នាវាចម្បាំងកាណាដាបានចាកចេញពីកម្ពុជាហើយ កាលពីថ្ងៃទី៤ កុម្ភៈ ក្រោយបំពេញទស្សនកិច្ចរយៈពេល ៤ថ្ងៃ។ នាវាចម្បាំងកាណាដាមួយគ្រឿងនេះ មានឈ្មោះ អេចអឹមស៊ីអេស អូតាវ៉ា (HMCS Ottawa) ផ្ទុកកងនាវិក ២៤០ នាក់ និងបានចូលចតនៅកំពង់ផែស្វយ័តក្រុងព្រះសីហនុ កាលពីថ្ងៃទី១ កុម្ភៈ។
ភាគីកម្ពុជាបានអះអាងថា ទស្សនកិច្ចរបស់នាវាចម្បាំងកាណាដានេះ គឺដើម្បីពង្រឹងទំនាក់ទំនង សាមគ្គីភាព និងកិច្ចសហប្រតិបត្តិការរវាងកងទ័ពជើងទឹកនៃប្រទេសទាំងពីរ ខណៈភាគីកាណាដាវិញបានគូសបញ្ជាក់ថា ទស្សនកិច្ចនេះអនុញ្ញាតឱ្យកាណាដាបង្ហាញច្បាស់នូវការប្ដេជ្ញាចិត្តលើវិស័យការពារជាតិដ៏យូរអង្វែងចំពោះតំបន់ឥណ្ឌូប៉ាស៊ីហ្វិក និងពង្រឹងតួនាទីរបស់កាណាដាក្នុងនាមជាដៃគូអន្តរជាតិដ៏គួរឱ្យទុកចិត្ត។
នាវាចម្បាំងកាណាដាមួយគ្រឿងនេះ កំពុងបំពេញបេសកកម្មលើកកម្ពស់សន្តិសុខ ស្ថិរភាព និងសណ្ដាប់ធ្នាប់អន្តរជាតិផ្អែកលើផ្លូវច្បាប់ នៅក្នុងតំបន់ឥណ្ឌូប៉ាស៊ីហ្វិក។ កាលពីខែមុន នាវាចម្បាំងមួយនេះបានចូលរួមក្នុងសមយុទ្ធយោធារួមគ្នាជាមួយកងទ័ពជើងទឹកសហរដ្ឋអាមេរិកក្នុងតំបន់សមុទ្រចិនខាងត្បូង និងបានចល័តទៅជិតតំបន់កោះស្កាបូរ៉ូ (Scarborough shoal) ដែលជាតំបន់កំពុងមានភាពតានតឹងរវាងប្រទេសចិន និងហ្វីលីពីន។
យ៉ាងណាក៏ដោយចុះ ក្នុងពេលបំពេញទស្សនកិច្ចនៅកម្ពុជា នាវាចម្បាំងកាណាដា HMCS Ottawa មិនត្រូវបានភាគីកម្ពុជានាំទៅកាន់មូលដ្ឋានទ័ពជើងទឹករាមនោះទេ គឺដូចគ្នានឹងនាវាចម្បាំងរបស់ប្រទេសលោកសេរីដទៃទៀតដែរ។ រយៈពេលចុងក្រោយនេះ មានតែនាវាចម្បាំងចិនប៉ុណ្ណោះដែលរដ្ឋាភិបាលកម្ពុជាអនុញ្ញាតឱ្យចូលចតនៅកំពង់ផែរាម ខណៈចិនជាអ្នកជួយអភិវឌ្ឍន៍មូលដ្ឋានទ័ពរាម ហើយកម្ពុជារងការចោទប្រកាន់ថា បានចុះកិច្ចព្រមព្រៀងសម្ងាត់ជាមួយចិនក្នុងការអនុញ្ញាតឱ្យកងទ័ពរំដោះប្រជាជនចិនឈរជើងនៅទីនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។