ប្រជាពលរដ្ឋមួយចំនួនរស់នៅខេត្តបាត់ដំបង សោកស្ដាយអាឡោះអាល័យចំពោះការស្លាប់លោកបណ្ឌិត កែម ឡី ថាជារឿងមួយមិនគួរឲ្យជឿទាល់តែសោះ។ ពួកគាត់ស្នើឲ្យរដ្ឋាភិបាល បង្កើតគណៈកម្មការស៊ើបអង្កេតលើករណីនេះឲ្យបានល្អិតល្អន់ ដើម្បីចាប់អ្នកនៅពីក្រោយខ្នងមកផ្ដន្ទាទោសជាទម្ងន់ និងឆាប់រហ័ស។
បើទោះបីជាឃាតកដែលបានបាញ់សម្លាប់លោកបណ្ឌិត កែម ឡី ទាំងកណ្ដាលថ្ងៃនៅរាជធានីភ្នំពេញ ត្រូវសមត្ថកិច្ចចាប់បានក៏ដោយចុះ ប៉ុន្តែប្រជាពលរដ្ឋមួយចំនួននៅខេត្តបាត់ដំបង មិនជឿថាមានជនសង្ស័យតែម្នាក់ឯងឡើយ៖ « ខ្ញុំគិតថា ឃាតកដែលសមត្ថកិច្ចចាប់បាននោះជាឃាតកដែលគេរៀបចំឡើង។ ខ្ញុំគិតការសម្លាប់នេះជាករណីនយោបាយ ពីព្រោះលោកបណ្ឌិតជាមនុស្សហ៊ាននិយាយរិះគន់ចំៗទៅលើការដឹកនាំរបស់រដ្ឋាភិបាល » ។
ពលរដ្ឋនៅខេត្តមួយនេះ មិនជឿថា ឃាតកសម្លាប់លោកបណ្ឌិត កែម ឡី ដោយសារតែរឿងជំពាក់ប្រាក់ ៣ពាន់ដុល្លារសហរដ្ឋអាមេរិកឡើយ ពីព្រោះពួកគាត់បញ្ជាក់ថា លោកបណ្ឌិតជាមនុស្សចេះដឹងជ្រៅជ្រះ និងសុភាពរាបសា ដែលជាទីស្រឡាញ់របស់ប្រជាពលរដ្ឋគ្រប់រូបនៅកម្ពុជា៖ « តើឃាតកមានទំនាក់ទំនងគ្នាយ៉ាងណាជាមួយលោកបណ្ឌិត កែម ឡី ទៅខ្ចីលុយបាន ព្រោះការខ្ចីលុយទាល់តែស្គាល់គ្នាច្បាស់ និងមានទំនុកចិត្ត ទើបគេហ៊ានឲ្យលុយខ្ចី។ ខ្ញុំអត់ជឿថាលោកបណ្ឌិតជំពាក់លុយឃាតកនោះទេ ព្រោះអីឃាតកគ្មានលិខិតស្នាមបញ្ជាក់ផង។ ខ្ញុំថារឿងនេះ គឺជាការឆ្លើយលាបពណ៌បង្ខូចកេរ្តិ៍ឈ្មោះលោកបណ្ឌិតទេ » ។
អ្នកស្រុកស្នើឲ្យរដ្ឋាភិបាលបង្កើតគណៈកម្មការស៊ើបអង្កេត វែកមុខចាប់ជននៅពីក្រោយខ្នង មិនថាជននោះមានឋានៈធំប៉ុនណាឡើយ គឺត្រូវចាប់យកមកផ្ដន្ទាទោសតាមផ្លូវច្បាប់ឲ្យឆាប់រហ័ស៖ « ខ្ញុំសូមឲ្យរដ្ឋាភិបាលស៊ើបអង្កេតប្រកបដោយភាពយុត្តិធម៌ និងឯករាជ្យ។ ខ្ញុំសូមឲ្យរដ្ឋាភិបាលវែកមុខរកឃាតកដោយតម្លាភាព ដើម្បីកុំឲ្យមានករណីបែបនេះទៅលើអ្នកស្នេហាជាតិបន្តទៀត។ ខ្ញុំស្ដាយស្រណោះគាត់ណាស់ ព្រោះលោកបណ្ឌិតជាមនុស្សចេះដឹងជ្រៅជ្រះ និងតែងតែចុះជួយផ្ដល់គំនិតដល់ប្រជាពលរដ្ឋតាមមូលដ្ឋាន។ ការបាត់បង់លោកបណ្ឌិត បីដូចការបាត់បង់របស់ដ៏សំខាន់របស់ជាតិអ៊ីចឹងដែរ » ។
ទោះបីជាយ៉ាងនេះក្ដី ប្រជាពលរដ្ឋនឹងទន្ទឹងរង់ចាំមើលចំណាត់ការពីសំណាក់រដ្ឋាភិបាលបន្តទៅទៀត។ ពួកគាត់បញ្ជាក់ថា ប្រសិនបើរដ្ឋាភិបាលមិនបានផ្ដល់យុត្តិធម៌ពិតប្រាកដជូនក្រុមគ្រួសារលោកបណ្ឌិត កែម ឡី ទេ នោះពួកគាត់នឹងរួមកម្លាំងគ្នាតវ៉ារកយុត្តិធម៌ជូនវីរជនឲ្យទាល់តែបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។