គណបក្សភ្លើងទៀនប្រកាសគាំទ្រការទាមទារប្រាក់ឈ្នួលគោល២១៥ដុល្លាររបស់ក្រុមកម្មករក្នុងវិស័យកាត់ដេរ វាយនភណ្ឌ និងស្បែកជើង។
សេចក្ដីថ្លែងការណ៍របស់គណបក្សភ្លើងទៀនកាលពីថ្ងៃទី១៣ ខែកញ្ញា ឱ្យដឹងថាគណបក្សនេះយល់ថា ការដំឡើងប្រាក់ខែឱ្យដល់២១៥ ដុល្លារក្នុង១ខែគឺអាចជួយកម្មករ កម្មការិនីបានមួយចំណែក បើទោះបីជាការដំឡើងនេះមិនទាន់សមល្មមនឹងដោះស្រាយជីវភាព ក្នុងស្ថានភាពដែលទំនិញ ម្ហូបអាហារ មធ្យោបាយធ្វើដំណើរ និងកន្លែងស្នាក់ថ្លៃខ្ពស់ជាងប្រទេសជិតខាងក្ដី។
លើសពីនេះគណបក្សភ្លើងទៀនស្នើដល់រដ្ឋាភិបាលធានានូវការដំឡើងប្រាក់ឈ្នួលគោលឱ្យបានលើសពី៣០០ដុល្លារ ក្នុងឆ្នាំ២០២៤ ដោយសម្របសម្រួលជាមួយថៅកែរោងចក្រសហគ្រាស កាត់បន្ថយចំណាយក្រៅផ្លូវការ សម្រួលការនាំចូលវត្ថុធាតុដើម ឬជំរុញផលិតវត្ថុធាតុដើមក្នុងស្រុក ជាដើម។
ការប្រកាសរបស់គណបក្សភ្លើងទៀននេះ គឺស្របពេល ដែលភាគីពាក់ព័ន្ធ រួមមាន ភាគីរដ្ឋាភិបាល និយោជក ឬភាគីថៅកែរោងចក្រ និងភាគីសហជីពតំណាងកម្មករបានបើកកិច្ចប្រជុំម្ដងទៀតជជែកពីបញ្ហាប្រាក់ឈ្នួលគោលកម្មករសម្រាប់ឆ្នាំ២០២៣ កាលពីរសៀលថ្ងៃទី១៣ ខែកញ្ញា។
ប្រធានសហភាពសហជីពការងារកម្ពុជា លោក អាត់ ធន ដែលចូលរួមកិច្ចប្រជុំនេះឱ្យដឹងថា ភាគីទាំង៣នៅមិនទាន់ព្រមព្រៀងកំណត់បានប្រាក់ឈ្នួលគោលរួមមួយនៅឡើយក្នុងនោះ ភាគីរដ្ឋាភិបាលស្នើប្រាក់ឈ្នួលគោល១៩៧,៨៦ ភាគីនិយោជកស្នើ ១៩៧ និងភាគីសហជីពស្នើចំនួនចន្លោះពី ២០៦ ទៅ ២១៣ ដុល្លារ៖ «យើងមានសំណើផ្សេងៗទៀតដែរ ដូចជាឱ្យពង្រឹងប្រព័ន្ធសន្តិសុខសង្គម បញ្ចុះតម្លៃទឹកភ្លើង រៀបចំអ្វីផ្សេងៗទៀត ដូចមានក្នុងរបាយការណ៍ហ្នឹងច្រើនមុខណាស់។ ក្រុមការងារចរចាប្រាក់ឈ្នួលនឹងជួបគ្នាម្ដងទៀតនៅព្រឹកថ្ងៃទី២១ ខែកញ្ញា បើមិនមានអ្វីប្រែប្រួលទេនឹងមានការបោះឆ្នោត ធ្វើសេចក្ដីសម្រេចចេញប្រកាសព័ត៌មានតែម្ដង»។
ក្រុមកម្មករផ្នែកកាត់ដេរ និងវាយនភណ្ឌមួយចំនួនបាននាំគ្នាធ្វើយុទ្ធនាការតាមបណ្ដាញសង្គមជាច្រើនសប្ដាហ៍មកហើយស្នើសុំដំឡើងប្រាក់ឈ្នួលគោលឱ្យបាន ២១៥ ដុល្លារក្នុង១ខែ ដោយពួកគេសំអាងហេតុផលមួយចំនួន ជាពិសេសបញ្ហាតម្លៃទំនិញនៅលើទីផ្សារ និងប្រឹងឥន្ធនៈឡើងខ្ពស់។
ក្នុងឆ្នាំ២០២២នេះ កម្មករផ្នែកវាយនភណ្ឌកាត់ដេរ ស្បែកជើង និងកាបូប មានប្រាក់ឈ្នួលគោល ១៩៦ ដុល្លារក្នុង១ខែ សម្រាប់កម្មករពេញសិទ្ធិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។