លោក កឹម សុខា ស្នើតុលាការឱ្យចេញសាលក្រម ក្នុងសំណុំរឿងលោកឱ្យបានលឿន ដើម្បីបញ្ចប់ទុក្ខវេទនា។ លោក កឹម សុខា លើកឡើងដូច្នេះ ក្នុងពេលសាលាដំបូងរាជធានីភ្នំពេញសម្រេចបិទបញ្ចប់ការសួរដេញដោលនានា លើអង្គហេតុនៃសំណុំរឿងក្បត់ជាតិរបស់មេបក្សប្រឆាំង គឺលោក កឹម សុខា នៅសវនាការលើកទី៦២ ថ្ងៃទី១៩ ខែតុលា។ មេធាវីលោក កឹម សុខា ស្វាគមន៍ការសម្រេចបិទបញ្ចប់ការសាកសួរនេះ ប៉ុន្តែសោកស្ដាយ ដែលតុលាការទុកអូសបន្លាយរយៈធ្វើសារណា ឬការធ្វើសេចក្ដីសន្និដ្ឋាន ដែលត្រូវចំណាយជាង ២ខែ។
ទីបំផុតសំណុំរឿងមេបក្សប្រឆាំង ដែលស៊ីពេលជាង ៥ឆ្នាំត្រូវបានតុលាការបិទបញ្ចប់ការសួរដេញដោលហើយ។ ចៅក្រមជំនុំជម្រះលោក កូយ សៅ សម្រេចទុកពេលជាង ២ខែទៀតឱ្យភាគីពាក់ព័ន្ធសរសេរសារណាធ្វើសេចក្ដីសន្និដ្ឋានដាក់ជូនតុលាការ។
ទោះយ៉ាងណាក្ដី លោក កឹម សុខា ស្នើទៅតុលាការក្នុងពេលបើកសវនាការនោះថា លោកជំរុញទៅតុលាការ គួរចេញសាលក្រមកាត់ទោសលើរូបលោក ឱ្យបានលឿនក្នុងពេលឆាប់ៗ នេះ ដើម្បីផ្ដល់យុត្តិធម៌ដល់រូបលោក។ លោកបន្តទៀត លោកមិនចង់រងទុក្ខវេទនាបែបនេះយូរទៀតទេ។
មេធាវីការពារក្ដីលោក កឹម សុខា លោក ចាន់ ចេន ប្រាប់អ្នកសារព័ត៌មានក្រោយចប់សវនាការថា រយៈពេលជាង ២ខែនេះ ធ្វើឱ្យខាតប្រយោជន៍ ឬខាតពេលលោក កឹម សុខា បន្ថែមទៀត។ លោកមេធាវីបន្តថា ចាប់តាំងសវនាការទី១ ដល់សវនាការទី៦ ៣នេះ ក្រុមមេធាវីលោក កឹម សុខា បានធ្វើសេចក្ដីសន្និដ្ឋាន ជាបន្តបន្ទាប់ជិតរួចរាល់ ហើយពួកគេត្រូវការពេលត្រឹមពីរសប្ដាហ៍ប៉ុណ្ណោះគឺគ្រប់គ្រាន់សម្រាប់សរសេរសារណាការពារប្រយោជន៍ជូនលោក កឹម សុខា៖ « បណ្ដាគូភាគីបានធ្វើការនូវចំណុចសំខាន់ៗ រៀងខ្លួនចំណុចកត់ត្រាហ្នឹង ហើយជាផ្នែកមួយនៃសេចក្ដីសន្និដ្ឋាននេះ រឿងទី១។ រឿងទី២ គ្រប់ភាគីទាំងអស់ បានសិក្សាសំណុំរឿងល្អិតល្អន់ដូចគ្នា។ សម្រាប់យើងគឺថា រយៈពីរសប្ដាហ៍ហ្នឹង គឺជាពេលវេលាមួយសមស្របសម្រាប់គូភាគីដាក់សេចក្ដីសន្និដ្ឋានការពារប្រយោជន៍កូនក្ដីរៀងៗ ខ្លួនបាទ»។
ទាក់ទងការកំណត់រយៈពេលជាង ២ខែ ដើម្បីគ្រប់ភាគីធ្វើសេចក្ដីសន្និដ្ឋាននេះដែរ តំណាងអយ្យការបានស្នើសុំពេល ៣ខែ ដោយសំអាងថា សំណុំរឿងនេះវែង ចំណែកមេធាវីរដ្ឋាភិបាល ដែលភាគីដើមបណ្ដឹងស្នើសុំរយៈពេល ២ខែ ដោយឡែក មេធាវីការពារលោក កឹម សុខា ស្នើសុំពេល ២សប្ដាហ៍ ដើម្បីធ្វើសេចក្ដីសន្និដ្ឋាន ហើយចុងក្រោយតុលាការសម្រេចទុករយៈពេលជាង ២ខែ ដើម្បីឱ្យគ្រប់ភាគីធ្វើសេចក្ដីសន្និដ្ឋាន។ តុលាការតម្រូវឱ្យគ្រប់ភាគីត្រូវប្រគល់សារណាមកតុលាការនៅថ្ងៃទី២១ ខែធ្នូ ខាងមុខ។ ការធ្វើសេចក្ដីសន្និដ្ឋាននេះ មានទាំងការសរសេរសារណាជាលាយលក្ខណ៍អក្សរ និងការធ្វើសេចក្ដីសន្និដ្ឋានដោយផ្ទាល់មាត់ក្នុងសវនាការ។
ទាក់ទងសវនាការសួរដេញដោលថ្ងៃចុងក្រោយនេះដែរ តុលាការមិនបានកោះហៅសាក្សីមកសាក្សីបន្ថែមទៀតទេ ក្រោយតុលាការបានកោះហៅសាក្សីចំនួន០៩នាក់មកសាកសួរ ក្នុងនោះរួមអ្នកនាំពាក្យគណបក្សកាន់អំណាច អតីតទីប្រឹក្សាគណបក្សសង្គ្រោះជាតិ មន្ត្រីសង្គមស៊ីវិល យុវជនធ្វើការងារសង្គម និងអតីតសកម្មជនគណបក្សសង្គ្រោះជាតិ ដែលធ្លាប់ទៅរៀនវគ្គសិក្សាខ្លីនៅប្រទេសឥណ្ឌូណេស៊ីជាដើម។ ទោះយ៉ាងណា តុលាការមិនបានសាកសួរសាក្សីដែលជាសមត្ថកិច្ចចុះចាប់ខ្លួនលោក កឹម សុខា កាលពីឆ្នាំ២០១៧ មកឆ្លើយបំភ្លឺទេ ទោះជាមានការទាមទារពីមេធាវីការពារលោក កឹម សុខា យ៉ាងណាក្ដី។
ជុំវិញចម្លើយរបស់សាក្សីនេះដែរ មេធាវីការពារលោក កឹម សុខា ម្នាក់ទៀត គឺលោក ផែង ហេង ឱ្យដឹងដែរថា តុលាការបានយករូបភាព (ស្លាយ) ដែលជាភស្តុតាងចោទប្រកាន់ថា សាក្សី ដែលសកម្មជនគណបក្សសង្គ្រោះជាតិ និងយុវជនធ្វើការងារសង្គមទៅរៀនវគ្គខ្លីនៅប្រទេសឥណ្ឌូនេស៊ី (Indonesia) ជាការរៀនពីរបៀបធ្វើបដិវត្តន៍ពណ៌ ប៉ុន្តែ សាក្សីបំភ្លឺជូនតុលាការថា ពួកគេមិនដែលបានឃើញរូបនេះទេ។ លោកមេធាវីកត់សម្គាល់ចំណុចមួយទៀត គឺវីដេអូ ដែលតំណាងអយ្យការយកមកចោទប្រកាន់លោក កឹម សុខា ជាភស្តុតាងក្លែងក្លាយ។ លោកមេធាវីរំពឹងថា កូនក្ដីរបស់លោក នឹងរួចផុតការចោទប្រកាន់នៅពេលខាងមុខនេះ៖ « សាក្សីថា មិនដែលឃើញស្លាយបែបហ្នឹងទេ ហើយគេទៅរៀនតែរឿងបោះឆ្នោតហើយទី២ យើងមើលតំណាងអយ្យការ ឬសមត្ថកិច្ចដាក់មកនោះ ជាវីដេអូកាត់ត ចង់មិនចង់ គឺយើងដឹងទាំងអស់គ្នាហើយថា របស់ដែលគេកាត់ត កាត់ចិញ្ច្រាំហើយយកមកតភ្ជាប់ជារបស់ថ្មីមួយជារបស់ក្លែងក្លាយ ហើយមិនមែនជារបស់ពិតហើយ។ បាទដូច្នេះសម្រាប់យើងជាមេធាវីការពារក្ដី គឺយើងមិនឃើញថា រឿងនេះអត់មានអង្គហេតុទេ»។
ទាក់ទងចម្លើយរបស់ក្រុមសាក្សី ដែលធ្លាប់បានទៅនៅប្រទេសឥណ្ឌូនេស៊ីនេះដែរ ពួកគេបានផ្ដល់សក្ខីកម្មឬចម្លើយជូនតុលាការថា ពួកគេទៅសិក្សាពីតួនាទីយុវជនក្នុងការងារបោះឆ្នោត មិនមែនរៀនពីការធ្វើបដិវត្តន៍ពណ៌ដូចការចោទប្រកាន់ឡើយ។
ជុំវិញរឿងនេះដែរ មន្ត្រីជាន់ខ្ពស់នៃសមាគមការពារសិទ្ធិមនុស្ស អាដហុក លោក យី សុខសាន្ដ ដែលតាមដានដំណើរការសវនាការនេះ សង្កេតឃើញថា អង្គហេតុ ដែលតុលាការចោទប្រកាន់លោក កឹម សុខា ជុំវិញការធ្វើបាតុកម្មអំឡុងឆ្នាំ២០១៣ ប៉ុន្តែក្រុមយុវជនទៅនៅប្រទេសឥណ្ឌូនេស៊ី គឺនៅឆ្នាំ២០១៦ឯណោះទេ។ លោកបន្តថា ដំណើរការយុត្តិធម៌មិនអាចទាញធាក់ថយក្រោយដូច្នេះបានទេ។ មន្ត្រីសិទ្ធិមនុស្សរូបនេះ យល់ថា សំណុំរឿង ដែលមានចរិតនយោបាយមួយនេះបក្សកាន់អំណាចគួរដល់ពេលដោះស្រាយបញ្ចប់ ដើម្បីឆ្ពោះទៅការផ្សះផ្សាជាតិឡើងវិញ៖ « គេហៅថា ផ្សះផ្សាជាតិណាកុំឱ្យមានការបែកបាក់ បើសិនជាចោទចុះចោទឡើង ធ្វើឱ្យភាគីនីមួយៗ រកកំហុសគ្នាទៅវិញទៅមកដោយគ្មានទីបញ្ចប់ហើយទោះបីយើងប្រើប្រព័ន្ធន្ធតុលាការ ក៏ជារឿងមួយធ្វើឱ្យភាគីចាញ់ក្ដីឈ្នះក្ដីមិនសុខចិត្តទៅលើសេចក្ដីសម្រេចនេះដែរ។ ដូច្នេះ ភាគីទាំងសងខាងគួរតែរកចំណុចរួមមួយ ដើម្បីចរចាបញ្ចប់រឿងនយោបាយនេះ»។
ដូចគ្នានេះដែរអ្នកគាំទ្រលោក កឹម សុខា ម្នាក់ដែលមកឃ្លាំមើលតុលាការ លោក ជា សាមួន សង្ឃឹមថា លោក កឹម សុខា នឹងទទួលបានយុត្តិធម៌ឡើងវិញ ព្រោះលោក កឹម សុខា មិនបានឃុបឃិតជាមួយរដ្ឋបរទេសណាមួយ ដើម្បីផ្ដួលរំលំរដ្ឋាភិបាលនោះទេ៖ « ខ្ញុំសង្កេតឃើញរឿងទាំងអស់នេះ ការដាក់បន្ទុកទៅលើគាត់ ( លោក កឹម សុខា ) គឺជារឿងមួយ ដែលអត់ពិតប្រាកដ បើសម្រាប់ខ្ញុំ ខ្ញុំថា គាត់ ត្រូវតែទទួលបាននូវយុត្តិធម៌ដ៏ពិតប្រាកដ»។
ទាក់ទងសវនាការនេះដែរ ក្រៅពីមានអ្នកគាំទ្រលោកជាង ៣០នាក់ឈរនៅមុខតុលាការ នៅក្នុងបន្ទប់តុលាការក៏មន្ត្រីអង្គការសហប្រជាជាតិ តំណាងអង្គទូតប្រទេសសេរី និងមន្ត្រីសង្គមស៊ីវិល ចូលរួមឃ្លាំមើលសវនាការនេះដែរ។
លោក កឹម សុខា រងការចាប់ខ្លួនជាង ៥ឆ្នាំ និងត្រូវបានតុលាការចោទប្រកាន់ពីសន្ទិដ្ឋភាពជាមួយរដ្ឋបរទេស ដើម្បីផ្ដួលរំលំរដ្ឋាភិបាលលោក ហ៊ុន សែន កាលពីឆ្នាំ២០១៧។ តុលាការបានចាប់ផ្ដើមជំនុំជម្រះសំណុំរឿងនេះ កាលពីដើមខែមករា ឆ្នាំ២០២០ ប៉ុន្តែដោយសារបញ្ហាជំងឺកូវីដ១៩ តុលាការបានផ្អាកសវនាការនេះជាញឹកញាប់។ តុលាការនឹងបន្តសវនាការលោក កឹម សុខា ចាប់ពីថ្ងៃទី២១ ខែធ្នូ ខាងតទៅទៀត ដើម្បីស្ដាប់ការធ្វើសេចក្ដីសន្និដ្ឋានរបស់ភាគីពាក់ព័ន្ធជុំវិញសវនាការនេះ។ តាមនីតិវិធី ក្រោយតុលាការស្ដាប់ការធ្វើសន្និដ្ឋានរួចហើយ តុលាការអាចនឹងប្រកាសសាលក្រម ដែលជាការរកឃើញថា លោក កឹម សុខា មានទោស ឬគ្មានពាក់ព័ន្ធការចោទប្រកាន់នេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។