រដ្ឋមន្រ្តីក្រសួងទេសចរណ៍អះអាងថា មានភ្ញៀវទេសចរសរុបជាង ៥លាននាក់ ដើរលេងកម្សាន្ដក្នុងរយៈពេល ៣ថ្ងៃ នៃពីធីបុណ្យចូលឆ្នាំថ្មី និងថ្ងៃចុងសប្ដាហ៍ក្រោយពិធីនេះមួយថ្ងៃទៀត។
ព័ត៌មានពីគេហទំព័រអគ្គស្នងការនគរបាលជាតិ ដែលស្រង់សម្ដីរបស់រដ្ឋមន្រ្តីក្រសួងទេសចរណ៍លោក ថោង ខុន យកមកចុះផ្សាយឱ្យដឹងថា ក្នុងរយៈពេល៤ថ្ងៃពីថ្ងៃទី១៤ ដល់ថ្ងៃទី១៧ ខែមេសា នៅទូទាំងប្រទេសទទួលបានភ្ញៀវទេសចរសរុបចំនួន ជាង៥លាន ១សែន ៧ម៉ឺន នាក់ (៥.១៧៥.៧៥៤) ក្នុងនោះ ភ្ញៀវជាតិមានចំនួនជាង ៥លាន ១សែន ៤ម៉ឺននាក់ (៥.១៤០.៤៩៥) និងភ្ញៀវបរទេសផ្ទៃក្នុងមានចំនួនជាង ៣ម៉ឺន ៥ពាន់នាក់ (៣៥.២៥៩)។ ខេត្តដែលមានភ្ញៀវទេសចរទៅកមន្សាន្តច្រើនជាងគេ គឺខេត្តបាត់ដំបង ដែលមានភ្ញៀវសរុប ជាង៦សែន ៣ម៉ឺននាក់ (៦៥៣.៨៩៦)។
លោក ថោង ខុន អះអាងទៀតថា ចំនួនភ្ញៀវទេសចរប្រមាណជាង៥លាននាក់នេះជាចំនួនច្រើនលើសពីការរំពឹងទុក និងជាសញ្ញាណនៃការងើបឡើងវិញនៃវិស័យទេសចរណ៍។
ការស្ទង់មតិបឋមរបស់ក្រសួងទេសចរណ៍បង្ហាញថាចំពោះការចំណាយរបស់ប្រជាពលរដ្ឋក្នុងពេលចូលឆ្នាំ ៣ថ្ងៃ នេះ ក្នុងគ្រួរសារមួយ ដែលមានគ្នា ៥នាក់ ហើយធ្វើដំណើរកម្សាន្តឆ្ងាយពីផ្ទះក្នុងពេល ៣ថ្ងៃនេះពួកគាត់បានចំណាយមិនតិចជាង៥០០ដុល្លារទេ (គិតរួមទាំងចំណាយស្នាក់នៅហូបចុកធ្វើដំណើរ (ចាក់សាំង) រួមទាំងការទិញទំនិញផ្សេងៗ រៀបចំ រណ្តាប់ បង្សកូល និងចង្ហាន់ទៅវត្តផង)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។