ធនាគារពិភពលោកព្យាករណ៍ថា កំណើតសេដ្ឋកិច្ចប្រមាណ ៥ ភាគរយក្នុងរយៈពេលប៉ុន្មានឆ្នាំចុងក្រោយនេះ នឹងមិនអាចធ្វើឱ្យប្រទេសកម្ពុជាក្លាយជាប្រទេសមានប្រាក់ចំណូលមធ្យមកម្រិតខ្ពស់ត្រឹមឆ្នាំ ២០៣០នោះទេ ប្រសិនបើរដ្ឋាភិបាលកម្ពុជាមិនពន្លឿនកំណែទម្រង់សេដ្ឋកិច្ច។ មន្ត្រីបក្សប្រឆាំងលើកឡើងថា រដ្ឋាភិបាលកម្ពុជាក៏គួរងាកមកស្ដារលទ្ធិប្រជាធិបតេយ្យ និងសិទ្ធិមនុស្សផងដែរដើម្បីទទួលបានការគាំទ្រផ្នែកសេដ្ឋកិច្ចពីប្រទេសប្រជាធិបតេយ្យ។
របាយការណ៍ធនាគារពិភពលោក (World Bank) កាលពីថ្ងៃទី១៣ ខែធ្នូ ព្យាករណ៍ថា ដើម្បីឱ្យប្រទេសកម្ពុជាក្លាយជាប្រទេសដែលមានប្រាក់ចំណូលមធ្យមកម្រិតខ្ពស់ត្រឹមឆ្នាំ២០៣០ រដ្ឋាភិបាលកម្ពុជាគួរតែពន្លឿនក្នុងការកំណែទម្រង់សេដ្ឋកិច្ចដើម្បីកាត់បន្ថយភាពក្រីក្រ ហើយប្រទេសកម្ពុជាត្រូវរក្សាអត្រាកំណើនសេដ្ឋកិច្ចប្រចាំឆ្នាំយ៉ាងតិច ៧ភាគរយ។
ធនាគារពិភពលោកពន្យល់ទៀតថា មូលហេតុដែលប្រទេសកម្ពុជាគួរតែពន្លឿនក្នុងការកំណែទម្រង់សេដ្ឋកិច្ច ព្រោះថា សេដ្ឋកិច្ចកម្ពុជាក្នុងឆ្នាំ២០២៣នេះទទួលបានកំណើនតែជាង ៥ (៥,៤) ភាគរយដែលឆ្ងាយពីកំណើនប្រចាំឆ្នាំជាមធ្យមជាង៧ (៧,២) ភាគរយ ដែលសម្រេចបានក្នុងទសវត្សរ៍មុនការរាតត្បាតនៃជំងឺកូវីដ-១៩។
ធនាគារពិភពលោកថា គិតត្រឹមឆ្នាំ២០២០ សេដ្ឋកិច្ចកម្ពុជាបានធ្លាក់ចុះធ្វើឱ្យពលរដ្ឋខ្មែរជាង១ (១,២) លាននាក់រស់នៅក្រោមបន្ទាត់ភាពក្រីក្រ ឬមានន័យថា មនុស្សម្នាក់រកចំណូលបានតិចជាង ២,៧ ដុល្លារ ឬប្រមាណមួយម៉ឺនរៀលក្នុងមួយថ្ងៃ ខណៈដែលពលរដ្ឋខ្មែរចំនួនពាក់កណ្ដាលប្រទេសផ្សេងទៀតចំណាយត្រឹមតែ ៤,១៥ ដុល្លារ ឬប្រមាណ១ម៉ឺន ៦ពាន់រៀល ឬតិចជាងនេះក្នុងមួយថ្ងៃ។
របាយការណ៍ដដែលលើកឡើងថា ការធ្លាក់ចុះនៃកំណើនសេដ្ឋកិច្ចនេះមិនមែនបណ្ដាលមកពីការរាតត្បាតនៃជំងឺកូវីដ-១៩ ទាំងស្រុងនោះទេ តែជាក់ស្ដែងកំណើនផលិតភាព ដែលជារង្វាស់នៃប្រសិទ្ធភាពនៃការបែងចែកធនធាន និងការច្នៃប្រឌិតក្នុងសេដ្ឋកិច្ច គឺមានភាពអវិជ្ជមាន ដូចជាការធ្លាក់ចុះផលិតផលកសិកម្ម និងការធ្លាក់ចុះកំណើតប្រាក់ឈ្នួលជាដើម។
ធនាគារពិភពលោកផ្ដល់អនុសាសន៍ថា ដើម្បីឱ្យកំណើនសេដ្ឋកិច្ចកម្ពុជាកើនឡើង រដ្ឋាភិបាលកម្ពុជាគួរតែទីមួយកែលម្អបន្ថែមទៀតចំពោះបរិយាកាសធុរកិច្ច សម្រាប់ការជំរុញផលិតភាព និងការប្រកួតប្រជែងរបស់ក្រុមហ៊ុននៅកម្ពុជា និងទីពីរ ការធ្វើឱ្យប្រសើរឡើងនូវហេដ្ឋារចនាសម្ព័ន្ធរបស់កម្ពុជា គឺជាមូលដ្ឋានគ្រឹះដ៏សំខាន់មួយសម្រាប់ការកើនឡើងផលិតភាព និងការប្រកួតប្រជែងអន្តរជាតិ និងទីបី ដោះស្រាយកង្វះខាតជំនាញ និងអភិវឌ្ឍកម្លាំងពលកម្ម។
វិទ្យុអាស៊ីសេរីមិនទាន់អាចសុំការឆ្លើយតបរឿងនេះ ពីអ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន និងអ្នកនាំពាក្យនាយករដ្ឋមន្ត្រីលោក មាស សោភ័ណ្ឌ បានទេ នៅថ្ងៃទី១៤ ធ្នូ។
អតីតតំណាងរាស្ត្រគណបក្សសង្គ្រោះជាតិ លោក ម៉ែន សុថាវរិន្ទ្រ លើកឡើងថា របាយការណ៍ដែលរកឃើញដោយធនាគារពិភពលោកនេះគឺស្របនឹងស្ថានភាពជាក់ស្ដែងរបស់ប្រទេសកម្ពុជា។ ទោះជាយ៉ាងណា លោក ម៉ែន សុថាវរិន្ទ្រ ថា ដើម្បីឱ្យស្ថានភាពសេដ្ឋកិច្ចល្អប្រសើរឡើងវិញនោះ រដ្ឋាភិបាលថ្មីក្រោមការដឹកនាំរបស់លោក ហ៊ុន ម៉ាណែត គួរតែស្ដារលទ្ធិប្រជាធិបតេយ្យ និងសិទ្ធិមនុស្សឡើងវិញ ដើម្បីឱ្យបណ្ដាប្រទេសប្រជាធិបតេយ្យនឹងបន្តជួយកម្ពុជាច្រើនជាងនេះដូចជាការផ្ដល់នូវប្រព័ន្ធអនុគ្រោះពន្ធសហភាពអឺរ៉ុប (EBA) និង ប្រព័ន្ធអនុគ្រោះពន្ធសហរដ្ឋអាមេរិក (GSP) ទាំងស្រុងឡើងវិញ។
លោក ម៉ែន សុថាវរិន្ទ្រ៖ «ខ្ញុំជឿជាក់ថា សេដ្ឋកិច្ចកម្ពុជាអាចនឹងងើបកើនឡើងវិញ ប្រសិនបើរដ្ឋាភិបាលលោក ហ៊ុន ម៉ាណែត គាត់ផ្លាស់ប្ដូរគាត់លែងដើរតាមនយោបាយតាមឪពុកចាស់របស់គាត់ គឺផ្លាស់ប្ដូរទិសដៅ និងគោលនយោបាយប្រជាធិបតេយ្យសេរីពហុបក្សពិតប្រាកដតែរយៈពេលតែមួយឆ្នាំដំបូងទេយ៉ាងយូរ តាមខ្ញុំមើលទៅ»។
ចំណែកអនុប្រធានគណបក្សភ្លើងទៀន និងជាអ្នកជំនាញសេដ្ឋកិច្ច លោកបណ្ឌិត សុក ហាច លើកឡើងថា ក្រៅពីទទួលយកអនុសាសន៍ពីធនាគារពិភពលោក រដ្ឋាភិបាលថ្មីគួរតែបង្កើនទំនាក់ទំនងល្អគ្រប់បណ្ដាប្រទេសទាំងអស់ ស្ដារលទ្ធិប្រជាធិបតេយ្យ និងសិទ្ធិមនុស្ស ជាពិសេសរដ្ឋាភិបាលក៏គួរតែកាត់បន្ថយចំណាយដែលមិនចាំបាច់ដូចជាកាត់បន្ថយមន្ត្រីជាន់ខ្ពស់យ៉ាងតិចឱ្យបានពាក់កណ្ដាលនៃចំនួនសរុបរបស់រដ្ឋាភិបាល។
បណ្ឌិត សុខ ហាច៖ «ពីព្រោះចំណូលយើងមានកម្រិត ដល់ចំណូលយើងមានកម្រិត ចំណាយយើងមានកម្រិត ដូច្នេះយើងត្រូវផ្ដល់អាទិភាព នៃការចំណាយហ្នឹង ហើយអាទិភាពនៃការចំណាយហ្នឹង គឺយើងត្រូវកាត់ការចំណាយដែលខ្ញុំយល់ថា មិនសូវចាំបាច់ អត់បានការគឺត្រូវបន្ថយចំនួនបុគ្គលមន្ត្រីរាជការជាន់ខ្ពស់ ហៅថាមន្ត្រីនយោបាយទៅចុះ»។
អស់រយៈពេលជាងបីខែក្រោមការដឹកនាំរបស់លោកនាយករដ្ឋមន្ត្រី ហ៊ុន ម៉ាណែត ពលរដ្ឋជាច្រើនកាន់តែធ្លាក់ក្នុងបំណុល និងធ្វើចំណាកស្រុកទៅស៊ីឈ្នួលនៅបរទេស។ ចំណែកលទ្ធិប្រជាធិបតេយ្យ និងសិទ្ធិមនុស្សក៏មិនទាន់មានភាពប្រសើរនោះដែរ ជាក់ស្ដែងអ្នកទោសនយោបាយ សកម្មជនដីធ្លី និងសកម្មជនសិទ្ធិមនុស្សជាង៣០ (៣២)នាក់ ជាប់នៅក្នុងពន្ធនាគារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។