ក្រសួងការងារ និងបណ្ដុះបណ្ដាលវិជ្ជាជីវៈនៅមិនទាន់កំណត់ប្រាក់ឈ្នួលអប្បបរមាដល់កម្មករកាត់ដេរឲ្យបានច្បាស់ទេ បន្ទាប់ពីក្រុមប្រឹក្សាជាតិប្រាក់ឈ្នួលអប្បបរមា បើកកិច្ចប្រជុំកាលពីថ្ងៃទី២៤ខែសីហា។ ភាគីទាំងបីបានព្រមព្រៀងគ្នានឹងលើកមកចរចាម្ដងទៀតនៅវេលា ម៉ោង ២ និង៣០នាទី ថ្ងៃទី៣១ ខែសីហា ខាងមុខ។
ក្រុមប្រឹក្សាជាតិប្រាក់ឈ្នួលអប្បបរមាដែលមានតំណាងរដ្ឋាភិបាល តំណាងកម្មករនិយោជិត និងតំណាងនិយោជកមិនទាន់បានកំណត់ជាផ្លូវការនៅប្រាក់ឈ្នួលអប្បបរមាដល់កម្មករផ្នែកឧស្សាហកម្មកាត់ដេរ ផលិតស្បែកជើង និងផលិតផលធ្វើដំណើរមានកាបូបជាដើម។ ការប្រជុំចរចាប្រាក់ឈ្នួលកម្មករកាលពីថ្ងៃទី២៤ សីហា ខាងសហជីពបានស្នើសុំដំឡើងប្រាក់ឈ្នួលគោល សម្រាប់កម្មករ ចំនួន២១៥ ដុល្លារ ក្នុងឆ្នាំ២០២៣ ឯខាងភាគីនិយោជក នៅតែប្រកាន់ជំហរផ្ដល់ប្រាក់ខែដល់កម្មករនិយោជិក ១៩៤ ដុល្លារដូចឆ្នាំ២០២១ ដដែល។
ក្រសួងការងារ លើកឡើងក្នុងសេចក្តីប្រកាសព័ត៌មានថា ក្រោយការប្រជុំផ្ទៃក្នុងភាគីរបស់ខ្លួនចំនួន២លើក ភាគីទាំងសង្ខាងបានលើកហេតុផល និងបង្ហាញនូវគោលជំហរផ្ទៃក្នុងរបស់ខ្លួនទៅវិញទៅមកប្រកបដោយវិជ្ជាជីវៈ និងភាពចាស់ទុំទៅលើសំណើរបស់ខ្លួនរៀងៗខ្លួន។ នៅក្នុងកិច្ចចរចានេះ ភាគីរដ្ឋាភិបាលក៏បានសម្របសម្រួល និងផ្ដល់នូវការពន្យល់បន្ថែមលើចំណុចខ្វះខាតផ្សេងៗ ដែលភាគីតំណាងកម្មករនិយោជិក និងភាគីតំណាងនិយោជកមានចម្ងល់ ទាក់ទងទៅនឹងប្រាក់ឈ្នួលគោលរបស់កម្មករនិយោជិកផ្នែកវាយនភណ្ឌ។
ប្រធានសហភាពសហជីពកម្ពុជា (CCU) លោក រ៉ុង ឈុន ប្រាប់វិទ្យុអាស៊ីសេរីនៅថ្ងៃទី២៥ ខែសីហាថា ការប្រជុំ២លើកកន្លងមក ខាងក្រសួងការងារនៅមិនទាន់ប្រកាសកំណត់យកប្រាក់ឈ្នួលជាផ្លូវការទេ ដោយភាគីតំណាងកម្មករ និងភាគីតំណាងថៅកែ បានបង្ហាញនូវការស្រាវជ្រាវអំពីបញ្ហាប្រឈមរបស់ខ្លួនដូចៗគ្នា ដែលត្រូវដោះស្រាយ។ លោកយល់ថា ការចរចាលើកនេះ ភាគីសហជីព បានចាញ់ប្រៀបរួចទៅហើយ ត្បិតភាគីរដ្ឋាភិបាល រួមនឹងភាគីនិយោជកមាន ៣២សំឡេង បានរួមគ្នាដើម្បីរក្សានូវគោលជំហររបស់ខ្លួន បូករួមនឹងភាគីសហជីពមួយចំនួនមិនបានរក្សាគោលជំហរឯករាជ្យទៀត ដូច្នេះសំឡេងនៅសល់តិចតួចប៉ុណ្ណោះ។ លោកសង្ឃឹមថា រដ្ឋាភិបាលនឹងមានការយោគយល់ដំឡើងប្រាក់ខែគោលដល់កម្មករនិយោជិកឲ្យបានខ្ពស់ជាងពីររយដុល្លារ ព្រោះជីវភាពរបស់ពួកគាត់មិនទាន់ប្រសើរទេ បើប្រាក់ខែនៅត្រឹម១៩៤ដុល្លារនោះ៖ «យើងគិតថាសហជីពយើងមិនមានកម្លាំងគ្រប់គ្រាន់នៅក្នុងការទាមទារនោះទេ ប៉ុន្តែគ្រាន់តែជាការចរចាជារូបភាពឲ្យល្អតែមើលទេ។ អីចឹង អាការសម្រេចមាននៅលើភាគីនិយោជក ហើយនិងភាគីរដ្ឋាភិបាលទេ ពីព្រោះកន្លងមកហ្នឹងដោយអ្វីដែលសហជីពគាត់បានដាក់ទៅហ្នឹងមិនបានការពារនូវសំណើរបស់ខ្លួនឲ្យបានជោគជ័យទេ វាទៅតាមការសម្រេចរបស់ភាគីនិយោជក ហើយនិងភាគីរដ្ឋាភិបាលនោះទេ»។
លោក រ៉ុង ឈុន លើកឡើងទៀតថា ការស្នើដំឡើងប្រាក់ឈ្នួល សម្រាប់កម្មករនិយោជិក គឺលោកមានសង្ឃឹមលើរដ្ឋាភិបាល នឹងដំឡើងឲ្យតិចតួចប៉ុណ្ណោះ តបនឹងសំណើរបស់ក្រុមសហជីព ដែលបានស្នើឲ្យដំឡើងប្រាក់ខែគោលជាអប្បបរមា ២១៥ដុល្លារក្នុង១ខែ៖ «អីចឹងយើងអត់អាចងាកមកធ្វើកូដកម្ម បាតុកម្ម ទាមទារបានទេពីព្រោះគេថា សំឡេងប្រជាធិបតេយ្យ គេយកសំឡេងភាគច្រើន អីចឹងយើងវានៅក្នុងសេចក្ដីសម្រេច ត្រូវតែគោរពតាមសំឡេងភាគច្រើន។ ប៉ុន្តែយើងងាកមកដឹកនាំគេធ្វើកូដកម្ម បាតុកម្ម យើងនឹងប្រឈមទៅតាមផ្លូវច្បាប់ហើយ ដូច្នេះអាច្បាប់ស្ដីពីប្រាក់ឈ្នួលហ្នឹងគេបង្កើតឡើង ដើម្បីចងជើងសហជីពឯករាជ្យហ្នឹងបាទ យើងមិនអាចទៅដឹកនាំការធ្វើកូដកម្ម បាតុកម្ម បានទេ បើសិនជាយើងនៅក្នុងចង្កោមហ្នឹងណាបាទ»។
កាលពីឆ្នាំ២០២១ លោកនាយករដ្ឋមន្ត្រី ហ៊ុន សែន បានបន្ថែមទឹកប្រាក់ចំនួន ២ដុល្លារអាមេរិក ពីលើទឹកប្រាក់ចំនួន ១៩២ ដុល្លារ ដែលបានស្នើឡើងដោយក្រុមប្រឹក្សាជាតិប្រាក់ឈ្នួលអប្បបរមា សម្រាប់យកមកអនុវត្តក្នុងឆ្នាំ២០២២ ដែលប្រាក់ឈ្នួលគោលឆ្នាំ ២០២១ មានចំនួន ១៩២ ដុល្លារ ក្នុង ១ ខែ តែភាគច្រើនកម្មករនិយោជិកក្នុងវិស័យកាត់ដេរ មិនបានទទួលប្រាក់ខែ ១៩៤ ដុល្លារ ដូចលោក ហ៊ុន សែន បានដាក់ឲ្យរាល់ក្រុមហ៊ុនទាំងអស់អនុវត្តនោះទេ។
ក្រុមកម្មកររោងចក្រកាត់ដេរ ក៏បានស្នើសុំឲ្យរដ្ឋាភិបាលដំឡើងប្រាក់ឈ្នួលជាងពីររយដុល្លារដែរ ដើម្បីឲ្យពួកគាត់មានលទ្ធភាពចំណាយទប់ទល់នឹងអតិផរណា ឬតម្លៃទំនិញនៅលើទីផ្សារកំពុងហក់ឡើងថ្លៃខ្ពស់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។