មេធាវីតំណាងប្រធានសង្គ្រោះជាតិលោក កឹម សុខា ចង់ឃើញសាលាឧទ្ធរណ៍ភ្នំពេញកាត់ក្តីដោយឯករាជ្យពីរឿងនយោបាយ និងប្រគល់សេរីភាពជូនកូនក្តីវិញ ។ ការលើកឡើងនេះ ធ្វើឡើងបន្ទាប់ពីលោក ហ៊ុន សែន កាលពីពេលថ្មីៗនេះព្រមានថា លោក កឹម សុខា អាចជាប់ទោសបន្ថែម ក្រោយពេលលោក សម រង្ស៊ី បង្ហោះសារធ្វើបាតុកម្មប្រឆាំងការដឹកនាំរបស់ក្រុមគ្រួសារត្រកូលហ៊ុន។ អ្នកឃ្លាំមើលយល់ថា ការប្រើប្រាស់ប្រព័ន្ធតុលាការធ្វើជាអាវុធក្នុងការបំបិទមាត់ពលរដ្ឋរហូតដល់អ្នកនយោបាយប្រឆាំងគឺជាការធ្វើទុក្ខបុកម្នេញផ្នែកនយោបាយ។
មេធាវីរបស់ប្រធានគណបក្សសង្គ្រោះជាតិថា បើតុលាការបំពេញការងារដោយតម្លាភាព នឹងច្រានចោលចំពោះសេចក្ដីសម្រេចរបស់សាលាដំបូងដើម្បីផ្ដល់យុត្តិធម៌ និងសេរីភាពដល់ លោក កឹម សុខា វិញនៅពេលខាងមុខ។
សហមេធាវីការពារក្តី គឺលោក ផែង ហេង ប្រាប់វិទ្យុអាស៊ីសេរីនៅថ្ងៃទី២៦ ខែកក្កដា ថាសាលាឧទ្ធរណ៍បានបិទបញ្ចប់ការសាកសួរ និងសម្រេចធ្វើសេចក្ដីសន្និដ្ឋានពាក់ព័ន្ធសំណុំរឿងរបស់លោក កឹម សុខា នៅពាក់កណ្តាលខែកញ្ញាខាងមុខ។ លោកថាបើតាមច្បាប់ និងអង្គហេតុដែលមេធាវីបង្ហាញទៅកាន់តុលាការកន្លងមក គឺកូនក្តីរបស់លោកជាមនុស្សស្អាតស្អំ ដោយមិនបានធ្វើបាតុកម្មខុសច្បាប់ ឬឃុបឃិតគ្នាផ្ដួលរំលំរដ្ឋាភិបាលដូចការចោទប្រកាន់នោះទេ។ លោក ផែង ហេង បញ្ជាក់ថា ទោះបីបុគ្គលសាធារណៈ ឬអ្នកនយោបាយរូបណាមួយចោទប្រកាន់ ដាក់បន្ទុកលើកូនក្តីរបស់លោកយ៉ាងណា តែបើតុលាការឈរលើភាពឯករាជ្យ និងមានឆន្ទានុសិទ្ធិគ្រប់គ្រាន់ក្នុងការសម្រេចក្តីដោយយុត្តិធម៌ កូនក្តីរបស់លោកនឹងរួចផុតពីការចោទប្រកាន់។
លោក ផែង ហេង៖ «ឱ្យតែតុលាការឯករាជ្យ មានឆន្ទានុសិទ្ធិក្នុងការសម្រេចក្តី ខ្ញុំគិតថាកូនក្តីខ្ញុំនឹងរួចផុតពីបទចោទ។ និយាយជារួមទៅ អ្នកនយោបាយក៏ជាអ្នកសរសេរច្បាប់ អ្នកអនុម័តច្បាប់ គួរតែយល់ថា អ្វីជាច្បាប់ ម៉េចបានក្រៅច្បាប់ យើងជាមេធាវីមិនមានស្នើដល់ពួកគាត់ទេ គឺមានតែពួកគាត់ទេត្រូវគិតខ្លួនឯងធ្វើហ្នឹងសមជាគំរូសម្រាប់ពលរដ្ឋជឿ និងបោះឆ្នោតឱ្យទៀត ឬក៏អត់តែប៉ុណ្ណឹងទេ»។
ប្រតិកម្មនេះ ធ្វើឡើងបន្ទាប់ពីប្រធានព្រឹទ្ធសភាលោក ហ៊ុន សែន ដែលជាឪពុកលោកនាយករដ្ឋមន្ត្រីលោក ហ៊ុន ម៉ាណែត ថ្លែងសារស្ដីពីកិច្ចសហប្រតិបត្តិការតំបន់អភិវឌ្ឍន៍ត្រីកោណពិសេស(CLV) កម្ពុជា ឡាវ និងវៀតណាម កាលពីថ្ងៃទី២៣ ខែកក្កដា ដោយលោក ហ៊ុន សែន ប្រាប់រដ្ឋាភិបាលកូនរបស់លោកកុំឱ្យមើលងាយស្ថានការណ៍នៅក្នុងប្រទេស នៅពេលដែលអ្នកនយោបាយក្រៅប្រទេស បង្ហោះវីដេអូធ្វើបាតុកម្មប្រឆាំងនៅលើបណ្តាញសង្គមជាបន្តបន្ទាប់។ ឆ្លៀតក្នុងឱកាសនោះ លោក ហ៊ុន សែន ព្រមានទុកជាមុនថាសកម្មភាពទាំងនោះនឹងធ្វើឱ្យដៃគូនៅក្នុងប្រទេសជាប់គុកបន្ថែមទៀត។ លោក ហ៊ុន សែន និយាយដូច្នេះទំនងចង់សំដៅលើមេដឹកនាំគណបក្សប្រឆាំងលោក សម រង្ស៊ី ដែលជាដៃគូនយោបាយជាមួយលោក កឹម សុខា កំពុងជាប់ក្ដីក្ដាំនៅសាលាឧទ្ធរណ៍ភ្នំពេញ។
លោក ហ៊ុន សែន៖ «អាខ្លះបង្ហោះហា៎ បង្ហោះបាតុកម្មថ្មីៗ បង្ហោះបាតុកម្មស្មើអី ស្មើអាមួយនៅភ្នំពេញដែលសាលាឧទ្ធរណ៍រៀបកាត់បន្ថែមទម្ងន់ទោសឱ្យអាមួយហ្នឹង ហ្អែងសូមផ្តាំទៅ យុទ្ធវិធីហ្អែងធ្វើឱ្យដៃគូ ហ្អែងជាប់គុកថែមតែប៉ុណ្ណឹងទេ ចាំមើលទៅ ហ្អែងបង្ហោះ ហ្អែងបង្កើតតិកតុក(ឆាណែលតិកតុក)ហ្អែងបង្ហោះបាតុកម្មកន្លែងនេះកន្លែងនេះ ឈរឆ្ការដៃឆ្ការជើង ហ៊ុន សែន អើយ ចុះចេញទៅ អាហ្នឹងស្មើនឹងរុញអាមួយនៅភ្នំពេញជាប់គុកថែម ហ្អែងចាំមើលទៅ!»។
សាលាឧទ្ធរណ៍កាលពីថ្ងៃទី០៤ ខែកក្កដា បានបិទបញ្ចប់ការសាកសួរ និងសម្រេចធ្វើសេចក្ដីសន្និដ្ឋាននៅថ្ងៃទី១៩ ខែកញ្ញាខាងមុខ លើបណ្ដឹងជំទាស់របស់មេដឹកនាំបក្សប្រឆាំងលោក កឹម សុខា ប្រឆាំងនឹងសេចក្ដីសម្រេចរបស់សាលាដំបូងរាជធានីភ្នំពេញ។
សាលាដំបូងរាជធានីភ្នំពេញកាលពីថ្ងៃទី៣ ខែកុម្ភៈ ឆ្នាំ២០២៣ បានផ្ដន្ទាទោសលោក កឹម សុខា វ័យ៧០ឆ្នាំ ដាក់ពន្ធនាគាររយៈពេល ២៧ឆ្នាំ ពីបទសន្ទិដ្ឋិភាពជាមួយបរទេស ឬឃុបឃិតត្រូវរ៉ូវគ្នាជាមួយបរទេស ដែលត្រូវបានចោទប្រកាន់តាំងពីឆ្នាំ២០១៧។ តុលាការបានដាក់បម្រាមមិនឱ្យលោក កឹម សុខា ធ្វើនយោបាយ មិនឱ្យចេញពីផ្ទះ មិនអនុញ្ញាតឱ្យជួបភ្ញៀវបរទេស លើកលែងតែមានការអនុញ្ញាតពីតុលាការ។ ទោះជាយ៉ាងណាសហគមន៍ជាតិ និងអន្តរជាតិចាត់ទុកថា សំណុំរឿងនេះ ជារឿងនយោបាយ និងទាមទារឱ្យលុបចោលការចោទប្រកាន់និងប្រគល់សេរីភាពពេញលេញជូនមេបក្សប្រឆាំងរូបនេះវិញ។
ជុំវិញរឿងនេះ អ្នកឃ្លាំមើលការរំលោភសិទ្ធិមនុស្ស និងសង្គមលោក ស៊ឹង សែនករុណា មានប្រសាសន៍ថាសាររបស់លោក ហ៊ុន សែន បំពានលើគោលការណ៍ច្បាប់ ហើយនេះបង្ហាញឱ្យសាធារណជនទូទៅមើលឃើញកាន់តែច្បាស់ថា ការសម្រេចក្តីក្នុងសំណុំរឿងរបស់លោក កឹម សុខា កន្លងមក គឺជារឿងនយោបាយដែលលោកប្រៀបទៅនឹងឆាកល្ខោនសម្ដែងតែប៉ុណ្ណោះ។ លោក ស៊ឹង សែនករុណា មើលឃើញថា ការណ៍ដែលលោក ហ៊ុន សែន ចេញមកគំរាមមនុស្សមិនរើសមុខ ទំនងមកពីអ្នកកាន់អំណាចរូបនេះចង់ទប់ស្កាត់ចរន្តពលរដ្ឋងើបតវ៉ាប្រឆាំងនឹងអំពើអយុត្តិធម៌ និងបញ្ហានជាច្រើនទៀតនៅក្នុងសង្គម។
លោក ស៊ឹង សែនករុណា៖ «ករណីនេះ ខ្ញុំយល់ថា គ្មានយុត្តិធម៌អ្វីទេសម្រាប់លោក កឹម សុខា ហ្នឹងគាត់គ្រាន់តែនៅក្នុងការរារាំង ការបិទសិទ្ធិសេរីភាព កំដរតាមនីតិវិធីតាមការគូសវៀសទៅតាមតុលាការតែប៉ុណ្ណឹង គ្មានទទួលបានយុត្តិធម៌អ្វីទេ លើកលែងតែមានសម្ពាធធ្ងន់ធ្ងរពីសហគមន៍អន្តរជាតិខ្លាំងក្លាឡើង បើមិនមានការជជែកគ្នារវាងអ្នកនយោបាយទេ កម្ពុជានឹងមានវិធានការដាក់សម្ពាធមិនអាចទ្រាំបាន អាហ្នឹងបានអាចចាប់ផ្តើមបញ្ចប់នីតិវិធី(នៅតុលាការ)ហ្នឹង បើមិនអ៊ីចឹងទេវានៅតែរបៀបហ្នឹងឯងបាទ»។
លោក ស៊ឹង សែនករុណា បញ្ជាក់ថា ការបំបិទសិទ្ធិសេរីភាព និងការប្រើប្រាស់ប្រព័ន្ធតុលាការធ្វើជាឧបករណ៍នយោបាយដើម្បីបំបិទមាត់អ្នកដែលមាននិន្នាការផ្ទុយមិនមែនជាដំណោះស្រាយសម្រាប់ផលប្រយោជន៍ជាតិឡើយ។ ផ្ទុយទៅវិញបញ្ហានេះធ្វើឱ្យពលរដ្ឋខឹងសម្បារ និងនាំគ្នាចេញតវ៉ាប្រឆាំងរដ្ឋាភិបាលកាន់តែច្រើន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។