នាទីវេទិកាអ្នកស្ដាប់វិទ្យុអាស៊ីសេរី នៅយប់ថ្ងៃសុក្រ ទី១១ ខែតុលា បានពិភាក្សាលើប្រធានបទអំពីគម្រោងហែកឋិនដ៏ធំ ផ្ដួចផ្ដើមដោយលោក ហ៊ុន សែន ទៅទឹកដីកម្ពុជាក្រោម។
លោក ហ៊ុន សែន ប្រកាសថា ទីបំផុត សុបិនរយៈពេល ១២ឆ្នាំរបស់លោក នឹងលេចចេញជាការពិតនៅដើមខែវិច្ឆិកានេះហើយ។ សុបិន ដែលមានរយៈពេលជាង ១០ឆ្នាំរបស់លោក ហ៊ុន សែន នោះគឺ ការដង្ហែអង្គកឋិនមួយ ទៅវត្តខ្មែរកម្ពុជាក្រោម។
ការរៀបចំបុណ្យកឋិន ទៅវត្តខ្មែរក្រោមនេះ ធ្វើឡើងក្នុងបរិយាកាសមួយ ដែលអាជ្ញាធរវៀតណាមបន្តគាបសង្កត់សិទ្ធិគោរពប្រតិបត្តិជំនឿសាសនារបស់ជនជាតិខ្មែរក្រោម យ៉ាងធ្ងន់ធ្ងរ។ ព្រះសង្ឃខ្មែរក្រោមជាច្រើនអង្គ ត្រូវបានអាជ្ញាធរវៀតណាមធ្វើទុក្ខបុកម្នេញ និងចាប់ដាក់ពន្ធនាគារជាបន្តបន្ទាប់។
តើសកម្មភាពដង្ហែកឋិនដ៏ធំ ដែលផ្ដួចផ្ដើមដោយលោក ហ៊ុន សែន នេះ អាចសម្រួលបរិយាកាសតានតឹងក្នុងការគោរពព្រះពុទ្ធសាសនា របស់ខ្មែរក្រោមដែរឬយ៉ាងណា?
តើពលរដ្ឋខ្មែរក្រោម ព្រមទាំងព្រះសង្ឃខ្មែរក្រោម មានទស្សនៈបែបណាដែរ ចំពោះព្រឹត្តិការណ៍ដ៏លេចធ្លោ នៃចុងឆ្នាំ២០២៤ នេះ?
សូមលោកអ្នកនាងចុចស្ដាប់សំឡេង នៃកិច្ចពិភាក្សារវាងលោក ជុន ច័ន្ទបុត្រ ជាមួយព្រះភិក្ខុ ធីធី ធម្មោ ព្រះចៅអធិការវត្ត លោក សឺន ជុំជួន អនុប្រធានសមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ និងលោក ថាច់ ង៉ា សកម្មជនខ្មែរក្រោម ដែលបានជជែកពិភាក្សាអំពីរឿងនេះ កាលពីយប់ថ្ងៃសុក្រ ទី១១ ខែតុលា ឆ្នាំ២០២៤៕