាងហោចណាស់ក៏យើងទប់កុំឱ្យវាឡើងខ្ពស់ពេក ដែលវាអាចធ្វើឱ្យប៉ះពាល់ដល់ជីវភាពរស់នៅរបស់ប្រជាពលរដ្ឋ»។
វិទ្យុអាស៊ីសេរីនៅពុំទាន់អាចទាក់ទងទេសាភិបាលធនាគារជាតិនៃកម្ពុជា លោក ជា ចាន់តូ ឱ្យលោកបកស្រាយបន្ថែមជុំវិញបញ្ហានេះបាននៅឡើយទេ នៅថ្ងៃទី២០ កក្កដា។
ប៉ុន្តែក្នុងឱកាសបើកសន្និបាតបូកសរុបលទ្ធផលការងារ ប្រចាំឆមាសទី១នៅថ្ងៃទី២០ កក្កដា នេះ ទេសាភិបាលរូបនេះឲ្យដឹងថា អតិផរណានៅកម្ពុជា បានកើនខ្ពស់បំផុតរហូតដល់៧.២% នៅខែឧសភា ឆ្នាំ២០២២។
លោកបន្ថែមថា ការកើនឡើងនេះ គឺបណ្ដាលមកពីឥទ្ធិពលនៃការកើនឡើងថ្លៃប្រេងឥន្ធនៈ និងម្ហូបអាហារលើពិភពលោក ដោយសារការអូសបន្លាយនៃសង្គ្រាម និងការដាក់ទណ្ឌកម្មនានាទៅលើប្រទេសរុស្ស៊ី។ លោកថា កត្តានេះបានធ្វើឱ្យថ្លៃប្រេងឥន្ធនៈ និងម្ហូបអាហារពិភពលោកកើនឡើងជាលំដាប់ ដោយសាររុស្ស៊ី និងអ៊ុយក្រែន ជាប្រទេសឈានមុខគេលើពិភពលោក ក្នុងការនាំចេញវត្ថុធាតុដើមដូចជា ប្រេងឥន្ធនៈ ឧស្ម័ន ជី និងផលិតផលកសិកម្ម។
ជុំវិញរឿងនេះ ប្រធានសមាគមប្រជាធិបតេយ្យនៃសេដ្ឋកិច្ចក្រៅប្រព័ន្ធលោក វន់ ពៅ យល់ឃើញថា នៅក្នុងកាលៈទេសៈនេះរដ្ឋាភិបាលកម្ពុជាមិនគួរគិតតែបន្ទោសទៅលើបញ្ហាបណ្ដាលមកពីសង្គ្រាមរវាងប្រទេសទាំងពីរនោះទេ។ លោកបន្តថា រដ្ឋាភិបាលមានតួនាទីដោះស្រាយបញ្ហានានាដែលកើតមានឡើង ដើម្បីជួយសង្គ្រោះប្រជាពលរដ្ឋរបស់ខ្លួនឱ្យអស់ពីលទ្ធភាព៖ «ជាទូទៅរដ្ឋត្រូវពិនិត្យមើលទៅការយកពន្ធទៅលើថ្លៃប្រេងឥន្ធនៈ ពន្ធទៅលើទំនិញសព្វសារពើទាំងឡាយ ដែលជាតម្រូវការចាំបាច់របស់ប្រជាពលរដ្ឋ ហើយទៅដំឡើងពន្ធផ្សេងៗដែលមិនមែនជាតម្រូវការ។ អាហ្នឹងជាដំណោះស្រាយមួយដែលខ្ញុំគិតថារដ្ឋត្រូវពិចារណាផងដែរ»។
របាយការណ៍ធនាគារជាតិកម្ពុជាឱ្យដឹងថា កំណើនអតិផរណានេះកើតឡើងស្របពេលប្រទេសមួយចំនួននៅក្នុងពិភពលោកកំពុងជួបបញ្ហានេះដែរ។ ទោះជារដ្ឋាភិបាលអះអាងបែបណាក៏ដោយចុះប្រជាពលរដ្ឋ និងអង្គការសង្គមស៊ីវិលចង់ឃើញរដ្ឋាភិបាលចាត់វិធានការរកវិធីដោះស្រាយ ជួយទប់ស្កាត់កំណើនអតិផរណានេះឱ្យបានឆាប់បំផុត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។