សភាឯកបក្សនៅថ្ងៃទី២៩ ខែវិច្ឆិកានេះ បានអនុម័តថវិកាជាតិឆ្នាំ២០២៣ មានទឹកប្រាក់ ជិត ១០ពាន់លានដុល្លារ គឺកើនឡើង ១៣ភាគរយ ធៀបទៅនឹងថវិកាជាតិឆ្នាំ ២០២២ ដែលមានទឹកប្រាក់ជាង ៨ពាន់លានដុល្លារ។
សម័យប្រជុំលើកទី៨ នីតិកាលទី៦ នៃសភាឯកបក្ស ដឹកនាំប្រធានស្ដីទីរដ្ឋសភា លោក ជាម យៀប និងសមាជិករដ្ឋសភា ចំនួន ៩៨រូប។ ដូចសព្វដង រដ្ឋសភា បានយល់ព្រមអនុម័តសេចក្ដីព្រាងច្បាប់តាមសំណើរបស់រដ្ឋាភិបាលដោយគ្មានការកែប្រែនោះទេ។
សភាឯកបក្ស បានអនុម័តសេចក្ដីព្រាងច្បាប់ ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣ ដោយសំឡេងទាំងមូលចំនួន៩៩។ សេចក្ដីព្រាងច្បាប់នេះ មាន ៣ជំពូក និង ២២មាត្រា។
ថវិកាជាតិឆ្នាំ២០២៣ មានទឹកប្រាក់ ជិត ១០ពាន់លានដុល្លារ គឺកើនឡើង ១៣ភាគរយ ធៀបទៅនឹងថវិកាជាតិឆ្នាំ២០២២ ដែលមានទឹកប្រាក់ជាង ៨ពាន់លានដុល្លារ។ រដ្ឋមន្ត្រីក្រសួងសេដ្ឋកិច្ច លោកអូន ព័ន្ធមុនីរ័ត្ន ថ្លែងក្នុងរដ្ឋសភាថា ថវិកានេះ គឺដើម្បីរៀបចំការបោះឆ្នោតឆ្នាំ២០២៣ និងការប្រកួតកីឡា (SEA Games) ដែលកម្ពុជាជាម្ចាស់ផ្ទះ។ លោកបន្តថា កម្ពុជារំពឹងថា នឹងមានកំណើនសេដ្ឋកិច្ច ៦,៦ភាគរយ ធៀបនឹង ៥,៤ កាលពីឆ្នាំ២០២២។កម្ពុជាគ្រោងនឹងខ្ចីប្រមាណជាង ពីរពាន់លានដុល្លារ ពីម្ចាស់ជំនួយសម្រាប់ថវិកាជាតិ ឆ្នាំ២០២៣។
ពាក់ព័ន្ធនឹងច្បាប់ថវិកាជាតិនេះដែរ អ្នកជំនាញផ្នែកវិទ្យាសាស្ត្រនយោបាយ និងកិច្ចការអន្តរជាតិ លោក ឯម សុវណ្ណារ៉ា ចង់ឃើញការចាយវាយលុយជាតិ ប្រកបដោយតម្លាភាព៖
« ការងារជាតិបានសកម្មភាពកើនឡើងបានយើងកើនឡើងបានយើងបង្កើនការចំណាយ ប៉ុន្តែ ខ្ញុំបារម្ភរឿងយើងចាយវាយដោយតម្លាភាពបើយើងចាយវាយដោយតម្លាភាពប្រជាពលរដ្ឋទូទៅដូចជាមិនយល់ទោសការចំណាយរបស់រដ្ឋាភិបាលទេឱ្យតែយើងចាយត្រឹមត្រូវ ព្រោះនេះជាកម្លាំងញើសឈាមរបស់ពលរដ្ឋណា » ។
ស្រដៀងគ្នានេះដែរ ទីប្រឹក្សាសមាគមគ្រូបង្រៀនកម្ពុជាឯករាជ្យ និងជាប្រធានសហភាពសហជីពកម្ពុជា លោក រ៉ុង ឈុន ស្នើរដ្ឋសភា គួរបង្ហាញសេចក្ដីព្រាងច្បាប់នេះឱ្យសាធារណជនបានដឹងឱ្យបានទូលំទូលាយ។ លោក រ៉ុង ឈុន កត់សម្គាល់ទៀតថា បំណុលជាតិតែងកើនឡើងជារៀងរាល់ឆ្នាំ ហើយម្ចាស់បំណុលធំជាងគេរបស់កម្ពុជា គឺប្រទេសកុម្មុយនិស្តចិន។ លោកលើកឡើងទៀតថា ទោះបំណុលចិន ស្រួលខ្ចីស្រួលចាយក្ដី ប៉ុន្តែ លោកព្រួយបារម្ភថា បញ្ហាបំណុលនេះនឹងអាចធ្វើឱ្យកម្ពុជា និងពលរដ្ឋខ្មែរជំនាន់ក្រោយជំពាក់បំណុលចិនគ្រប់ជំនាន់ ហើយបើបំណុលចិនក្លាយជាបំណុលវ័ណ្ឌក និងអាចធ្វើកម្ពុជាជួបហានិភ័យខ្ពស់៖
« យើងឃើញហើយ គំរូប្រទេសនៅក្នុងតំបន់ហ្នឹងដែលមានកម្ចីចិនវ័ណ្ឌករកអ្វីសងគេមិនបានមានតែកាត់កំពង់ផែ យកអីជាដើមហ្នឹងជាហូរហែអ៊ីចឹង យើងមានការព្រួយបារម្ភ បើយើងនៅតែចិញ្ចឹមខ្ចីគេរហូតតែមិនខិតខំកសាង នូវកំណើនសេដ្ឋកិច្ចរបស់ខ្លួនឯង » ។
ទាក់ទងការលើកឡើងនេះ អគ្គលេខាធិការ និងជាអ្នកនាំពាក្យរដ្ឋសភា លោក ឡេង ប៉េងឡុង ប្រាប់ថា មូលហេតុដែលរដ្ឋសភា មិនទាន់បានបង្ហាញសេចក្ដីព្រាងច្បាប់ទាំងនេះឱ្យបានទូលំទូលាយ ព្រោះទាំងរដ្ឋសភា និងរដ្ឋាភិបាល ជាប់រវល់នឹងកិច្ចប្រជុំអន្តរជាតិធំៗ ដែលកម្ពុជាធ្វើជាម្ចាស់ផ្ទះនៃកិច្ចប្រជុំទាំងនោះ។ លោកអះអាងថា ចំពោះការចាយវាយលុយជាតិ រដ្ឋាភិបាលនឹងពន្យល់មករដ្ឋសភា នៅចុងឆ្នាំពោលគឺនៅពេលរដ្ឋាភិបាលប្រើប្រាស់ថវិកានោះរួចហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។