រដ្ឋាភិបាលជប៉ុនផ្ដល់ជំនួយឥតសំណងជាង ១លាន ៣សែន ដុល្លារសម្រាប់ការងារបោសសម្អាតមីន យុទ្ធភណ្ឌមិនទាន់ផ្ទុះ និងគ្រាប់បែកចង្កោមនៅកម្ពុជា។
រដ្ឋាភិបាលជប៉ុនតាមរយៈស្ថានទូតនៅទីក្រុងភ្នំពេញផ្ដល់ជំនួយឥតសំណង ចំនួនជាង១លាន ៣សែដុល្លារ (១.៣០២.៥៣៩ ) ទៅឱ្យអង្គការមនុស្សធម៌ និងបោសសម្អាតមីនក្រោមគម្រោងសម្រាប់អង្គការក្រៅរដ្ឋាភិបាលជប៉ុន។
កិច្ចព្រមព្រៀងផ្ដល់ជំនួយនេះត្រូវបានចុះហត្ថលេខាដោយ ឯកអគ្គរាជទូតជប៉ុនប្រចាំកម្ពុជា លោក អ៊ូអិណុ អាត់ស៊ស៊ី (UENO Athsushi) និងតំណាងអង្គការសកម្មភាពកម្ចាត់មីនជប៉ុន (JMAS) នៅស្ថានទូតជប៉ុន កាលពីរសៀលថ្ងៃទី០៥ ខែកុម្ភៈ ម្សិលមិញ។
នេះជាជំនួយសម្រាប់អនុវត្តសកម្មភាពមួយចំនួនរបស់អង្គការសកម្មភាពកម្ចាត់មីនជប៉ុន មានដូចជា៖ គម្រោងបោសសម្អាតមីន និងយុទ្ធភណ្ឌមិនទាន់ផ្ទុះក្នុងទំហំដី ១០០ ហិកតារ នៅខេត្តបន្ទាយមានជ័យ និងគម្រោងបោសសម្អាតគ្រាប់បែកចង្កោមលើផ្ទៃដីទំហំ ២៤០ហិកតារ នៅខេត្តស្ទឹងត្រែង។ ក្នុងគម្រោងនេះ អង្គការសកម្មភាពកម្ចាត់មីនជប៉ុននឹងមានគម្រោងផ្ទេរវិធីសាស្ត្រជោគជ័យ និងសុវត្ថិភាពក្នុងការបោសសម្អាតមីន និងគ្រាប់បែកចង្កោមទៅឱ្យមជ្ឈមណ្ឌលសកម្មភាពកម្ចាត់មីនកម្ពុជា (CMAC)។ ជាមួយគ្នានេះក៏មានកម្មវិធីអប់រំ អំពីការបញ្ចៀសហានិភ័យនៃគ្រាប់មីន ដល់ប្រជាជនមូលដ្ឋាន និងបណ្ដុះបណ្ដាលកសិករអំពីការគ្រប់គ្រង និងបច្ចេកវិទ្យាកសិកម្ម។
គម្រោងនេះជាផ្នែកមួយនៃគម្រោងសម្រាប់អង្គការក្រៅរដ្ឋាភិបាលជប៉ុន ហៅថា «អ៊ុនរ៉េន» ដែលបានចាប់ផ្ដើមតាំងពីឆ្នាំ២០០២ ដើម្បីគាំទ្រដល់អង្គការក្រៅរដ្ឋាភិបាលជប៉ុន ក្នុងការអនុវត្តគម្រោងអភិវឌ្ឍន៍ សេដ្ឋកិច្ច និងសង្គមរបស់ពួកគេនៅក្នុងប្រទេស ឬតំបន់កំពុងអភិវឌ្ឍ ក្នុងនោះមានគម្រោងជាង ១៦០គម្រោង ដែលបានផ្ដល់ឱ្យអង្គការនៅក្នុងប្រទេសកម្ពុជាក្នុងវិស័យអប់រំ សុខាភិបាល កសិកម្ម និងសកម្មភាពបោសសម្អាតមីន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។