សកម្មជនបរិស្ថាន និងសហគមន៍ព្រៃឡង់ បានរកឃើញបទល្មើសអារឈើថ្មីៗ ជាង ៥០ករណី នៅក្នុងតំបន់ ព្រៃឡង់ ខេត្តព្រះវិហារ។ ពួកគាត់ថា ដើមឈើធំៗ ដែលជនល្មើសបានកាប់នោះ មានទំហំមុខកាត់ពី ៤០សង់ទីម៉ែត្រ (៤តឹក) ដល់ ៩០សង់ទីម៉ែត្រ (៩តឹក) ដែលបានដេកដួលពាសពេញដី ដោយគ្មានអាជ្ញាធរពាក់ព័ន្ធចុះទប់ស្កាត់ឱ្យបានត្រឹមត្រូវនោះទេ បើទោះជាករណីនេះបានកើតឡើងដដែលៗ ក្ដី។
សមាជិកបណ្ដាញព្រៃឡង់ និងសកម្មជនបរិស្ថានព្រួយបារម្ភថា បទល្មើសអារឈើ ទាំងទ្រង់ទ្រាយធំ និងតូច នៅក្នុងតំបន់ព្រៃឡង់ខេត្តព្រះវិហារ នឹងធ្វើឱ្យព្រៃអភិរក្សនេះ បន្តហិនហោចជារៀងរាល់ថ្ងៃ។ ពួកគាត់ថា បទល្មើសអារឈើនេះ បន្តកើតឡើងដោយសារតែមន្ត្រីពាក់ព័ន្ធអសមត្ថភាព គ្មានឆន្ទៈទប់ស្កាត់បទល្មើសអារឈើឱ្យបានត្រឹមត្រូវ ខណៈដែលមន្ត្រីមួយចំនួនជាប់ពាក់ព័ន្ធនឹងអំពើពុករលួយជាមួយក្រុមជនល្មើស។
អ្នកការពារសិទ្ធិមនុស្ស និងបរិស្ថាន លោក ម៉ា ចិត្រា ប្រាប់វិទ្យុអាស៊ីសេរី នៅថ្ងៃទី៥ ខែកុម្ភៈថា លោកបានចុះល្បាតព្រៃឡង់ កាលពីថ្ងៃទី៤ ខែកុម្ភៈ ហើយរកឃើញបទល្មើសអារឈើជាង ៥០ករណី នៅចំណុចជាំក្ដាមក្រហម ភូមិស្រែវាល ឃុំធ្មា ស្រុកជ័យសែន។ លោកបន្តថា បទល្មើសអារឈើនេះ បន្តកើតឡើង ដោយសារតែមន្ត្រីបរិស្ថានអសមត្ថភាព ប្រព្រឹត្តអំពើពុករលួយ និងមិនអើពើ ទប់ស្កាត់បទល្មើសឱ្យបានត្រឹមត្រូវ។
លោក ម៉ា ចិត្រា៖«ការបំភ្លេចបំផ្លាញធនធានធម្មជាតិ ការបំភ្លេចបំផ្លាញព្រៃឈើធំៗ នៅក្នុងដែនការពារមួយនេះ នៅតែបន្តកើតមានយ៉ាងអនាធិបតេយ្យ និងយ៉ាងគឃ្លើន ទាំងយប់មិញនេះ ខ្ញុំដេក ក៏ឮសំឡេងអារទាំងយប់ដែរ។ នេះវាឆ្លុះបញ្ចាំងពីការខិតខំប្រឹងប្រែង ដែលមិនមានសមត្ថភាពក្នុងការគ្រប់គ្រង និងអភិរក្សតំបន់មួយនេះ»។
បន្ថែមពីនោះ លោកបារម្ភថា ក្រុមជនល្មើស ដែលចូលអារឈើនៅក្នុងតំបន់ព្រៃឡង់ភាគច្រើន បានប្រើប្រាស់គ្រឿងញៀន ហើយបរបាញ់សត្វព្រៃអនាធិបតេយ្យ ទាំងយប់ទាំងថ្ងៃ។ រីឯប្រភេទដើមឈើ ដែលជនល្មើសបានកាប់ និងដឹកចេញទាំងយប់ថ្ងៃនោះ គឺជាប្រភេទឈើទាល ត្រាច និងដើមពពេលជាដើម។
ចំណែក សមាជិកបណ្ដាញព្រៃឡង់ប្រចាំខេត្តព្រះវិហារ លោក ខេម សុឃី លើកឡើងថា ក្រុមជនល្មើស ដែលចូលអារឈើ មិនមែនជាអ្នកភូមិនៅជិតតំបន់ព្រៃឡង់នោះទេ គឺជាក្រុមកម្មករ ស៊ីឈ្នួលអារឈើលក់ឱ្យក្រុមឈ្មួញ មកពីបណ្ដាខេត្តផ្សេងៗ។ លោកថា ជនល្មើសចូលអារឈើ ដោយដើរជាក្រុមៗ មានគ្នាចន្លោះពី ៥នាក់ ទៅ ១០នាក់ ហើយមានកាំភ្លើងកែច្នៃសឹងគ្រប់គ្នា។ លោកបន្តថា ក្រុមជនល្មើសហាក់គ្មានការភ័យខ្លាចអាជ្ញាធរពាក់ព័ន្ធ ឬប្រជាសហគមន៍នោះឡើយ។
លោក ខេម សុឃី៖«នេះមិនមែនជាលក្ខណៈប្រជាជនយើងទៅកាត់ធម្មតាទេ នេះជាលក្ខណៈឈ្មួញ ដែលជួលកម្មករឱ្យចូលអារឱ្យ។ អ្នកដែលរស់ស៊ីឈើនៅតំបន់នោះ វាលក្ខណៈដុះស្លែ»។
វិទ្យុអាស៊ីសេរីពុំអាចទាក់ទងប្រធានមន្ទីរបរិស្ថានខេត្តព្រះវិហារ លោក មឿន សុភេទ និងអភិបាលខេត្តព្រះវិហារ លោក គីម រិទ្ធី ដើម្បីឆ្លើយតបជុំវិញរឿងនេះបានទេ នៅថ្ងៃទី៥ ខែកុម្ភៈ ដោយសារទូរស័ព្ទចូលតែគ្មានអ្នកទទួល។ រីឯអ្នកនាំពាក្យក្រសួងបរិស្ថានលោក ខ្វៃ អាទិត្យា ក៏មិនអាចទាក់ទងបានដែរ នៅថ្ងៃដដែលនេះ។
ព្រៃឡង់ដើរតួយ៉ាងសំខាន់ ក្នុងការផ្គត់ផ្គង់ជីវភាពប្រជាពលរដ្ឋរស់នៅជុំវិញតំបន់នោះ ប្រមាណជាង ២សែននាក់ ភាគច្រើនជាជនជាតិដើមភាគតិចកួយ។ ដែនជម្រកសត្វព្រៃព្រៃឡង់ មានផ្ទៃដីជិត ៥សែន (៤៨៩.៦៦៣)ហិកតារ គ្របដណ្ដប់ក្នុងភូមិ សាស្ត្រខេត្តចំនួន៤ រួមមាន ខេត្តក្រចេះស្ទឹងត្រែង ព្រះវិហារ និងខេត្តកំពង់ធំ។ ប៉ុន្តែ ជាច្រើនឆ្នាំមកនេះ ព្រៃឡង់រងការកាប់ឈើធ្វើអាជីវកម្ម និងការកាប់ទន្ទ្រានដីព្រៃធ្វើជាកម្មសិទ្ធិឯកជនដោយក្រុមឈ្មួញ និងក្រុមហ៊ុនដីសម្បទានសេដ្ឋកិច្ចយ៉ាងអនាធិបតេយ្យ។
អ្នកសម្របសម្រួលគម្រោងនៃសមាគមបណ្ដាញយុវជនកម្ពុជា (CYN) លោក អូត ឡាទីន យល់ឃើញថា មន្ត្រីបរិស្ថាន ដែលឈរការពារនៅតំបន់ព្រៃឡង់ គឺជាអ្នកទទួលខុសត្រូវ ចំពោះការ បាត់បង់ព្រៃឈើទាំងនោះ។ លោកបន្តថា អាជ្ញាធរពាក់ព័ន្ធត្រូវតែមានឆន្ទៈបើកការស៊ើបអង្កេតរកមុខជនល្មើស និងមន្ត្រីពាក់ព័ន្ធបទល្មើសអារឈើយកមកផ្ដន្ទាទោស ចំពោះមុខច្បាប់ឱ្យមានប្រសិទ្ធភាពខ្ពស់ នោះទើបអាចកាត់បន្ថយបទល្មើសអារឈើនេះបាន។
លោក អូត ឡាទីន៖«មន្ត្រីដែលមានភាពអសកម្មក្នុងការទប់ស្កាត់បទល្មើសធនធានធម្មជាតិនៅក្នុងតំបន់ព្រៃឡង់នោះត្រូវតែដកចេញ ដើម្បីបង្ហាញអំពីការប្ដេជ្ញាចិត្ត បង្ហាញអំពីឆន្ទៈក្នុងការដោះស្រាយបញ្ហាបទល្មើសធនធានធម្មជាតិ នៅក្នុងតំបន់ព្រៃឡង់។ បើសិននៅតែបណ្ដែតបណ្ដោយ ហើយឱ្យបញ្ហានៅតែបន្តកើតមាន បានន័យថា មន្ត្រីបរិស្ថាន ឬក្រសួងបរិស្ថាន អាចមានការសង្ស័យក្នុងការឃុបឃិតគ្នាជាមួយនឹងអ្នករកស៊ី ឈើក្នុងការប្រព្រឹត្តអំពើពុករលួយ»។
កាលពីថ្ងៃទី២៦ ខែធ្នូ ឆ្នាំ២០២៤ រដ្ឋមន្ត្រីក្រសួងមុខងារសាធារណៈ លោក ហ៊ុន ម៉ានី ស្នើលោកនាយករដ្ឋមន្ត្រី ហ៊ុន ម៉ាណែត ឱ្យផ្លាស់ប្ដូរប្រធានមន្ទីរបរិស្ថានចំនួន ៤ខេត្ត នៅជុំវិញតំបន់ព្រៃឡង់ ដោយដាក់ជំនួសអ្នកថ្មី ក្រោយពីរងការរិះគន់ពីសំណាក់ពលរដ្ឋថា បណ្ដោយឱ្យបទល្មើសអារឈើនៅតំបន់ព្រៃឡង់ ចេះតែបន្តកើតមាន។ ទោះជាយ៉ាងណាក្ដី ចាប់តាំងពីផ្លាស់ប្រធានមន្ទីរបរិស្ថានថ្មីមក បទល្មើសអារឈើនៅតែកើតមានដដែល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។