ប្រធានក្រុមប្រឹក្សាជំនុំជម្រះនៃតុលាការក្រុងភ្នំពេញ បានជូនដំណឹងថា នៅថ្ងៃទី១ ដើមខែមីនា ខាងមុខ តុលាការនឹងបើកសវនាការរឿងក្ដីឃាតកម្មលើលោកបណ្ឌិត កែម ឡី។
ប្រជាពលរដ្ឋ សិស្ស និស្សិត និងអាជីវករនៅតែមិនជឿលើការស៊ើបអង្កេត និងសវនាការនេះថា នឹងអាចផ្តល់ភាពយុត្តិធម៌ចំពោះសពលោកបណ្ឌិត កែម ឡី នោះទេ។
គិតត្រឹមថ្ងៃទី១០ កុម្ភៈ នេះ ការទន្ទឹងចាំយុត្តិធម៌ក្នុងអំពើបាញ់ប្រហារអ្នកវិភាគសង្គម និងនយោបាយដ៏មានប្រជាប្រិយភាព បានអូសបន្លាយចំនួន ៧ខែគត់។ ចំណែកក្រុមអ្នកតាមដានព្រឹត្តិការណ៍សង្គមកម្ពុជា យល់ឃើញថា ភាពយឺតយ៉ាវក្នុងការស្វែងរកយុត្តិធម៌របស់តុលាការ និងសមត្ថកិច្ចក្នុងរឿងក្ដីនេះគឺជាចេតនាចង់ជួយពន្យារពេល និងផ្អឹបរឿងទុកដើម្បីគេចចេញពីការទទួលខុសត្រូវចំពោះមុខច្បាប់របស់អ្នកប្រព្រឹត្តបទល្មើសប៉ុណ្ណោះ។
ប្រជាពលរដ្ឋដែលមានមុខរបរជាអ្នករត់ម៉ូតូកង់បី និងអាជីវករលក់ដូរនៅក្នុងទីក្រុងភ្នំពេញ ឲ្យដឹងនៅថ្ងៃទី១០ ខែកុម្ភៈ ថា ពួកគេមិនមានជំនឿទាល់តែសោះទៅលើការស៊ើបអង្កេតរបស់សមត្ថកិច្ច និងរបាយការណ៍ស្រាវជ្រាវរបស់តុលាការថា អាចផ្ដល់ភាពសុក្រឹត និងទុកចិត្តបាន៖ «វាមានអារម្មណ៍ថាយូរដែរ បើតាមតែយើងចង់ឲ្យដឹងភ្លាមៗ។ ប៉ុន្តែបើចិត្តបងចង់ឲ្យដឹងភ្លាមៗ ថាតើគេកាត់ក្ដីយ៉ាងម៉េចដែរ? ចង់ឲ្យគេដោះស្រាយវាមានហេតុផលត្រឹមត្រូវទៅកុំឲ្យវាទុកកប់ចោលអ៊ីចឹង ហើយសូន្យៗរហូត ហើយដល់ថ្ងៃក្រោយទៅខ្លាចជួបប្រទះទៀតទៅកប់រហូតអ៊ីចឹងម៉េចកើត»។
គិតចាប់ពីថ្ងៃដែលឃាតកបាញ់សម្លាប់លោកបណ្ឌិត កែម ឡី កាលពីថ្ងៃទី១០ ខែកក្កដា ឆ្នាំ២០១៦ មកដល់ថ្ងៃទី១០ ខែកុម្ភៈ នេះ គឺមានរយៈពេល ៧ខែគត់។ ការស៊ើបអង្កេតរបស់សមត្ថកិច្ច និងរបាយការណ៍ស៊ើបអង្កេតរបស់ចៅក្រមស៊ើបសួរនៃតុលាការក្រុងភ្នំពេញ នៅមិនទាន់បង្ហាញជាសាធារណៈអំពីតម្រុយណាមួយថ្មី ទាំងឃាតក និងអ្នកបញ្ជានៅពីក្រោយខ្នង ក្រៅពីឈ្មោះ អឿត អាង ហៅ ជួប សម្លាប់ នេះនៅឡើយទេ។
សេចក្ដីជូនដំណឹងរបស់តុលាការក្រុងភ្នំពេញ កាលពីថ្ងៃទី៦ ខែកុម្ភៈ ស្ដីពីកំណត់ថ្ងៃសវនាការលើសំណុំរឿងឧក្រិដ្ឋនេះ បង្ហាញថា តុលាការនឹងបើកការជំនុំជម្រះនៅថ្ងៃទី១ មីនា ពេលព្រឹក។ ដីកាដែលដាក់ខុសថ្ងៃ ខែ ឆ្នាំកំណើតរបស់ អឿត អាង ហៅ ជួប សម្លាប់ គឺលោក លាង សំណាត់ ជាប្រធានក្រុមប្រឹក្សាជំនុំជម្រះ រីឯលោក លី សុផាណា ជាតំណាងអយ្យការក្នុងរឿងក្ដីនេះ។
បើទោះជាបែបណា ក្រុមនិស្សិតមួយចំនួននៃសាកលវិទ្យាល័យមួយក្នុងទីក្រុងភ្នំពេញ បង្ហាញទស្សនៈថា វាជារឿងដ៏គួរឲ្យហួសចិត្ត ដែលរឿងក្ដីនេះ សមត្ថកិច្ច ឬតុលាការចេះបន្តសាច់រឿងទុករហូតបានដល់ ៧ខែទើបដំណើរការ។ ពួកគេក៏មិនរំពឹងទេថា តុលាការនេះអាចរកយុត្តិធម៌ឲ្យលោកបណ្ឌិត កែម ឡី បាន៖ «ខ្ញុំគិតថា រដ្ឋាភិបាលនៅតែបណ្ដែតបណ្ដោយអត់ព្រមរកយុត្តិធម៌ឲ្យគាត់។ គាត់ជាមនុស្សម្នាក់ដែលស្មោះត្រង់ខ្លាំង ហើយក៏ជាអ្នកវិភាគនយោបាយមួយដែលខ្ញុំចូលចិត្តគាត់ដែរ។ គាត់តែងផ្ដល់គំនិតល្អៗដល់ពួកខ្ញុំ។ ចំពោះខ្ញុំដូចអត់ឃើញយុត្តិធម៌អីផង ព្រោះ ៧ខែមកហើយ អត់ឃើញតម្រុយអីតិចផង។ មានកាមេរ៉ានៅកន្លែងហ្នឹងហើយ រកជនល្មើសអត់ឃើញទៀត»។
អង្គការមិនមែនរដ្ឋាភិបាលជាតិ និងអន្តរជាតិ រួមទាំងបក្សប្រឆាំងផង ចាត់ទុករឿងក្ដីលោកបណ្ឌិត កែម ឡី នេះថា អាចមានជាប់ទាក់ទិននឹងអ្នកមានអំណាចនៅកម្ពុជា។ មុនឃាតកបាញ់សម្លាប់តែប៉ុន្មានថ្ងៃប៉ុណ្ណោះ លោកបណ្ឌិត កែម ឡី បានវិភាគលើរបាយការណ៍ស្រាវជ្រាវដ៏ស៊ីជម្រៅមួយរបស់អង្គការឃ្លាំមើលពិភពលោក គ្លបល វីនេស (Global Witness) ដែលនិយាយពីអាណាចក្រជំនួញរបស់ក្រុមគ្រួសារត្រកូល "ហ៊ុន"៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។