សហជីព និងកម្មករវិស័យកាត់ដេរ រក្សាជំហរចង់បានការដំឡើងប្រាក់ឈ្នួល២១៣ដុល្លារសម្រាប់ឆ្នាំ២០២៣ ដោយសារ ទំនិញសព្វសារពើនៅលើទីផ្សារកំពុងហក់ឡើងថ្លៃ។ កិច្ចប្រជុំត្រីភាគីរួមមានក្រសួងការងារ ភាគីនិយោជក និងភាគីសហជីព ដើម្បីកំណត់ប្រាក់ឈ្នួលអប្បបរមាឆ្នាំ២០២៣ ដល់កម្មករផ្នែកឧស្សាហកម្មកាត់ដេរ ស្បែកជើង និងកាបូបធ្វើដំណើរ កាលពីថ្ងៃទី៣១ ខែសីហា នៅមិនទាន់ឯកភាពគ្នានៅឡើយ ហើយភាគីទាំង៣ នឹងបន្តជជែកគ្នានៅថ្ងៃទី១៣ និងថ្ងៃទី២១ ខែកញ្ញា។
កិច្ចចរចាត្រីភាគី ស្ដីពីប្រាក់ឈ្នួលគោលឆ្នាំ២០២៣ សម្រាប់កម្មករនិយោជិក ក្នុងវិស័យកាត់ដេរសំលៀកបំពាក់ និងស្បែកជើង ជាច្រើនលើកកន្លងមកនេះ នៅមិនទាន់ចុះសម្រុងគ្នានៅឡើយទេ ដោយភាគីនីមួយៗមានអំណះអំណាងរៀងៗខ្លួន ផ្អែកលើកត្តាសេដ្ឋកិច្ចសង្គម។
អគ្គលេខាធិការសហព័ន្ធសហជីពកម្ពុជាលោក ម៉ៃ សុភក្ត្រា ប្រាប់វិទ្យុអាស៊ីសេរី នៅថ្ងៃទី១ ខែកញ្ញា ថា សម្រាប់ការចរចាប្រាក់ឈ្នួលរបស់កម្មករ បីលើកហើយនោះ ភាគីសហជីពតំណាងឲ្យកម្មករ បានប្រកាន់ជំហររឹងមាំកំណត់យកការដាក់ចេញនូវតម្លៃ ២១៣ដុល្លារ សម្រាប់ប្រាក់ឈ្នួលកម្មករក្នុងឆ្នាំ២០២៣។ លោកអះអាងថា តំណាងកម្មកររក្សាជំហរបែបនេះ មកពីសហជីពបានសិក្សាយ៉ាងលម្អិត៧ចំណុច ពីតម្រូវការរបស់កម្មករ ទាក់ទងនឹងប្រាក់ឈ្នួលបច្ចុប្បន្នមិនអាចឲ្យកម្មករចាយវាយគ្រប់គ្រាន់ទេ ព្រោះមុខទំនិញឡើងថ្លៃគ្រប់ប្រភេទ និងការធ្វើដំណើររបស់កម្មករក៏ឡើងថ្លៃដែរ៖ «ខាងយើងសហជីពគឺបានសិក្សាពីលក្ខណៈវិនិច្ឆ័យទាំង៧ តាំងពីការចំណាយរស់នៅ តាំងអីទាំងអស់ហ្នឹងអ៊ីចឹងទៅណាបង ដូចថា គេបានសិក្សាស្រាវជ្រាវពីការប្រើប្រាស់នៅក្នុងកម្មករម្នាក់ ឧទាហរណ៍ថា គាត់កម្មករម្នាក់ត្រូវបានចាយវាយទៅលើការចំណាយប្រចាំគ្រួសារ ឬក៏នៅក្នុងជីវភាពរស់នៅរបស់គាត់ក្នុង ១ខែៗហ្នឹង»។
កម្មការិនីកាត់ដេរសំលៀកបំពាក់ រោងចក្រអេដាប់បែលយូធិច ហ្កាម៉ិន (AWTEX GARMENT Co.LTD) លោកស្រី ជួង សុខរីម ប្រាប់ថា ប្រាក់ខែរបស់ពួកគាត់សព្វថ្ងៃនេះ ចាយវាយដោយត្បិតត្បៀតបំផុតគឺលោកស្រីទិញបាយតែប្រាំរយរៀល ម្ហូបមួយពាន់រៀលសម្រាប់បាយមួយពេល និងសឹងតែចំណាយប្រចាំថ្ងៃមិនគ្រប់ផង ស្របពេលដែលទំនិញឡើងថ្លៃគ្រប់មុខផង រាល់ខែលោកស្រីគ្មានប្រាក់សន្សំផ្ញើទៅចិញ្ចឹមកូន និងម្ដាយចាស់នៅផ្ទះទេ។ លោកស្រីបន្ថែមថា លោកស្រីក៏ដូចជាកម្មករឯទៀតចង់ឲ្យក្រសួងការងារ ដំឡើងប្រាក់ខែគោលដល់ពួកគាត់ យ៉ាងតិចបំផុតជាងពីររយ (២០០) ដុល្លារ ព្រោះប្រាក់ចំណាយប្រចាំថ្ងៃចេះតែកើនឡើង ឯប្រាក់ចំណូលនៅដដែល ធ្វើឲ្យជីវិតពួកគាត់ រស់ទាំងត្រដាបត្រដួស និងមានជីវភាពមិនទាន់សមរម្យទេ៖ «តាមខ្ញុំចង់បានសុំត្រឹម១ខែ អាហ្នឹងប្រាក់ខែគោលយើងណា សុំត្រឹម២០១ដុល្លារ ២០២ដុល្លារអីហ្នឹង អាហ្នឹងសមរម្យ ព្រោះអីយើងផាត់ ផាត់ថ្លៃផ្ទះខ្លះ ផាត់ថ្លៃយើងចាយ ថ្លៃបន្ទប់យើងជួលនៅហ្នឹង ហើយយើងចាយទៅវាអត់សល់ប៉ុន្មានទេ និយាយទៅរោងចក្រ»។
កិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមា កាលពីថ្ងៃទី៣១ ខែសីហា ក្រសួងការងារប្រកាសលទ្ធផលថា ភាគីតំណាងកម្មករបានបន្ថយតម្លៃពី២១៥ដុល្លារ មកនៅត្រឹម២១៣ដុល្លារ។ ចំណែកភាគីតំណាងនិយោជក ក៏បានដំឡើងតួលេខពី១៩៤ដុល្លារ ទៅដល់១៩៦ដុល្លារ ។ ក្រសួងការងារ លើកឡើងថា ភាគីទាំងពីរបានបន្តបកស្រាយ និងការពារជំហររបស់ខ្លួនទៅវិញទៅមកប្រកបដោយវិជ្ជាជីវៈ និងភាពចាស់ទុំ ដែលធ្លាប់បានឆ្លងកាត់ការងារនេះកន្លងមក។
ប្រាក់ឈ្នួលគោលរបស់កម្មករក្នុងឆ្នាំ២០២២នេះ មានចំនួន១៩៤ដុល្លារ។ ក្រុមកម្មករ ត្អូញត្អែរថា ប្រាក់ឈ្នួលនេះ មានចំនួនតិចតួច មិនអាចទ្រទ្រង់ក្នុងជីវភាពរស់នៅឲ្យបានសមរម្យនោះទេ ដោយសារពួកគាត់ត្រូវការចាយវាយប្រចាំថ្ងៃ សងប្រាក់បំណុលធនាគារ មីក្រូហិរញ្ញវត្ថុ និងចំណាយលើការឈឺថ្កាត់ជាដើម។ ប៉ុន្មានឆ្នាំចុងក្រោយនេះ ស្ថានភាព និងលក្ខខណ្ឌការងាររបស់កម្មករ កាន់តែអាក្រក់ថែមទៀត ដោយសារមិនសូវមានការងារថែមម៉ោង និងរោងចក្រជាច្រើនកាត់បន្ថយម៉ោងធ្វើការងារ និងបើកប្រាក់ឈ្នួលតែ៥០ភាគរយប៉ុណ្ណោះ ដោយសារតែការយឺតយ៉ាវនាំចូលវត្ថុធាតុដើមសម្រាប់ផលិត។
សម្រាប់ការប្រជុំប្រាក់ឈ្នួលអប្បបរមាដល់កម្មករ ភាគីទាំងបីបានឯកភាពគ្នាកំណត់កិច្ចពិភាក្សាជាលក្ខណៈត្រីភាគីបន្តទៀត នៅថ្ងៃទី១៣ ខែកញ្ញា និងប្រជុំសម្រេច ថ្ងៃទី២១ ខែកញ្ញា ឆ្នាំ២០២២៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។