ប្រពន្ធសកម្មជនគណបក្សសង្គ្រោះជាតិជាច្រើននាក់បានរងរបួស ក្នុងនោះម្នាក់របួសធ្ងន់រហូតត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យមិត្តភាពខ្មែរ-សូវៀត នៅព្រឹកថ្ងៃទី៤ ខែកញ្ញានេះ ដោយសារអាជ្ញាធរខណ្ឌ ៧មករា បានប្រើហិង្សាពេលពួកគាត់តវ៉ាស្វែងរកយុត្តិធម៌ឱ្យប្ដី នៅមុខសាលាដំបូងរាជធានីភ្នំពេញ។
ស្ត្រីរងគ្រោះដែលបញ្ជូនទៅសង្គ្រោះបន្ទាន់នោះ គឺលោកស្រី សេង ចាន់ថន ជាប្រពន្ធរបស់សមាជិកក្រុមប្រឹក្សាខេត្តកំពង់ធំជាប់ឆ្នោតគណបក្សសង្គ្រោះជាតិ លោក ស៊ុន ធន់។
លោកស្រីត្រូវបានកងសន្តិសុខខណ្ឌ ៧មករាម្នាក់ ក្នុងចំណោមសន្តិសុខ និងប៉ូលិសប្រមាណ ៤០នាក់ ដែលបង្ក្រាបក្រុមអ្នកតវ៉ា បានចាប់លោកស្រីបោកផ្ដួលទៅលើថ្នល់កៅស៊ូ បណ្ដាលឱ្យលោកស្រីដួលនៅម្ខាងផ្លូវមុខតុលាការក្រុងភ្នំពេញ។
ប្រពន្ធសមាជិកក្រុមប្រឹក្សារាជធានីភ្នំពេញជាប់ឆ្នោតគណបក្សសង្គ្រោះជាតិ លោក កាក់ កុម្ភារ គឺលោកស្រី ព្រុំ ចាន់ថា ថ្លែងថា ក្នុងពេលប៉ះទង្គិចនោះបណ្ដាលឲ្យលោកស្រី សេង ចាន់ថន ដួលផ្ទប់ទៅលើថ្នល់ឈឺចុកចាប់នៅក្នុងរាងកាយយ៉ាងខ្លាំង។ លោកស្រីចាត់ទុករឿងនេះថា ជាការប៉ុនប៉ងសម្លាប់ពួកលោកស្រី ដែលជាស្ត្រីទន់ខ្សោយ ដើម្បីបិទមាត់កុំឱ្យតវ៉ានៅថ្ងៃក្រោយទៀត។ លោកស្រីបញ្ជាក់ថា ពួកលោកស្រីប្រមាណ ២០នាក់ ធ្វើបាតុកម្មដោយសន្តិវិធី ដើម្បីទាមទារឱ្យតុលាការដោះលែងប្ដីរបស់លោកស្រី និងអ្នកទោសមនសិការទាំងអស់ ដែលអាជ្ញាធរបានចាប់ខ្លួនដោយអយុត្តិធម៌ឱ្យមានសេរីភាពវិញ៖ « វាពិតជាសាហាវឃោរឃៅបំផុត រឿងអីពួកខ្ញុំជាស្ត្រីទន់ខ្សោយ បាតដៃទទេ អត់មានស្អីត្រូវតបតជាមួយពួកគាត់ ហើយពួកគាត់រុញពួកខ្ញុំដូចសត្វដូចធាតុ។ និយាយទៅរុញចាប់បោកចាប់បោះទាញគ្រវែងយកតែម្ដង។ ខ្ញុំខ្លោចចិត្តណាស់ដែលខ្មែរធ្វើបាបខ្មែរដែលទឹកដីដែលគេយកអស់មិនទៅការពារមកសម្លាប់តែខ្មែរគ្នាឯងយូរមកការពារស្ត្រីដែលបញ្ចេញមតិទាមទារឱ្យដោះលែងប្ដីក៏មិនបាន » ។
ការតវ៉ាលើកនេះ ក្រៅពីលោកស្រី សេង ចាន់ថន ដែលរងរបួសធ្ងន់ ត្រូវបានបញ្ជូនទៅសង្គ្រោះបន្ទាន់ភ្លាមៗ ក៏មានស្ត្រី ៥នាក់ទៀតរបួសស្រាល ដោយពួកគាត់ត្រូវបានក្រុមសន្តិសុខក្ដិច និងទាត់ធាក់រលាត់ដៃ និងជើងចេញឈាម។
រូបភាព និងវីដេអូស្ដីពីការបង្ក្រាបដោយហិង្សានេះ ត្រូវបានអ្នកសារព័ត៌មាន និងក្រុមពលរដ្ឋ បង្ហោះព្រោងព្រាតលើបណ្ដាញសង្គម ក៏ប៉ុន្តែអាជ្ញាធររាជធានីភ្នំពេញនៅតែចេញមុខបដិសេធដដែល។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា ប្រាប់អាស៊ីសេរីថា រឿងនេះគឺជាការរុញច្រានគ្នាទៅវិញទៅមករបស់ក្រុមអ្នកតវ៉ា និងកងសន្តិសុខដោយអាជ្ញាធរមិនបានប្រើហិង្សាលើក្រុមស្ត្រីទាំងនោះដូចការចោទប្រកាន់ឡើយ។ លោកបញ្ជាក់ថា មូលហេតុដែលអាជ្ញាធររារាំងមិនឱ្យតវ៉ាដោយសារក្រុមស្ត្រីទាំងនោះធ្វើបាតុកម្មដោយខុសច្បាប់ ប៉ុន្តែលោកមិនបានបញ្ជាក់ថា តើខុសច្បាប់អ្វីនោះទេ ស្របពេលរដ្ឋធម្មនុញ្ញធានាពីសិទ្ធិធ្វើបាតុកម្មដោយសន្តិវិធីរបស់ពលរដ្ឋ៖ « បញ្ហាសំខាន់សមត្ថកិច្ច ឬក៏អាជ្ញាធរ គឺត្រឹមតែការពារទីតាំង ដើម្បីកុំឱ្យមានបញ្ហា ឬក៏ការពារសណ្ដាប់ធ្នាប់តែប៉ុណ្ណឹងទេ។ មួយទៀតទាក់ទងទៅហ្នឹងការអនុញ្ញាតនិងការស្រាយកាន់បដាអីផ្សេងៗ ចាំបាច់បំផុតគឺត្រូវការមានការអនុញ្ញាតពីអាជ្ញាធរដែនដី ជាពិសេស គឺសាលារាជធានីភ្នំពេញ » ។
ផ្ទុយពីការលើកឡើងនេះ ប្រធានផ្នែកសិទ្ធិមនុស្សនៃសមាគមការពារសិទ្ធិមនុស្ស អាដហុក (Adhoc) លោក នី សុខា មានប្រសាសន៍ថា ការតវ៉ាដោយសន្តិវិធី ដើម្បីទាមទារឱ្យតុលាការដោះលែងជនណាម្នាក់ជាសិទ្ធិសេរីភាពរបស់ប្រជាពលរដ្ឋស្របតាមរដ្ឋធម្មនុញ្ញ និងមិនមែនជាការខុសច្បាប់ឡើយ។ លោកចាត់ទុកការបង្ក្រាបដោយហិង្សានេះថា ជាការរំលោភធ្ងន់ធ្ងរលើសិទ្ធិសេរីភាពសម្ដែងមតិរបស់ពលរដ្ឋដោយខុសច្បាប់៖ « អ្វីដែលយើងបានមើលឃើញនេះ គឺជាការប្រើប្រាស់នូវកម្លាំងមួយដែលមិនសមហេតុផល ចំពោះការបង្ក្រាបទៅលើអ្នកតវ៉ា។ ខ្ញុំនិយាយថាអាចជាចេតនាដែលបង្កឱ្យមានជាបញ្ហាភិតភ័យឬក៏រងគ្រោះទៅដល់អ្នកតវ៉ា ដូច្នេះនេះជាអំពើមួយដែលមិនស្របទៅហ្នឹងគោលការណ៍ច្បាប់ទេ មិនមែនដើម្បីឱ្យមានសន្តិសុខ សន្តិភាពនិងស្ថិរភាពសង្គមអីទេ » ។
ក្រោយការតវ៉ាក្រុមបាតុករមួយចំនួនបានជូនជនរងគ្រោះទៅមន្ទីរពេទ្យមិត្តភាពខ្មែរ-សូវៀត ដើម្បីឱ្យព្យាបាលរបួសហើយមួយចំនួនទៀតទៅដាក់ញត្តិនៅស្ថានទូតអាល្លឺម៉ង់ប្រចាំនៅរាជធានីភ្នំពេញ ដើម្បីឱ្យជួយអន្តរាគមន៍ដល់ពួកគាត់។ មន្ត្រីទូតអាល្លឺម៉ង់អនុញ្ញាតឱ្យតំណាងអ្នកតវ៉ា ៥នាក់ចូលជួប ហើយសន្យាថា នឹងតាមដានរឿងនេះឲ្យអស់ពីលទ្ធភាព។
ប្រពន្ធលោក ស៊ុន ធន់ គឺលោកស្រី សេង ចាន់ថន បានឲ្យដឹងនៅមុនការផ្សាយបន្តិចថា គ្រូពេទ្យទើបបានអនុញ្ញាតឲ្យគាត់ចេញពីមន្ទីរពេទ្យវិញហើយ។ ស្ថានភាពសុខភាពលោកស្រីមានភាពប្រសើរខ្លះ ដោយនៅហើមពកកែងដៃស្មា និងនៅឈឺចុកចាប់ទ្រូង ដោយគ្រូពេទ្យឆ្លុះឃើញគ្រាំខាងក្នុង។ លោកស្រីថា គ្រោះថ្នាក់នេះបណ្ដាលមកពីសន្តិសុខម្នាក់ចាប់បោកលោកស្រីទាំងជំហរ៖ « ខ្ញុំឈរក្រោយគេទេ អត់បានទៅរុញច្រានជាមួយគេទេព្រោះកម្លាំងខ្ញុំខ្សោយខ្ញុំអត់ហ៊ានទៅមុខទេ ស្រាប់តែសន្តិសុខមួយនោះចាប់ខ្ញុំបោកបុកកែងដៃខ្ញុំផ្ទប់នឹងដីហ្មងទៅទាំងជំហរអត់មានទប់អីបាន ទៅវឹងហ្មងអត់មានទប់អីបានអត់ដឹងខ្លួនហ្មង » ។
ក្រុមស្ត្រីទាំងនេះបានចេញតវ៉ាជារៀងរាល់សប្ដាហ៍ ដោយសារពួកគាត់មិនពេញចិត្ត ចំពោះអាជ្ញាធរចាប់សកម្មជននយោបាយ និងសកម្មជនសង្គមចំនួន ២៣នាក់ដាក់ពន្ធនាគារព្រៃសតាមអំពើចិត្ត។ តុលាការបានចោទប្រកាន់អ្នកទាំង ២៣នាក់ ពីបទរួមគំនិតក្បត់ញុះញង់ឲ្យយោធិនមិនស្ដាប់បង្គាប់ញុះញង់ឲ្យប្រព្រឹត្តបទឧក្រិដ្ឋជាអាទិ៍ញុះញង់បង្កឱ្យមានភាពវឹកវរធ្ងន់ធ្ងរនៅក្នុងសង្គម និងពីបទប្រមាថថ្នាក់ដឹកនាំរដ្ឋាភិបាល។ ប្រពន្ធ និងកូនសកម្មជនបក្សប្រឆាំងទាំងនោះ ចាត់ទុកការចោទប្រកាន់នេះថា ជារឿងអយុត្តិធម៌ធ្វើបាបពលរដ្ឋស្លូតត្រង់។ ពួកគាត់គ្រោងប្រមូលគ្នាតវ៉ានៅថ្ងៃសុក្រសប្ដាហ៍ក្រោយទៀត ហើយប្ដេជ្ញាតវ៉ាជាបន្តបន្ទាប់រហូតមានដំណោះស្រាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។