កងទ័ពមួយចំនួនធំដែលត្រូវបានបញ្ជូនទៅប្រចាំការនៅព្រំដែនកម្ពុជាវៀតណាម ត្រៀមបាញ់ទម្លាក់យន្តហោះគ្មានមនុស្សបើក ឬដ្រូន បានចល័តចេញពីតំបន់ព្រំដែនវិលបន្ទាយវិញហើយ ក្រោយគ្មានដ្រូនហោះចូលដីខ្មែរ។ អ្នកវិភាគថា ការដែលរដ្ឋាភិបាលចល័តទ័ពចុះឡើងមុនពេលបោះឆ្នោតបែបនេះ ព្រោះលោកនាយករដ្ឋមន្ត្រី ហ៊ុន សែន មានចេតនាបំភិតបំភ័យពលរដ្ឋឱ្យភ័យខ្លាចដើម្បីចំណេញនយោបាយប៉ុណ្ណោះ។
ការឈរជើងប្រចាំការរបស់កងទ័ពលោក ហ៊ុន សែន រយៈពេលជិត៣សប្ដាហ៍នៅព្រំដែនកម្ពុជា វៀតណាម កន្លងមកនេះ មិនទទួលលទ្ធផលដូចការរំពឹងទុកទេ ដោយការចល័តទ័ពទ្រង់ទ្រាយធំនេះ មិនបានបាញ់ទម្លាក់ យន្តហោះគ្មានមនុស្សបើក ឬដ្រូន សូម្បីតែមួយគ្រឿង។ អ្នកវិភាគនយោបាយ លោក គឹម សុខ នៅតែចាត់ទុកថា ករណីដ្រូនហោះចូលដីខ្មែរ ជាល្បិចរបស់លោក ហ៊ុន សែន ដែលលោកពង្រាយកម្លាំងគំរាមផ្ទៃក្នុងគណបក្សរបស់លោក ហើយចំណុចសំខាន់មួយគឺលោក ហ៊ុន សែន ចង់គំរាមពលរដ្ឋមិនឱ្យហ៊ានងើបតវ៉ា ប្រឆាំងរឿងអយុត្តិធម៌សង្គម និងបញ្ហាបោះឆ្នោត។ ទោះយ៉ាងណា លោក គឹម សុខ យល់ថា ផែនការរបស់ហ៊ុន សែន ទំនងមិនអាចបន្លាចពលរដ្ឋឡើយ តែធ្វើឱ្យពលរដ្ឋខឹងលោក ហ៊ុន សែន កាន់តែខ្លាំង ហើយពលរដ្ឋអាចនាំគ្នាគូសខ្វែងលើសន្លឹកឆ្នោតនៅថ្ងៃទី២៣ ខែកក្កដា ខាងមុខ។
លោក គឹម សុខ៖«លោក ហ៊ុន សែន បារម្ភថា ខ្លាចចាញ់យុទ្ធនាការគូសសន្លឹកឆ្នោតចោល ដែលដឹកនាំដោយលោក សម រង្ស៊ី។ វត្ថុបំណងរបស់គាត់ធំៗ តែប៉ុណ្ណឹង អត់មានការពារជាតិ ទៅបាញ់ដ្រូនអីនោះទេ។ ចិត្តសាស្ត្រនយោបាយលោក ហ៊ុន សែន គាត់ភ័យព្រួយខ្លាំងណាស់។ មែនទែនបើទោះបីជាគាត់បង្ហាញកម្លាំងប៉ុណ្ណា ក៏ប្រជាពលរដ្ឋនៅតែមិនខ្លាច ហើយនៅតែចង់តស៊ូប្រឆាំងនឹងគាត់ និងផ្លាស់ប្ដូរគាត់ និងក្រុមគ្រួសាររបស់គាត់ ចង់និយាយអំណាចណា»។
ស្រដៀងគ្នានេះដែរ អតីតសមាជិកគណបក្សសង្គ្រោះជាតិ លោក អ៊ុំ សំអាន លើកឡើងថា រៀងរាល់មុនការបោះឆ្នោតម្ដងៗលោក ហ៊ុន សែន តែងរៀបចំឆាកល្ខោន ឱ្យពលរដ្ឋមើលទៅឃើញថា លោកជាមេដឹកនាំជាតិនិយម ស្រឡាញ់ទឹកដី។ លោកបន្តថា បើទោះជាអាណត្តិនេះ គ្មានគណបក្សប្រកួតប្រជែងក្ដី ប៉ុន្តែ លោក ហ៊ុន សែន នៅតែលេងល្ខោនជាតិនិយមនេះដដែល ដើម្បីចង់ឱ្យពលរដ្ឋទៅបោះឆ្នោតជូនគណបក្សប្រជាជនកម្ពុជា ព្រោះលោកព្រួយបារម្ភថា ខ្លាច ពលរដ្ឋទៅគូសខ្វែងលើសន្លឹកឆ្នោត នៅថ្ងៃបោះឆ្នោតខាងមុខ ដែលអាចធ្វើឱ្យរដ្ឋាភិបាលរបស់លោក ហ៊ុន សែន រងភាពអាម៉ាស់។
លោក អ៊ុំ សំអាន៖«គាត់(លោក ហ៊ុន សែន)ខ្លាចប្រជាពលរដ្ឋអត់ទៅបោះឆ្នោត ឬទៅបោះឆ្នោតហើយគូសសន្លឹកឆ្នោតចោលហើយមិនគាំទ្ររដ្ឋាភិបាលរបស់គាត់ ដូច្នេះគាត់ចង់សំដែងដ្រូន ដែលឃើញគណបក្សប្រជាជនមួយចំនួនថា អូ!សម្ដេចស្នេហាជាតិណាស់ ទៅការពារព្រំដែនមិនឱ្យយួន(វៀតណាម)ឈ្លានពានអ៊ីចឹងណា បំផុសគំនិតជាតិនិយមម្ដងទៀតណា»។
ក្រុមមន្ត្រីជាន់ខ្ពស់យោធាឱ្យដឹងថា ពេលនេះកងទ័ពភាគច្រើនបានចល័តពីព្រំដែនកម្ពុជាវៀតណាម វិលចូលបន្ទាយរបស់ខ្លួនវិញហើយ។
អគ្គមេបញ្ជាការរង និងជានាយសេនាធិការចម្រុះនៃកងយោធពលខេមរភូមិន្ទ លោក ឥត សារ៉ាត់ ប្រាប់សារព័ត៌មានក្នុងស្រុកខែមបូចា (cambojanews) កាលពីថ្ងៃទី១២ ខែកក្កដាថា កងកម្លាំងមួយចំនួនធំដែលឈរជើងនៅតំបន់ព្រំដែនកម្ពុជាវៀតណាម ត្រូវបានចល័តចូលបន្ទាយវិញកាលពីសប្ដាហ៍មុនម្ល៉េះ។ សារព័ត៌មានដដែលក៏បានដកស្រងសំដី អ្នកនាំពាក្យអគ្គបញ្ជាការដ្ឋានកងយោធពលខេមរភូមិន្ទ លោក ថោង សូលីម៉ូ ចុះផ្សាយដែរថា ចាប់តាំងពីមានការបញ្ជូនទ័ព និងអាវុធ ទៅតំបន់មានដ្រូនហោះចូលដីខ្មែរ គឺលែងមានដ្រូនទាំងនោះហោះចូលទៀតហើយ។
ទាក់ទងការដកទ័ពនេះ វិទ្យុអាស៊ីសេរីមិនអាចសុំការអត្ថាធិប្បាយពី អ្នកនាំពាក្យក្រសួងការពារជាតិ លោក ឈុំ សុជាត ប្រធានក្រុមអង្គរក្សរបស់លោក ហ៊ុន សែន គឺលោក ហ៊ីង ប៊ុនហៀង អ្នកនាំពាក្យអគ្គបញ្ជាការដ្ឋានកងយោធពលខេមរភូមិន្ទ លោក ថោង សូលីម៉ូ និងប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន បានទេ នៅថ្ងៃទី១៤ ខែកក្កដា។ ចំណែក អ្នកនាំពាក្យកងទ័ពជើងគោក លោក ម៉ៅ ផល្លា សុំមិនធ្វើអត្ថាធិប្បាយលើរឿងនេះទេ។
ដោយឡែកអ្នកនាំពាក្យគណបក្សប្រជាជនកម្ពុជា លោក សុខ ឥសាន ថា មិនបានដឹងរឿងកិច្ចការយោធាទេ។ ទោះយ៉ាងណា លោក សុខ ឥសាន អះអាងថា ការចល័តទ័ពនេះគ្មានចេតនា ធ្វើឱ្យពលរដ្ឋភ័យខ្លាចឡើយ ប៉ុន្តែរដ្ឋាភិបាលធ្វើដើម្បីការពារដែនអធិបតេយ្យភាពរបស់កម្ពុជាប៉ុណ្ណោះ។
លោក សុខ ឥសាន៖«រឿងអីភ័យខ្លាចគេការពារសន្តិភាពណា ហើយការពារដើម្បីរក្សាសន្តិភាពហ្នឹងហើយបើរក្សាសន្តិភាពរឿងអីភ័យខ្លាច កងទ័ពគេការពារជាតិគ្រប់ពេលវេលាទាំងយប់ទាំងថ្ងៃអត់មានដឹងពេលណាជាពេលណាទេ ឱ្យតែការពារបាន»។
កាលពីចុងខែមិថុនា លោក ហ៊ុន សែន បានចេញបទបញ្ជាពីរថ្ងៃជាប់ឱ្យកម្លាំងទាហានជាង ១ម៉ឺន នាក់ រួមទាំងយកអាវុធ ទំនើបគ្រប់ធុនផង ឱ្យទៅបាញ់ទម្លាក់ដ្រូន ដែលលោកចោទប្រកាន់ថា បានលួចហោះចូលទឹកដីកម្ពុជា ជាប់ព្រំដែនវៀតណាម ក្នុងខេត្តរតនគិរី មណ្ឌលគិរី ក្រចេះ ស្ទឹងត្រែង និងខេត្តត្បូងឃ្មុំជាដើម។ ការចល័តទ័ពរបស់លោក ហ៊ុន សែន នេះកើតឡើងស្របពេលដែលគណបក្សភ្លើងទៀន ដែលជាគណបក្សប្រឆាំងចុងក្រោយនៅកម្ពុជា ត្រូវបានគ.ជ.ប ដែលស្ថិតក្រោមឥទ្ធិពលបក្សកាន់អំណាចរារាំងមិនឱ្យចូលរួមការបោះឆ្នោត ហើយលោក សម រង្ស៊ី ប្រធានស្ដីទីគណបក្សសង្គ្រោះជាតិ ប្រកាសវិលចូលស្រុកវិញតាមទឹកដីវៀតណាម និងប្រទេសជាប់ព្រំដែនកម្ពុជាផ្សេងទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។