លោក ហ៊ុន សែន បានប្រកាសកាលពីថ្ងៃទី៥ ខែសីហា ពីគោលជំហរជាសាធារណៈ អំពីការជំរុញកូនចៅរបស់លោកឱ្យចូលប្រឡូកក្នុងឆាកនយោបាយ ដើម្បីបន្តកាន់តំណែងនាយករដ្ឋមន្ត្រីតវង្សត្រកូល។
លោកបានថ្លែងក្នុងវេទិកាទទួលសញ្ញាប័ត្របណ្ឌិតកិត្តិយស ផ្នែកអភិវឌ្ឍន៍ ពីសាកលវិទ្យាល័យភូមិន្ទភ្នំពេញកាលពីថ្ងៃទី៥ សីហាថា កន្លងមកលោកមិនចង់ឲ្យកូនចៅរបស់លោក ចូលពាក់ព័ន្ធក្នុងរឿងនយោបាយនោះទេ គឺត្រឹមឲ្យចូលបម្រើការក្នុងជួរកងទ័ពតែប៉ុណ្ណោះ។ ប៉ុន្តែពេលនេះ លោកសម្រេចចិត្តជំរុញកូនចៅរបស់លោកឱ្យចូលប្រឡូកក្នុងឆាកនយោបាយ រាប់ចាប់តាំងពីចៅប្រុសរបស់លោក ដែលទើបបញ្ចប់ឆ្នាំទី១ នៅក្នុងថ្នាក់សកលវិទ្យាល័យ។ លោកមានបំណងចង់ផ្ទេរតំណែងនាយករដ្ឋមន្ត្រីពីកូនរហូតដល់ចៅរបស់លោក។
ការប្រកាសនេះបានធ្វើឡើងក្រោយពីលោកបានដឹកនាំការធ្វើវិសោធនកម្មរដ្ឋធម្មនុញ្ញលើកទី១០ដើម្បីទំលុះទំលាយឧបសគ្គឱ្យកូនប្រុសរបស់លោកធ្វើជានាយករដ្ឋមន្ត្រីបន្តពីលោក។
ប៉ុន្តែក្រុមអ្នកវិភាគ និងយុវជនមើលឃើញថា ការប្រកាសបែបនេះ គឺមានបំណងចង់ឱ្យកូនចៅរបស់លោកបន្តតំណែងនាយករដ្ឋមន្ត្រីតជំនាន់ ដើម្បីរក្សាអំណាច និងទ្រព្យសម្បត្តិគ្រួសារត្រកូល ហ៊ុន។ ពួកគេថា ការធ្វើបែបនេះនឹងប៉ះពាល់ដល់ប្រយោជន៍ជាតិ ដោយសារអំពើពុករលួយរបស់គ្រួសារមួយនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។