សពព្រះតេជព្រះគុណ ព្រះធម្មវិបស្សនា សំ ប៊ុនធឿន ដែលត្រូវឃាតកបាញ់សម្លាញ់កាលពីជាង១០ឆ្នាំមុន នឹងត្រូវបូជារំលាយព្រះកាយ នៅដើមខែធ្នូ ឆ្នាំ២០១៦។
បងស្រីព្រះតេជព្រះគុណ សំ ប៊ុនធឿន លោកស្រី សំ គង់ ឲ្យអាស៊ីសេរីដឹងនៅថ្ងៃទី៣១ តុលា ថា ពិធីបុណ្យបូជាព្រះសពនេះ នឹងត្រូវប្រគេនភ្លើងបូជាដោយសម្ដេចព្រះសង្ឃរាជទាំងពីរគណៈ។
លោកស្រី សំ គង់ បញ្ជាក់ថា មូលហេតុដែលសម្រេចបូជាព្រះសពនៅពេលនេះ ដោយសារមូលហេតុ៤យ៉ាងសំខាន់ៗ៖ «ទី១ ខ្ញុំចាស់ហើយ អត់មានអ្នកណាថែទាំទេ ! អត់ពីបងទៅសួរថា សិស្សចៅទៀតអាចមើលថែបានអត់ ? ទី២ ការចំណាយលុយធំណាស់ ម៉ាស៊ីនត្រជាត់១ឆ្នាំ រហូត១០ម៉ឺនដុល្លារ។ ពេញពុទ្ធមណ្ឌលហ្នឹង ការចំណាយទឹកភ្លើងវាចូល១០ម៉ឺនដុល្លារហើយ ! ចឹងយើងមិនអាចទុកសពបាន។ ទី២ ព្រះអង្គគ្រូ ( សំ ប៊ុនធឿន ) ប្រាថ្នាពុទ្ធភូមិ ព្រោះព្រះពុទ្ធពីបរមបុរាណមិនដែលទុកបាន១ខែទេ។ និងទី៤ ព្រះអង្គគ្រូអត់ពេញចិត្តឲ្យទុកទេ។ មុន៧ថ្ងៃសុគត លោកបានដឹកដៃជាង ( ភក្តិ ) ឲ្យធ្វើចេតិយឲ្យលោក ហើយបានប្រាប់ជាងថា ជាងឯងធ្វើមិនទាន់ទេ តែអាត្មារៀបចំផែនដីឲ្យហើយទុកឲ្យអាត្មា ( សំ ប៊ុនធឿន )»។
កម្មវិធីបុណ្យនឹងចាប់ផ្ដើមពីថ្ងៃទី១ ដល់ថ្ងៃទី៤ ខែធ្នូ ឆ្នាំ២០១៦ នាពុទ្ធមណ្ឌលសន្តិវ័ន្ត ក្បែរភ្នំព្រះរាជ្យទ្រព្យ ឬហៅភ្នំឧត្ដុង្គ ក្នុងឃុំផ្សារដែក ស្រុកពញាឮ ខេត្តកណ្ដាល។ ការបូជាព្រះសព នឹងធ្វើនៅល្ងាចថ្ងៃទី៣ ខែធ្នូ។
ព្រះតេជព្រះគុណ សំ ប៊ុនធឿន ជាសង្ឃលេចធ្លោមួយអង្គនៅកម្ពុជា ក្នុងការបដិបត្តិ និងអប់រំព្រះធម៌ពុទ្ធសាសនា នៅដើមទសវត្សរ៍ឆ្នាំ២០០០ ហើយព្រះអង្គបានផ្ដួចផ្ដើមកសាងមជ្ឈមណ្ឌលសម្រាប់ធ្វើសមាធិអប់រំចិត្តដ៏ធំមួយ មានឈ្មោះថា ពុទ្ធមណ្ឌលវិបស្សនាធុរៈនៃព្រះរាជាណាចក្រកម្ពុជា ដែលស្ថិតនៅខាងលិចភ្នំឧត្ដុង្គ និងមណ្ឌលវិបស្សនាធុរៈចំនួន១៦ ទៀត នៅតាមបណ្ដាខេត្ត។ ពាក់កណ្ដាលនៃជីវិតរបស់ព្រះអង្គ គឺបួសជាព្រះសង្ឃ។ ការបង្រៀនរបស់ព្រះអង្គសុទ្ធតែងឆ្លុះបញ្ចាំងការពិតក្នុងសង្គមខ្មែរ ដែលពោរពេញដោយអំពើពុករលួយ និងអំពើបាប។
ព្រះអង្គត្រូវបានខ្មាន់កាំភ្លើងមិនស្គាល់មុខពីរនាក់បាញ់ប្រហារ នៅព្រឹកថ្ងៃសៅរ៍ ទី៨ ខែកុម្ភៈ ឆ្នាំ ២០០៣ ក្នុងបរិវេណវត្តលង្កា នារាជធានីភ្នំពេញ។ ព្រះអង្គបានសុគតនៅមន្ទីរពេទ្យកាល់ម៉ែត រយៈពេលពីរថ្ងៃបន្ទាប់ ក្នុងព្រះជន្ម ៤៧ព្រះវស្សា។
ព្រះសពត្រូវបានសិស្សគណ និងពុទ្ធបរិស័ទ តម្កល់ទុកក្នុងមឈូសកញ្ចក់ ដើម្បីគោរពបូជានៅពុទ្ធមណ្ឌលសន្តិវ័ន្ត រហូតមកដល់ពេលនេះ។
ជាង១០ឆ្នាំមកនេះ គ្មានជនណាម្នាក់ត្រូវបានចាប់ខ្លួន ឬនាំខ្លួនមកកាត់ទោស ទាក់ទងនឹងការធ្វើគត់ព្រះអង្គឡើយ មិនខុសពីឃាតកម្មដទៃទៀតទេ ដូចជាឃាតកម្មលើមេដឹកនាំសហជីព លោក ជា វិជ្ជា តារាសម្ដែងអ្នកស្រី ពិសិដ្ឋ ពីលីកា សកម្មជនព្រៃឈើនិងបរិស្ថាន លោក ឈុត វុទ្ធី និងឃាតកម្មលើអ្នកវិភាគដ៏ល្បីមួយរូបគឺលោក បណ្ឌិត កែម ឡី ជាដើម សុទ្ធតែមិនទាន់បានទទួលយុត្តិធម៌រហូតមកដល់បច្ចុប្បន្ន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។