ពលករនេសាទខ្មែរម្នាក់ ត្រូវបានទូកថៃជួយសង្គ្រោះជីវិត បន្ទាប់ពីទូករបស់គាត់ បានលិចនៅក្នុងឈូងសមុទ្រថៃភាគខាងត្បូង ក្នុងខេត្តសុងក្លា (Song Khla) ដោយសារខ្យល់ព្យុះ ហើយគាត់អណ្ដែតក្នុងសមុទ្រជាមួយនឹងសាកសពពលករនេសាទបីនាក់ទៀត ដែលគាត់បានចងភ្ជាប់នឹងខ្លួនដោយខ្សែពួរកុំឲ្យបែកគ្នា។ ហេតុការណ៍លិចទូកនេះ កើតឡើងកាលពីថ្ងៃទី១៨ ខែធ្នូ កាលពីចុងសប្ដាហ៍មុន។
ពលករនេសាទខ្មែរដែលរងគ្រោះនោះ មានឈ្មោះ សៀ សយ ភេទប្រុស។ គាត់បានអណ្ដែតនៅក្នុងទឹកប្រមាណ៣០ម៉ោងមុនពេលដែលទូកនេសាទផ្សេងទៀតទៅជួយសង្គ្រោះគាត់ហើយប្រគល់ឲ្យកងទ័ពជើងទឹកថៃនាំគាត់មកដីគោកវិញ។ ទូកល្បាតកងទ័ពជើងទឹកថៃ បានបញ្ជូនលោក សៀ សយ និងសាកសព៣នាក់ទៀត ទៅកាន់មូលដ្ឋានទ័ពជើងទឹកខេត្តសុងក្លា(Song Khla) កាលពីល្ងាចថ្ងៃទី២១ ខែធ្នូ។
កាសែតថៃ ចុះផ្សាយដោយស្រង់សម្ដីប៉ូលិសថៃ ថា ទូកដែលលិចនោះ មានកម្មករនេសាទថៃពីរនាក់ និងកម្មករនេសាទខ្មែរម្នាក់ស្លាប់ ហើយកម្មករនេសាទថៃម្នាក់ទៀតបាត់ខ្លួន។ វិទ្យុអាស៊ីសេរី មិនអាចទាក់ទងសុំការអត្ថាធិប្បាយជុំវិញបញ្ហានេះ ពីស្ថានទូតកម្ពុជាប្រចាំប្រទេសថៃបានទេ នៅថ្ងៃទី២៤ ខែធ្នូ ដោយទូរស័ព្ទហៅចូលជាច្រើនដង តែពុំមានអ្នកទទួល។
ជុំវិញរឿងនេះដែរ ប្រធានផ្នែកប្រយុទ្ធប្រឆាំងការជួញដូរមនុស្ស និងទេសន្តរប្រវេសន៍ នៃអង្គការសង់ត្រាល់ លោក ឌី ថេហូយ៉ា លើកឡើងថា ពលករខ្មែរដែលធ្វើការលើទូកនេសាទថៃ គឺប្រឈមគ្រោះថ្នាក់ជាងការងារផ្សេងទៀត ទាំងអាយុជីវិត ការបង្ខំឲ្យធ្វើការ មិនបើកប្រាក់ខែឲ្យ ឈឺមិនទទួលបានការព្យាបាល និងពេលទៅប្ដឹងពីថៅកែថៃពីការរំលោភបំពានមិនទទួលបានយុត្តិធម៌ជាដើម។ លោកបន្តថា រដ្ឋាភិបាលគួរតែណែនាំពលរដ្ឋខ្មែរ កុំឲ្យធ្វើការលើទូកនេសាទថៃ បើពួកគាត់ធ្វើ គួរតែមានច្បាប់ការពារ នៅពេលពលករខ្មែរជួបគ្រោះថ្នាក់ និងរងការបំពានកម្លាំងពលកម្ម៖
«ជារួមរដ្ឋាភិបាលត្រូវតែផ្សព្វផ្សាយឲ្យបានទូលំទូលាយ ព្រោះពលរដ្ឋដែលចំណាកស្រុកទៅស្រុកគេថា យល់ល្អគឺមិនត្រូវរកជម្រើសធ្វើការលើទូកទេ អាហ្នឹងទីមួយណា ផ្សព្វផ្សាយធ្វើម៉េចឲ្យគាត់យល់ដឹងអំពីគ្រោះថ្នាក់ ឬមហន្តរាយនៃការងារលើទូក។ ទីពីរ ត្រូវតែបង្កើតយន្តការក្នុងការជួយសង្គ្រោះនៅពេលដែលគាត់មានបញ្ហា»។
កាលពីឆ្នាំ២០២០ កន្លងទៅ ក៏ធ្លាប់មានពលករខ្មែរ ដែលចុះទូកនេសាទនៅសមុទ្រថៃ ហើយទូកនោះបានផ្ទុះឆេះលិចទៅក្នុងសមុទ្រ បន្ទាប់មកក៏មានពលករខ្មែរម្នាក់អណ្ដែតក្នុងសមុទ្រអស់បួនថ្ងៃ បួនយប់ ប៉ុន្តែគាត់បានរួចជីវិតពីឧបទ្ទវហេតុនោះដែរ ដោយសារតោងភីដុងទឹក និងមានទូកនេសាទទៅជួយទាន់ពេល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។