ក្រុមយុវជនចលនាមាតាធម្មជាតិនៅថ្ងៃទី ១៨ កក្កដា បានបង្ហាញវីដេអូតស៊ូមតិថ្មីមួយទៀតបារម្ភពីសុវត្ថិភាពកោះកុងក្រៅ ក្នុងខេត្តកោះកុង ប្រសិនបើក្លាយជាកោះគ្រប់គ្រងដោយក្រុមហ៊ុនឯកជនរបស់ក្រុមឧកញ៉ា។ ពួកគេអំពាវនាវឱ្យពលរដ្ឋខ្មែរ ត្រូវសាមគ្គីគ្នារឹងមាំ ការពារកោះកុងក្រៅ ដើម្បីកុំឱ្យកោះដ៏ស្រស់ស្អាតមួយនេះធ្លាក់ក្នុងដៃឧកញ៉ា។
បើទោះជាសកម្មជនចលនាមាតាធម្មជាតិ៥នាក់កំពុងជាប់ពន្ធនាគារក្តី ក្រុមយុវជនចលនាមាតាធម្មជាតិបានផ្ញើសារពញ្ញាក់អារម្មណ៍ពលរដ្ឋខ្មែរឱ្យរួមគ្នាការពារធនធានធម្មជាតិ ដោយភ្ជាប់នូវសំណួរថា តើធនធានធម្មជាតិ សម្បូរបែបក្នុងតំបន់កោះកុងក្រៅ ជាឧទ្យានជាតិសមុទ្ររបស់ប្រជាជនខ្មែរឬជារបស់ឧកញ៉ាមួយចំនួន?
ក្រុមយុវជនស្រឡាញ់បរិស្ថានរកឃើញថា រដ្ឋាភិបាលបានលក់កោះកុងក្រៅឱ្យទៅឧកញ៉ា លី យ៉ុងផាត់ តាំងពីឆ្នាំ២០១៩ ដែលពួកគាត់បារម្ភថា ប្រសិនបើកោះកុងក្រៅ គ្រប់គ្រងដោយឧកញ៉ានោះ សេវាស្នាក់នៅ និងការដើរកម្សាន្ត នឹងមានតម្លៃថ្លៃ ជាក់ស្ដែងកោះសង្សារមានតម្លៃ ចន្លោះពី៥៩៥ដុល្លារ រហូតដល់៣៤០០ ដុល្លារក្នុងមួយយប់។
វីដេអូជាង ២នាទីរបស់សកម្មជនចលនាមាតាធម្មជាតិ (Mother Nature Cambodia) បានរៀបរាប់ថា ប្រសិនបើកោះកុងក្រៅក្លាយទៅជាឧទ្យានជាតិសមុទ្រ នោះធនធានធម្មជាតិទាំងអស់ត្រូវការពារ ប្រជាជនខ្មែរទៅលេងក្នុងតម្លៃសមរម្យ បូរណភាពទឹកដី ក៏ត្រូវបានការពារ។
វីដេអូ៖ «ហ្វូងត្រីចម្រុះពណ៌បណ្ដែតខ្លួនលើទឹកក្នុងព្រៃកោងកាង និងគយគន់ទេសភាពនាពេលថ្ងៃលិច។ ធនធានសម្បូរបែបទាំងនេះ គួរតែក្លាយជាឧទ្យានជាតិសមុទ្រសម្រាប់ប្រជាជនខ្មែរ ឬក៏ក្លាយជាកោះឯកជន?។ ដូចដែលបងប្អូនបានដឹងរួចហើយ រដ្ឋបានលក់កោះកុងក្រៅឱ្យទៅលោកឧកញ៉ា លី យ៉ុងផាត់។ តើធនធានសម្បូរបែបទាំងនេះ គួរតែក្លាយជាឧទ្យានជាតិសមុទ្រសម្រាប់ប្រជាជនខ្មែរ ឬក៏ក្លាយជាកោះឯកជន?ដូចដែលបងប្អូនបានដឹងរួចហើយ រដ្ឋបានលក់កោះកុងក្រៅឱ្យទៅលោកឧកញ៉ា លី យ៉ុងផាត់»។
ក្រុមយុវជនចលនាមាតាធម្មជាតិ កញ្ញា មាន លីសា ប្រាប់វិទ្យុអាស៊ីសេរីក្នុងគោលបំណងនៃការផលិតវីដេអូនេះ ចង់បង្ហាញប្រាប់ពលរដ្ឋខ្មែរឱ្យចាប់អារម្មណ៍ពីកោះកុងក្រៅ ដោយត្រូវរួបរួម គ្នាការពារធនធានធម្មជាតិដ៏មានតម្លៃនៅទីនោះ កុំឱ្យធ្លាក់ក្នុងដៃឧកញ៉ាមួយចំនួន។
កញ្ញាទាមទារឱ្យក្រសួងបរិស្ថានត្រូវបង្ហាញពីបច្ចុប្បន្នភាពកោះកុងក្រៅ ដែលខ្លួនធ្លាប់សន្យាថា នឹងបង្កើតជាឧទ្យានជាតិសមុទ្រកាលពីឆ្នាំ២០២១។
កញ្ញា មាន លីហ្សា៖ «យើងចង់ឱ្យប្រជាពលរដ្ឋគាត់មានការសាមគ្គីគ្នារួបរួមគ្នាការពារកោះកុងក្រៅ មិនមែនតែក្រុមចលនាមាតាធម្មជាតិកាលពីតែមួយក្រុមហ្នឹងទេ គឺការពារដើម្បីប្រយោជន៍រួម។ ទីពីរក្នុងបច្ចុប្បន្នភាពថាកោះកុងក្រៅមានធនធានជីវៈចម្រុះក្នុងទឹក ក្នុងសមុទ្រ នៅលើដី ក៏ដូចជាធនធានកម្រអ្វីខ្លះចង់ឱ្យបង្ហាញ ពីព្រោះក្រសួងបរិស្ថានបានសន្យាថា ដាក់កោះកុងក្រោយជាឧទ្យានសមុទ្រ»។
វិទ្យុអាស៊ីសេរីមិនទាន់អាចទាក់ទងសុំការបំភ្លឺរឿងនេះ ពីរដ្ឋមន្ត្រីក្រសួងបរិស្ថាន លោក អ៊ាង សុផល្លែត បាននៅឡើយទេ នៅថ្ងៃទី១៨ កក្កដា ដោយទូរស័ព្ទហៅចូល តែគ្មានអ្នកលើក។
ក៏ប៉ុន្តែកន្លងទៅ ក្រសួងបរិស្ថានបានប្រាប់ក្រុមយុវជនថា ពួកគេនឹងចុះស្រាវជ្រាវអភិវឌ្ឍកោះកុងក្រៅ និងដាក់កោះកុងក្រៅ ជាឧទ្យានជាតិសមុទ្រ។
ក្រុមយុវជនស្រឡាញ់បរិស្ថាន បានតស៊ូមតិ បង្កើតយុទ្ធនាការជាច្រើនទម្រង់មកហើយ ចាប់តាំងពីឆ្នាំ២០១៩ រួមមាន ការបង្ហោះរូបភាពបង្ហាញពីសក្ដានុពលកោះកុងក្រៅ ការនាំយុវជនទៅទស្សនកិច្ចសិក្សា ការផលិតវីដេអូផ្សព្វផ្សាយ និងការដាក់ញត្តិជាដើម។
រីឯស្ថាប័នអន្តរជាតិនៅទូទាំងសកលលោក បានគាំទ្រញត្តិរបស់ក្រុមយុវជន ដែលទាមទារឱ្យក្រសួងបរិស្ថានដាក់បញ្ចូលកោះកុងក្រៅជាឧទ្យានជាតិសមុទ្រ ហើយមកទល់ពេលនេះ មានមនុស្សជាង ១៣ ម៉ឺននាក់ហើយ(១៣៥.៤៤៩) បានបោះឆ្នោតគាំទ្រតាមអនឡាញ (Online)។
ជុំវិញរឿងនេះ ប្រធានសមាគមបណ្ដាញយុវជនកម្ពុជា (CYN) លោក ហេង គឹមហុង យល់ថា ការលើកឡើងរបស់ក្រុមយុវជនជារឿងត្រឹមត្រូវ ស្របតាមរដ្ឋធម្មនុញ្ញ ដែលរដ្ឋាភិបាលគួរតែប្រកាសពីភាពជាក់លាក់មួយ ការពារកោះកុងក្រៅឱ្យមានប្រសិទ្ធភាព។
លោក ហេង គឹមហុង៖ «ករណីកោះកុងក្រៅនេះ គឺមានភាពខ្វែងគំនិតគ្នាច្រើន យ៉ាងណាមិញដើម្បីបញ្ឈប់គំនិតខ្វែងគ្នានេះ រដ្ឋាភិបាលគួរប្រកាសភាពជាក់លាក់គោលនយោបាយរបស់ខ្លួន»។
កោះកុងក្រៅ មានទំហំធំល្វឹងល្វើយ ក្នុងលំហសមុទ្រកម្ពុជា មានទីតាំងក្នុងឃុំជ្រោយប្រស់ ស្រុកកោះកុង ខេត្តកោះកុង។ កោះនេះ គ្របដណ្ដប់ដោយព្រៃឈើក្រាស់ឃ្មឹក អមដោយទឹកជ្រោះជាច្រើនកន្លែងមានជីវចម្រុះជាច្រើនប្រភេទ មានឆ្នេរខ្សាច់សក្បុស ៦កន្លែង និងទឹកសមុទ្រពណ៌ខៀវស្រងាត់ ដែលពលរដ្ឋចាត់ទុកថា ជាឋានសួគ៌នៃទេសភាព ទាក់ទាញភ្ញៀវទេសចរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។